Jeremías 21 - DIOSPA QHELQACHISQAN DEUTEROCANONICAL

Sedequías Tata Diosmanta mañakun

¹ Kuraj kamachej Sedequiasqa Malquiaspa churin Pasjurta, chantá Maseiaspa churin sacerdote Sofoniastawan Jeremiasman kacharqa, kayta ninankupaj:

² Tata Diosta tapuripuwayku, imaraykuchus Babiloniamanta kuraj kamachej Nabucodonosor contraykuta maqanakoj jamushan. Ichapis Tata Dios uj t'ukuna imata ruwayta munanman, Nabucodonosorta karunchachinanpaj, nispa.

³ Chantá Tata Dios Jeremiasman parlarqa, Jeremiastaj Sedequiaspa kachankunaman kuticherqa: Kayta Sedequiasman niychej:

⁴ Israelpa Diosnin Tata Diosqa kayta nisunki: Noqa soldadoykichejkunata qhepaman kutirichisaj, Babilonia soldadokunawan Caldeamanta soldadokunawan ima maqanakushajtiykichej. Soldadoykikunatataj kay llajta chawpipi tantaykusaj.

⁵ Noqa kikiy qankunaj contraykichejpi tukuy atiyniywan maqanakoj sayaykusaj, kallpaywan, may sinch'i k'araj phiñakuyniywan ima.

⁶ Kay llajtapi tukuy tiyakojkunata, runakunata, chantá uywakunatapis uj millay onqoywan tukuyninkuta wañuchisaj.

⁷ Chaymanta Judata kuraj kamachej Sedequiasta, kamachinkunata, llajtapi tiyakojkunatawan ima, pikunachus onqoywan, maqanakupi, yarqhaywan wañunankumanta puchojkunata jaywaykusaj Babiloniata kamachej Nabucodonosorman, waj awqankunaman ima. Paykunataj mana khuyakuspa nitaj sonqonta nanachikuspa espadawan wañuchenqanku. Noqa Tata Diosmin chaytaqa nini.

⁸ Kay runakunaman nillaytaj: Tata Dios kayta nin: Noqa ñawpaqeykichejman ajllakunaykichejpaj kawsaytawan, wañuytawan churani.

⁹ Pichus kay llajtapi qhepakojqa maqanakupi, yarqhaywan, chayrí onqoywan wañuchisqa kanqa. Pitajchus caldeokunawan jap'ichikonqa chayqa, mana wañonqachu, aswanpis kawsanqa.

¹⁰ Noqa kay llajtaman llakiyta apachimunayta niniña, manataj allin kajtachu. Babiloniamanta kuraj kamachejman kay llajtata jaywaykusaj, paytaj llajtata ninawan ruphaykuchenqa. Noqa Tata Diosmin chayta nini.

Judata kuraj kamachejpaj willay

¹¹ Judata kuraj kamachejpa ayllunkunaman noqaj nisqayta willay:

¹² Qankuna kuraj kamachej Davidpa miraynin, Tata Diospa nisqanta uyariychej: Sapa p'unchay justiciata ruwaychej, jinallataj ñak'arichisqa kajkunata kacharichiychej runaj yawarninta ch'onqaspa kawsajkunamanta. Pajtataj millayta ruwasqaykichejrayku phiñakuyniy nina jina jap'iykukunman, manataj pipis thasnuyta atishanmanchu, nispa.

Jerusalén jasut'isqa kanqa

¹³ Jerusalén llajta, mayqenchus pampapi chhanka jina kay vallepi kashanki, chay. Noqa Tata Dios contraykipi kashani. Qankunaqa nishankichej: Pitaj maqanakoj yaykumuwasunmanri? Pitaj pakakunanchejman chayamunmanri? nispa.

¹⁴ Noqamin ruwasqaykichejman jina jasut'isqaykichej. Tukuy sach'aykichejman ninata jap'iykuchisaj, chay ninataj tukuy muyuyniykichejpi kajta ruphaykonqa, nispa. Ajinata Tata Dios nin.