Jeremías 2 - DIOSPA QHELQACHISQAN DEUTEROCANONICAL

Israelqa Tata Diosta wasanchan

¹ Tata Dios nillawarqataj:

² Rispa, Jerusalén llajtapi tiyakojkunaman willamuy, allinta uyarinankupaj jina sinch'ita qhapariy: Tata Dios kay jinata nin: Imaynatachus qan sipasllaraj kashaspa, noqallata munakuwasqaykita yuyarikuni. Maypachachus warmiypaj aysarikorqayki chaypacha, manchayta munakuwasqaykita yuyarikuni. Ch'in pampanejta, mana jayk'aj tarpusqa jallp'anejta qhepayta jamusqaykita yuyarikullanitaj.

³ Israel noqapaj t'aqasqa karqa, chajraymanta aswan allin kaj oqharisqay jina karqa. Pillapis paykunata ñak'arichejtenqa, noqa ñak'arichillajtaj kani, sinch'i ñak'ariykunata apachispa. Noqa Tata Diosmin chayta nini.

⁴ Jacobpa ayllunmanta kajkuna, Israelmanta tukuy ayllukuna, Tata Diospa nisqanta uyariychej.

⁵ Ajinata Tata Dios nisunkichej: Ñawpa tataykichejkuna ima mana allin kajtataj noqapi tarerqanku, noqamanta karunchakunankupajri? Qhasi manakaj dioskunata yupaychaspa, paykunapis qhasi manakajllamantaj tukorqanku.

⁶ Judapi tiyakojkunaqa manaña noqamanta tapukunkuchu: Maypitaj kashan Tata Dios, pichus Egipto suyumanta orqhomuspa, ch'inkunanejta, may wayq'orara ch'in jallp'anejta orqhomuwarqanchej, chay Diosrí? Pay pusamuwarqanchej mana yakuyoj jallp'anejta, mana pejpa purisqan, nitaj tiyakusqan, may manchachikuna jallp'anejta, nispa.

⁷ Noqamin kay sumaj jallp'aman pusamorqaykichej, chaypi sumaj poqosqanmanta mikhunaykichejpaj. Qankunarí chayman yaykuytawan, jallp'ayta ch'ichicharqankichej. Millayta ruwasqaykichejwantaj kay jallp'ayta millachikunaman tukucherqankichej.

⁸ Sacerdotekunaqa mana tapukorqankuchu: Maypitaj Tata Dios kashanri? nispa. Kamachisqayta yachachejkunapis mana rejsikapuwarqankuchu. Kurajkunapis contraypi oqharikorqanku. Sut'inchajkunapis Baalpa sutillanpi parlarqanku, chay qhasi manakaj lantikunaj qhepankuta ripuspa.

Tata Dios Judata juchachan

⁹ Chayrayku noqa Tata Dios kayta nillanitaj: Noqa qankunata juchachasqaykichej, jinallataj allchhiykichejkunatapis juchachallasajtaj.

¹⁰ Inti yaykuynej Quitín churukunaman rispa, qhawaychej. Pillatapis Cedarman allinta qhawamunanpaj kachaychej. Ichá tarimunman qankunaj ruwasqaykichejta jina ruwasqankuta.

¹¹ Ima suyutaj diosninkuta wijch'uspa, waj diostañataj churakukunri? Chaykunaqa mana dioschu kankupis. Chaywanpis aylloyqa noqa cheqan Dios jatun kayniypa lliphipiyniyoj kashajtiy, saqerpariwanku, qhasi manakaj lantikunata yupaychanankupaj.

¹² Janaj, chay jina ruwasqankumanta mancharikuychej, manchariywantaj kharkatitiychej. Noqa Tata Diosmin chaytaqa nini.

¹³ Aylloyqa iskay imakunata ruwaspa, juchallin: Noqa kawsaj juturi yaku jina kashajtiypis, saqerpariwarqanku. Chaymantataj paykunaqa waj qochata allakorqanku, yakuta mana sayachej qochata.

Israel juchallikusqanrayku llakiykuna jamun

¹⁴ Israelqa mana wata runachu nitaj kamachi kananpajchu paqarikorqa. Jina kajtenqa, imaraykutaj wajkuna tukuy kapuyninta qhechunkuri?

¹⁵ Imaraykutaj waj runakuna leonkuna jina sinch'ita qhaparispa, israelitakunaman phinkiykunkuri? Jallp'ankuta ch'inpachata saqerparinku. Llajtankutapis ninawan ruphaykuchispa, mana runayojta saqerparinku.

¹⁶ Israel, Menfismanta, jinataj Tafnesmanta Egipto llajtayoj soldadokuna umaykita t'ojlurparisorqanku.

¹⁷ Chay tukuy ima qanta qhatirisorqa, noqa Tata Diosniykita saqerparisqaykirayku, qanta cheqan ñanta pusashasojtiy.

¹⁸ Kunanrí, Egiptoman rispa, Nilo mayumanta yakuta ujyamusqaykiwan imatataj tarinkiri? Asiriaman rispa, Éufrates mayumanta yakuta ujyaspapis, imatataj tarillankitajri?

¹⁹ Kikin juchallaykitaj pataykiman urmamonqa, chay wasanchaj kasqallaykitaj juchachasonqa. Allinta qhawarikuy noqata saqerpariwasqayki imayna millaychus, imayna llakiytajchus kasqanta. Jinallataj noqa Tata Diosta mana kasuwasqaykita allinta repararikuy. Ajinata noqa Tukuy Atiyniyoj Tata Dios nini.

Israelqa Diospa contranta oqharikun

²⁰ Tata Dios Israelta nillantaj: Unaymantaña qanqa contraypi oqharikorqanki, manataj kasuwarqankichu. Chantá nillarqankitaj: Mana payta yupaychayta munanichu, nispa. Jinaqa tukuy orqo patapi, thansa sach'aj uranpi ima phisu warmi jina juchallerqanki.

²¹ Noqa qanta sumaj ajllasqa uvata jina mallkerqayki, chay mallkitaj sumajta poqoj uvamanta karqa. Kunantajrí imaynamanta mana allinta poqoj uva sach'aman tukorqankiri?

²² Ushpha yakuwanpis, chayrí may chhika jabonwanpis mayllakuy, ch'ichi juchaykeqa ñawpaqeypi kikillanpuni kanqa. Ajinata noqa Tukuyta Kamachej Tata Dios nini.

²³ Imaynatataj niyta atiwaj: Mana ch'ichichakunichu, nitaj chay qhasi manakaj dioskunata yupaychanichu, nispari? Qhawarikuy imatachus vallepi ruwarqanki, chayta. Qanqa allinta reparakuy tukuy ruwasqaykita, china camello jina usqhayta rispa maymanpis thaskiykusqallaykita.

²⁴ Qankunaqa k'ita china burro jina kallankichejtaj, mayqenchus q'oñiriytawan, muskhispa orqo burrota mask'an, ajina. Q'oñirisqa kashajtenqa, ni pi jark'ayta atinchu. Orqo burrota mask'asqanpi mana sayk'unchu, imaraykuchus q'oñirisqa kaspa, payqa orqo kajta mask'anpuni.

²⁵ Israel, nanachikunaykikamaqa ama q'ara chaki puriychu chay lantikunaj qhepanta, nitaj yaku ch'akiymanta ñak'ariychu. Chaywanpis qan nerqanki: Mana chayta saqeyta atinichu, imaraykuchus waj dioskunata munakuni, paykunatataj qhatisajpuni, nispa.

Israelqa juchanmanta jasut'isqapuni kanqa

²⁶ Imaynatachus uj suwa jap'ichikuspa p'enqakun, ajinallatataj Israelpis p'enqakonqa, tukuy runantin, kuraj kamachejnintin, kurajkunantin, sacerdotekunantin, Diosmanta sut'inchajnintin ima.

²⁷ Qankunaqa uj k'ulluta ninkichej: Qan tatay kanki, nispa. Uj rumitataj ninkichej: Qan mamitay kanki, nispa. Noqatatajrí wasanchawankichej, wajnejmantaj qhawaykachankichej. Ñak'ariypi rikhurispalla, niwankichej: Jamuy yanaparinawaykupaj, nispa.

²⁸ Judá, ruwakusqayki dioskuna maypitaj kashankuri? Mashkhachus llajtaykikuna kanku, chay chhikallataj diosniykikuna tiyapusunku. Chayrayku ñak'ariypi rikhurejtiyki, paykuna jamuspa, yanapasuchunku.

²⁹ Imaraykutaj noqawan churanakuwankichejri? Qankuna tukuyniykichejmá contrayta oqharikorqankichej. Noqa Tata Dios ajinata nin.

³⁰ Qhasillata wawaykichejta jasut'erqani, ni chaywanpis wanarqankuchu. Qankuna kikiykichej phiña leonkuna jina noqamanta sut'inchajkunata wañucherqankichej.

³¹ Qankuna israelitakuna, noqa Tata Diospa nisqayta allinta uyariychej: Israel, noqa qanpaj sansarej ch'in q'ara pampa jinachu karqaniri? Chayrí, manchachikuna jallp'a jinachu karqani? Ayllúy, imajtintaj ninkichej: Munasqaykuman jina kawsakusqayku, ni jayk'aj qanman kutimusqaykuñachu, nispari?

³² Casarakoj sipasqa k'achitu may valorniyoj jaluchunmanta qonqakapunmanchuri? Chayrí casarakunanpaj k'achanchakusqanmanta qonqapunmanchuri? Aylluyrí unayña noqamanta qonqakapuwan.

³³ Waynaykikunata mask'ayta sumajta yachanki. Phisu warmikunamanpis chay millay ruwasqaykita yachachinki.

³⁴ P'achaykeqa wajchakunaj, jinataj mana juchayojkunaj yawarninkuwan ch'allpaykusqa rikhurin. Qan ni imapi juchallikushajtapis paykunata tariparqankichu.

³⁵ Chaywanpis qan ninkiraj: Noqa mana juchayojchu kani. Diosqa mana noqawan phiñasqachu kashan, nispa. Kunantajrí qan mana juchayoj kasqaykita nisqaykirayku, qanwan pleitota oqharisaj.

³⁶ Imaraykutaj chay jina usqhayta qanman sayasqa qhesachaspa, wajmanñataj k'askakunkiri? Egiptoqa k'akillata saqerparisonqa, imaynatachus Asiriapis ruwasorqa, ajinata.

³⁷ Chantá Egiptomanta may p'enqayta kutimunki, imaraykuchus pikunapichus atinikorqanki, chaykunata noqa qhesachani. Paykunawan kawsakuspaqa, mana imatapis tarinkichu, nispa.