Jeremías 16 - DIOSPA QHELQACHISQAN DEUTEROCANONICAL

Tata Diosqa Jeremiasta kamachin

¹ Tata Dios kay jinata niwarqa:

² Kay suyupi ama casarakunkichu, nitaj wawayojchu kanki.

³ Noqa Tata Dios willasqayki, kay suyupi paqarikoj wawakunata, jinallataj tatankutapis, imachus qhatirinanta.

⁴ Paykunaqa millay onqoykunawan wañonqanku, manataj pipis paykunamanta waqanqachu, nitaj p'ampajkuna kanqachu. Pampapi wanu jina wijch'usqa qhepakonqanku. Maqanaku, yarqhay ima paykunata tukuchenqa, ayankutataj suwintukuna, k'ita animalkunawan mikhonqanku, nispa.

⁵ Tata Dios nillawarqataj: Ama wañuyniyojpa wasinman yaykuychu. Amataj waqaychu, nitaj wañusqayojkunata sonqochaychu, imaraykuchus kay aylluymanta saminchayniyta oqharikapuniña, munakuyniyta, chantá khuyakuyniyta ima. Ajinata noqa Tata Dios nini.

⁶ Kay jallp'api atiyniyoj kajkuna, jinallataj mana kasu ruwana kajkunapis wañuchisqa kanqanku, manataj pipis paykunata p'ampaj kanqachu, nitaj waqanqankuchu. Kawsaqenkunaqa chaymanta llakisqa kasqankuta mana rikuchenqankuchu, ukhunkuta q'allurakuspa, chayrí chujchankuta ruthurakuspa ima.

⁷ Chay wañojpa ayllunta sonqochanapaj mana pipis qorpachuta ruwanqachu, ni tatan wañupojtin, chayrí maman wañupojtinpis.

⁸ Maypichus raymita ruwashanku, chay wasiman amallataj yaykuychu paykunawan khuska mikhunaykipaj, ujyanaykipaj ima.

⁹ Noqa Israelpa Diosnin Tukuy Atiyniyoj Tata Dios kayta nini: Noqa kay suyupi raymi takiyninkuta ch'inyachisaj, jinallataj kusikuyninkuta chantá casarakupi takiyninkutapis. Chayqa chay p'unchaykunapi qankunaj rikunaykichej kanqa.

¹⁰ Aylluyman kay imakuna jamunanta willajtiyki, paykuna tapusonqanku: Imaraykutaj Tata Dios kay jatun ñak'ariyta contraykupi jamunanta kamacherqari? Ima millaytataj ruwarqaykuri? Ima juchatataj Diosniykoj Tata Diospa contranpi ruwaykuman karqari? nispa.

¹¹ Qantaj paykunaman kutichinki: Tata Dios kay jinata nin: Kay tukuy ima qhatirisunkichej, imaraykuchus ñawpa tataykichej saqerpariwarqanku, waj dioskunaj qhepankutataj riporqanku. Chantá chaykunata yupaychaspa, sirverqanku. Noqata saqerpariwaspataj, kamachisqayta mana junt'arqankuchu.

¹² Qankunatajrí ñawpa tataykichejkunamanta nisqaqa aswan millayta ruwarqankichej, imaraykuchus sapa ujniykichej k'ullukuspa, sonqoykichejpa millay munayninman jinalla ruwarqankichej. Manataj noqata kasuwarqankichejchu.

¹³ Chayraykumin kay suyumanta wijch'usqaykichej, mana tataykichej nitaj qankunapis rejsisqaykichej suyuman. Chaypitaj tuta p'unchay mana rejsisqaykichej dioskunata yupaychankichej, imaraykuchus manapuni qankunamanta khuyakusajchu, nispa.

¹⁴ Tata Dios nillantaj: Uj p'unchay chayamonqa, chay p'unchaypitaj manaña ajinata nispa tilunkichejchu: Tata Diospa sutinpi tiluni, pichus israelitakunata Egipto suyumanta orqhomorqa, chaypa sutinrayku, nispa.

¹⁵ Manachayqa ajinata tilunkichej: Tata Diospa sutinpi tiluni, pichus israelitakunata wichay suyumanta orqhomorqa, jinataj maymanchus ch'eqerachisqa karqanku, chay suyumantapis, chaypa sutinrayku, nispa. Ajinata ninkichej, imaraykuchus noqa kutichimusqaykichej, ñawpa tataykichejkunaman qorqani, chay suyuman.

¹⁶ Kunanrí ashkha runata kachasaj challwata jina qankunata jap'inankupaj. Chantá k'ita animalta jap'ejkunata kachallasajtaj tukuy orqokunapi, lomakunapi, jinataj chhanka k'ajllukunapipis qankunata jap'inankupaj.

¹⁷ Tukuy ruwasqaykichejta rikuni, nitaj noqamanta ni ima pakasqa kayta atinchu, nitaj millay ruwasqaykichejpis ñawiymanta pakasqachu.

¹⁸ Ñawpajtaqa uj jinatawanraj tukuy millay ruwasqaykichejmanta, jinataj juchaykichejmantapis qankunata jasut'isqaykichej, imaraykuchus millay mana kawsayniyoj lantikunata yupaychaspa, jallp'ayta ch'ichicharqankichej, chayaqeytataj millay ruwasqaykichejwan junt'acherqankichej, nispa.

Jeremiasqa Tata Diosmanta mañakun

¹⁹ Chantá noqa Jeremías nerqani: Tata Dios, qanmin kallpay, waqaychawajniytaj kanki. Ñak'ariypi qanllamin pakakunay kanki. Qanman kay pachaj k'uchunmantapacha jamuspa, nisonqanku: Ñawpa tatanchejkunaj diosninkoqa qhasi manakaj ni imapaj walej dioskunalla kasqanku.

²⁰ Runaqa atinmanchu dioskunata ruwakuyta? Arí, atinman. Jina chayqa, chaykunaqa manapuni dioskunachu kanku, nispa.

²¹ Chantá Tata Dios kutichiwarqa: Chayrayku ujkama atiyniyta, kallpaytawan paykunaman rikuchisaj, ajinamanta yachanankupaj suteyqa Tata Dios kasqanta, nispa.