Isaías 1 - DIOSPA QHELQACHISQAN DEUTEROCANONICAL

Diosta wasanchaj Judá suyupaj willaykuna

¹ Judá suyupi Uzías, Yotán, Ajaz chantá Ezequías ima ujmanta uj kamachishajtinku, Tata Diosqa Amozpa churin Isaiasman, mosqoypi jina kay jinata willarqa Judá suyumanta, Jerusalén llajtamantawan:

² Janaj, kay pacha ima, Tata Diospa nisqanta uyariychej: Wawakunata uywarqani jatun kanankukama, paykunatajrí contraypi oqharikunku.

³ Bueyqa dueñonta rejsin, burropis maypichus dueñon qarananta rejsillantaj. Israel aylluymanta kajkunarí mana rejsikapuwankuchu, nitaj paykunata waqaychasqaytapis reparankuchu, nispa.

⁴ Ay, juchasapa israelitakuna, qankuna mana allin ruwaykunawan q'epirisqa ayllu kankichej. Millay ruwajkunaj miraynin kankichej, mana p'enqakoj churikunataj. Qankuna Tata Diosta saqerparinkichej, jinataj Israelpa may llimphu kaj Diosninta pisipaj qhawankichej. Payta wasanchaspataj karunchakunkichej.

⁵ Tata Diospa contranpipuni oqharikuyta munajkuna, imajtintaj ñak'arichisqallapuni kayta munankichejri? Tukuy umaykichejqa k'irisqa, tukuy ukhuykichejpis nanasqa.

⁶ Chakiykichejmanta umaykichejkama k'irisqa kankichej, q'eyayasqa, punkisqa, aycha khallasqa ima. Ni pi jampiykusunkichejchu, nitaj mayt'usunkichejchu, nillataj aceitewan jawiykusunkichejchu k'irisqa kasqaykichej thañinanpaj.

⁷ Suyuykichejqa ch'inman tukun, llajtaykichejtataj ninawan ruphaykuchinku. Qankuna qhawashajtiykichej, waj llajtayojkuna poqochisqaykichejta apakapunku. Llajtaykichejqa ch'inpacha qhepakun.

⁸ K'achita Jerusalén sapan qhepakun, uva huertata qhawana ch'ujlla jina, pepino chajra chawpipi ch'ujlla jina, awqakunawan muyuykusqa llajta jina.

⁹ Sichus Tukuy Atiyniyoj Tata Dios noqanchejmanta wakinkunata mana kawsashajta saqenmanchu karqa chayqa, Sodoma jina, Gomorra jinataj chinkachisqa kasunman karqa.

Dios payman kutirikunankuta nin

¹⁰ Sodomata kamachejkuna, Tata Diospa nisqanta uyariychej. Gomorra llajtayojkuna, Diosninchejpa yachachisqanta allinta uyariychej.

¹¹ Tata Dios nin: Pitaj nisunkichej uywa ñak'asqa jaywanata munasqaytari? Amisqaña kani q'olachisqa carnerokunawan, jinallataj waka uñaj wiranta jaywawasqaykichejwan. Manaña munanichu torokunaj, ovejakunaj, chantá chivokunaj yawarninkuta.

¹² Noqata yupaychaj jamojtiykichej, pitaj qankunamanta chaykunata mañakusunkichej, chayrí wasiy patioytapis ch'ichichanaykichejtari?

¹³ Amaña qhasi manakaj jaywanata apamuwaychejchu. Inciensoykichejpa q'oshñinta millachikuni. Killa qallariy raymi ruwasqaykichej, samarina p'unchay waqaychasqaykichejpis qhasi manakaj. Raymi ruwasqaykichejqa millay, manaña rikuyta atinichu.

¹⁴ Killa qallariy raymi ruwasqaykichejta, sapa wata jatun tantakusqaykichejtapis chejnikullanitaj. Chayqa anchataña sayk'uchiwan, manaña rikuyta munanichu.

¹⁵ Qankuna mañakunawaykichejpaj makiykichejta oqharejtiykichej, mana qhawarisqaykichejchu. Ashkha kutita mañakuwankichej chaypis, noqa manapuni uyarisqaykichejchu, imaraykuchus makiykichejqa yawarlla.

¹⁶ Mayllakuychej, llimphuchasqataj kaychej. Ñawpaqeymanta mana allin ruwasqaykichejta wijch'uychej. Amaña mana allin kajta ruwaychejchu.

¹⁷ Aswanpis allin kaj ruwayta yachaqakuychej. Cheqan kajta ruwayta mask'aychej, ñak'arichisqa kaj runakunatataj yanapaychej. Wajcha wawakunaman kutikuychej, warmisapatapis yanapaychej, nispa. Ajinata Tata Dios nin.

¹⁸ Tata Dios nillantaj: Jamuychej, kay imamanta parlarisunchej: Mana allin ruwasqaykichej may jina pukapis kachun, rit'ita jina yurajyachisaj. May jina kullipis kachun, yuraj millmata jina yurajyachisaj.

¹⁹ Sichus qankuna kasuwankichej chayqa, jallp'aj aswan sumaj poqoyninta mikhunkichej.

²⁰ Manapuni kasukuyta munankichej chayrí, espadawan wañuchisqa kankichej. Noqa Tata Diosmin chayta nini.

Jerusalenta Tata Dios llimphuchanqa

²¹ Unay Jerusalenqa noqata kasuwaj llajta karqa, kunantaj phisu warmiman jina tukun. Ñawpajtaqa justiciatawan, chantá cheqanta ruwaj runakunawan junt'a karqa. Kunanrí mana juchayoj kajta wañuchejkunawan junt'a kashan.

²² Ñawpajtaqa ch'uwachasqa qolqe metal jina karqanki, kunanrí q'opaman jina tukunki. Sumaj vino jina karqanki, kunanrí yakuwan chajrusqa vino jinallaña kanki.

²³ Kamachisojkunaqa contraypi oqharikunku, suwajkunaj kawsaqenkutaj kanku. Tukuyninku qolqewan lluk'ichikunku, jinallataj t'inkata qochikuyta mask'anku. Wajcha wawapaj mana justiciata ruwankuchu, nitaj warmisapaj qhaparikusqantapis uyarinkuchu.

²⁴ Chayrayku, noqa Israelpa Tukuy Atiyniyoj Tata Diosnin kayta nini: Noqata chejnikuwajkunamanta cuentata mañasaj, awqaykunamantaj aynita kutichipusajpuni.

²⁵ Makiyta watej qanpa contraykipi oqharisaj. Qolqe metalta jina ch'uwayachispa, tukuy ch'ichiykita orqhosaj, jinamantataj llimphuchasqayki.

²⁶ Ñawpajta jina sumaj juezkunata churapusqayki, jinallataj yuyaychasojkunapis qallariypi jina kapusonqanku. Chaymantataj Jerusalenta sutichanqanku: Cheqan Justiciata Ruwaj Llajta, nispa, jinallataj: Tata Diosman K'askasqa Llajta, nispa.

²⁷ Cheqan ruway justiciawan Sión llajtata kacharichisaj, jinallataj Jerusalenpi tiyakojkunamanta pikunachus noqaman kutirikamojkunatapis qhespichisaj.

²⁸ Mana allinta ruwaj k'ullu runakunarí phirisqa kanqanku. Jinallataj Tata Diosta wasanchajkunapis chinkarparichisqa kanqanku.

²⁹ Chantá qankunaqa encina sach'akunata chay jinatapuni yupaychasqaykichejmanta p'enqachikunkichej. Jinallataj mayqen huertatachus lantikunata yupaychanaykichejpaj ajllasqaykichejmantawan p'enqakullankichejtaj.

³⁰ Qankuna qawisqa laqheyoj encina sach'a jina kankichej, mana qarpasqa huertamantaj rijch'akunkichej.

³¹ Qankunamanta wapu kajkunaqa q'opa jina kanqanku, millay ruwasqankutaj phawaj nina jina pajaman urmamonqa. Chay runakuna millay ruwasqankuwan ima ujllapi lawrarenqanku, nitaj pipis thasnoj kanqachu, nispa.