Hebreos 11 - DIOSPA QHELQACHISQAN DEUTEROCANONICAL

Diospi atinikuspa purina

¹ Diospi atinikusqanchejrayku noqanchej sut'ita yachanchej jap'inanchejtapuni imatachus jap'iyta suyakushasqanchejta. Jinallataj Diospi atinikuspa yachallanchejtaj, imatachus mana rikuyta atinchejchu, chay kasqantapuni.

² Ñawpa tatanchejkunapis Diospi tukuy sonqo atinikusqankurayku paypa ñawpaqenpi allinpaj qhawasqa karqanku.

³ Diospi atinikusqanchejrayku yachanchej Diosqa kamachisqannejta tukuy kaj chhikata ruwasqanta. Ajinaqa, kunan imatachus rikushanchej, chay tukoyqa manakajmanta ruwasqa karqa.

⁴ Abelpis Diospi atinikusqanrayku Cainmanta nisqaqa aswan allin kaj jaywanata Diosman jaywarqa. Abel chayta Diosman jaywaspa, yachayta qorqa pay cheqan runa kasqanta, Diostaj jaywasqanta allinpaj qhawarqa. Ajinaqa Abelpa wañusqan unayña kashan chaypis, noqanchej Diospi atinikuspa imaynatachus kawsasqanmanta yachakuyta atinchej.

⁵ Jinallataj Diospi atinikusqanrayku Enocqa kawsashajlla janaj pachaman apasqa karqa, ama wañuyta rejsinanpaj. Manataj pipis payta tarerqachu, Dios payta apakapusqanrayku. Manaraj Dios Enocta apakapushajtin, tukuy yacharqanku Diosqa payta allinpaj qhawasqanta.

⁶ Diospi mana atinikuspaqa, mana pipis atinmanchu Diospa ñawpaqenpi allinpaj qhawasqa kayta, imaraykuchus Diosman qayllaykojqa pay kasqantapuni tukuy sonqo creenan tiyan. Yachanallantaj tiyan, pikunachus Diosta tukuy sonqo mask'anku, chaykunaman Diosqa sumaj t'inkata qonanta.

⁷ Jinallataj Noeqa Diospi tukuy sonqo atinikorqa. Chayrayku mana jayk'aj rikusqan kananta Dios sut'inchajtin, Noeqa Diosta kasuspa, uj jatun barcota ruwarqa wasi ayllun ama wañunanpaj. Jinallataj Diospi atinikusqanrayku Noé yachayta qorqa chaypacha kawsaj runakuna juchachanapaj jina kasqankumanta. Chantá Diospi atinikusqannejta pay cheqan runapaj qhawasqa kanata jap'erqa.

⁸ Diospi atinikusqanrayku Abrahampis Diospa nisqanta kasorqa. Chayrayku llajtanta saqespa llojserqa, Dios qonanta nerqa, chay jallp'aman rinanpaj, mana yachaspalla maymanchus chayananta.

⁹ Chaymanta Abrahamqa Diospi atinikusqanrayku, Dios qosqayki nisqan jallp'api tiyakorqa, runaj llajtanpi waj llajtayoj runa jina. Pay toldollapi tiyakorqa. Isaacpis, Jacobpis toldollapitaj tiyakorqanku, pikunachus Diospa nisqanta jap'inallankutaj karqa, chaykuna.

¹⁰ Jinaqa Abraham tukuy sonqo suyasharqa sumaj churasqa cimientoyoj llajtaman chayananta. Chay llajtata Diosmin wakicherqa, sayaricherqataj.

¹¹ Sarapis mana wawa rejsiyta atej karqa, chantá payañataj. Chaywanpis Diospi atinikusqanrayku wawata rejsinanpaj kallpata jap'erqa, imaraykuchus Dios nisqanta junt'ananta tukuy sonqo jap'ikorqa.

¹² Ajinaqa Abraham wañusqa jinaña karqa chaypis, miraynin may chhika mana yupay atina karqa janajpi ch'askakuna jina, mama qocha kantupi t'iyu jinataj.

¹³ Chay runakuna wañuporqanku Dios nisqanta manaraj junt'ashasqanta rikuspa. Manachayqa Diospi atinikusqankurayku Dios nisqanta junt'ananta karullamantapis qhawashankuman jina rikorqanku. Chantá kusikuspa, rimarerqanku kay pachapi waj llajtayoj jinalla kasqankuta.

¹⁴ Ajinata parlajkunaqa sut'ita yachayta qonku llajtayoj kayta mask'ashasqankumanta.

¹⁵ Jinapi sichus paykuna llojsimusqanku llajtamanta yuyarikushankuman karqa chayqa, llajtankuman kutipuyta atinkuman karqa.

¹⁶ Chaywanpis, paykuna aswan sumaj llajtata moq'erisharqanku, mayqenchus janaj pachapi kashan, chayta. Chayrayku Diosqa paykunaj Diosninku kayta mana p'enqakunchu, imaraykuchus paykunapaj uj llajtata wakichipunña.

¹⁷ Jinallataj Diospi atinikusqanrayku Abrahamqa k'ata churin Isaacta uywa ñak'asqata jina Diosman jaywarqa. Ajinata Abraham ruwarqa, Diospa kamachisqanta kasukoj kasqanta rejsichinanpaj, imajtinchus Dios Abrahamta nisqa:

¹⁸ Isaacnejta mirayniykeqa may chhika kanqa, nispa.

¹⁹ Abrahamrí churinta Diosman jaywarqa, imaraykuchus yacharqa Diosqa wañojkunata kawsarichinanpaj atiyniyoj kasqanta. Chayrayku uj niypi nisunman: Abrahamqa churin wañusqaña jina kashajtinpis, watej kawsashajta jap'ikapusqa, nispa.

²⁰ Jinallataj Isaacqa Diospi atinikusqanrayku churinkuna Jacobta, chantá Esauta ima samincharqa, qhepanejman paykunawan imachus kananta sut'inchaspa.

²¹ Chantá Diospi atinikusqanrayku Jacobpis wañuy patapiña kashaspa, Josejpa churinkunata sapa ujta samincharqa, tojnunman atikuspataj, Diosta yupaycharqa.

²² Ajinallataj Diospi atinikusqanrayku Josepis wañuy patapi kashaspa, israelitakuna Egiptomanta llojsipunankumanta parlarqa. Jinapi José kamacherqa israelitakuna Egiptomanta ripuspa, tullunkunata Canaanman apanankuta.

²³ Jinallataj Moisespa tatan mamanqa Diospi atinikusqankurayku, wawankuta paqarisqanmantapacha kinsa killata pakayllapi uywarqanku, k'acha wawita kasqanta rikuspa. Ajinata ruwaspa, yachayta qorqanku kuraj kamachejpa kamachisqanta mana manchachikusqankumanta.

²⁴ Diospi atinikusqanrayku Moisesqa jatunña kaspa, Faraonpa ususinpa churin kasqanmanta rejsinankuta mana munarqachu.

²⁵ Manallataj pay munarqachu juchallispa misk'irichikuyta pasapojlla kasqanrayku. Manachayqa Diospa ayllunwan khuska ñak'arichisqa kayta ajllakorqa.

²⁶ Moisesqa Egiptopi qhapaj kaspapis, repararqa chhika patapi kawsarikuna qhasilla kasqanta. Aswanpis Cristorayku qhesachasqa kana aswan sumaj kasqanta qhawarqa, imaraykuchus paypa yuyaynin janaj pachapi t'inka jap'inapi kasharqa.

²⁷ Jinallataj Moisesqa Diospi atinikusqanrayku Egiptomanta riporqa, kuraj kamachejpa phiñakuyninta mana manchachikuspa. Payqa mana rikukoj Diosta rikushanmanpis jina, mana sayk'uspa, sinch'ita sayarqa.

²⁸ Chaymanta qhepaman Moisesqa Diospi atinikusqanrayku Pascua raymita ruwarqa, kamacherqataj israelitakuna wasinkoj punkunkuta yawarwan ch'ajchunankuta, wañuchej ángel kuraj kaj churinkuta ama wañurachinanpaj.

²⁹ Jinallataj israelitakunaqa Diospi atinikusqankurayku Puka Mama Qochaj chawpinta ch'aki pampata chimparqanku. Egiptomanta soldadokunarí jinallatataj ruwayta munaspa, yakuwan p'ampaykuchikuspa wañorqanku.

³⁰ Chaymanta israelitakuna Diospi atinikusqankurayku Jericó llajtaj muyuyninpi phatu perqa payllamanta thuñikorqa, qanchis p'unchayta chay llajtata muyuykojtinku.

³¹ Jinallataj phisu warmi Rajabpis Diospi atinikusqanrayku, Diosta mana kasojkunawan khuska mana wañuchisqachu karqa, imaraykuchus wateqajkunata tukuy sonqo wasinman wajyarikorqa.

³² Imatataj astawan niymanri? Parlanaqa mayraj kashan, manataj tiempo kanchu parlanapaj Gedeonmanta, Baracmanta, Sansonmanta, Jeftemanta, Davidmanta, Samuelmanta, chantá Diosmanta waj sut'inchajkunamanta ima.

³³ Paykuna Diospi atinikusqankurayku waj suyukunata atipaspa jap'erqanku, justiciata ruwaspa kamacherqanku, Diospa qonan kasqanta jap'erqanku, chantá leonkunaj siminkutapis wisq'arqanku.

³⁴ Jinallataj paykunaqa manchay lawrashaj ninata thasnorqanku, espadawan wañuchisqa kanamanta llusp'erqanku. Pisi kallpayoj kaspapis, kallpasapaman tukorqanku. Jinallataj maqanakupi sinch'i atiyniyojman tukuspa, waj suyukunaj soldadonkunata ayqecherqanku.

³⁵ Wakin warmikunapis Diospi atinikusqankurayku ayllunkumanta wañupojkunata kawsarichisqata rikukaporqanku. Wakinkunatajrí sinch'i ñak'arichisqa wañorqanku, imaraykuchus kacharichisqa kanankupaj mana Diosta wasancharqankuchu. Aswanpis paykuna wañusqamanta kawsarimpuspa aswan sumaj kawsayta suyarqanku.

³⁶ Wakinkunaqa p'enqaypi rikhurichisqa karqanku, jasut'isqataj. Wakinkunataj carcelman cadenawan watasqa wisq'achikorqanku.

³⁷ Jinallataj wakinkunaqa rumiwan ch'anqasqa wañorqanku, wakinkunataj serruchowan khuchusqa, espadawan wañuchisqa ima karqanku. Wakinkuna kaymanta jaqayman purerqanku oveja qarawan, chantá cabra qarawan ima p'achallikuspa, mana imayoj, llakisqa, maqasqa ima.

³⁸ Kay pachaqa mana chay jina sumaj sonqoyoj runakunapaj jinachu karqa. Chaywanpis paykuna ayqekuspa ch'innejpi, orqokunapi ima purerqanku. Chantá qaqa jusk'upi, jallp'a t'oqopi ima kawsarqanku.

³⁹ Tukuy chaykunaqa Diospi atinikusqankurayku Diospa ñawpaqenpi allin runapaj qhawasqa karqanku. Chaywanpis chay runakunaqa Diospa qosaj nisqanta mana jap'erqankuchu.

⁴⁰ Ajina karqa Dios aswan allin imakunata noqanchejpaj wakichisqanrayku, ajinamanta paykunapis noqanchejwan khuska mana pantayniyoj kanaman chayanankupaj.