Génesis 7 - DIOSPA QHELQACHISQAN DEUTEROCANONICAL

Jatun musphay para

¹ Chaymanta Tata Diosqa Noeta nerqa: Qan, chantá aylluyki ima jatun barcoman yaykuy, imajtinchus noqa rikuni mita masiykikunamanta qanlla munasqayman jina purisqaykita.

² Qanqa tukuy llimphupaj qhawasqa uywakunamanta qanchis chinata, qanchis orqotawan barcoman qhatiykunki. Mana llimphupaj qhawasqa kajkunamantarí, uj chinatawan, uj orqollatawan qhatiykunki.

³ Jinallataj phawajkunamantapis qanchista yanantinkama apaykunki. Ajinata ruwanki chaykuna kay pachamanta ama chinkanankupaj.

⁴ Noqataj qanchis p'unchaymantawan tawa chunka p'unchayta, tawa chunka tutatawan parachimusaj. Ajinata kay pachamanta tukuy kawsashaj ruwasqayta chinkachisaj, nispa.

⁵ Chantá Noeqa tukuy imata Tata Diospa kamachisqanman jina ruwarqa.

⁶ Musphay para yaku kay pachata p'ampaykorqa chaypacha, Noeqa 600 watayoj kasharqa.

⁷ Noetaj jatun musphay paramanta ayqekunankupaj jatun barcoman yaykorqa churinkunawan, warminwan, chantá ñojch'ankunawan ima.

⁸ Jinallataj llimphupaj qhawasqa animalkuna, mana llimphupaj qhawasqa animalkuna, phawajkuna, qhatatakuspa purej animalkunapis yaykullarqankutaj.

⁹ Diospa nisqanman jina, animalkunamanta uj chinawan, uj orqowan, iskaymanta iskay Noewan khuska barcoman yaykorqanku.

¹⁰ Qanchis p'unchayninmantaj musphay para yaku kay pachata p'ampayta qallarerqa.

¹¹ Noé 600 watayoj kashajtin, iskay kaj killamanta chunka qanchisniyoj p'unchayta, jallp'aj sonqonmanta yaku t'ojyamorqa. Jinallataj janajmanta tukuy yakupis p'uñumanta jina musphayta jich'akamorqa.

¹² Chaypachaqa jallp'a patata paraqa tawa chunka p'unchayta, tawa chunka tutatawan pararqa.

¹³ Maypachachus parayta qallarerqa, chay kikin p'unchayta Noé, chantá churinkuna Sem, Cam, Jafetwan ima jatun barcoman yaykorqanku. Jinallataj Noéj warmin, kinsantin ñojch'ankuna ima yaykullarqankutaj.

¹⁴ Paykunawan khuska yaykullarqankutaj tukuy imaymana rijch'aj k'ita animalkuna, wasi uywakuna, qhatatakuspa purej animalkuna, tukuy imaymana phawajkuna ima.

¹⁵ Tukuy imaymana animalkunaqa iskaymanta iskay jatun barcoman Noewan khuska yaykorqanku.

¹⁶ Noeman Dios kamachisqanman jina, sapa animalmanta chinawan orqowan yaykorqanku. Chaymantataj Tata Diosqa jatun barcoj punkunta wisq'aykorqa.

¹⁷ Chantá jatun musphay paraqa tawa chunka p'unchayta pararqa. Yakutaj manchayta wiñarqa, jinataj jatun barcota maypichus kasqanmanta tuytuchispa, oqharerqa.

¹⁸ Yakoqa astawan astawan kay pachaman junt'aykorqa, jatun barcotajrí yaku patapi tuytorqa.

¹⁹ Yakoqa manchayta wiñaspa, kay pachapi tukuy jatuchaj orqokunata p'ampaykorqa.

²⁰ Orqokunata p'ampasqanmantapis, yakoqa qanchis metrotawan jinaraj wasaykorqa.

²¹ Ajinata kay pachapi tukuy kawsayniyoj wañorqanku: Phawajkuna, uywakuna, k'ita animalkuna, jallp'a patata qhatatakuspa purejkuna, jinataj tukuy runakuna ima.

²² Ajinamanta kay pachapi tukuy samaspa kawsajkuna wañorqanku.

²³ Chaywanpis Noé, chantá jatun barcopi kajkuna imalla kawsarqanku. Jatun barcoman mana yaykojkunarí, tukuyninku wañorqanku: Runakuna, uywakuna, phawajkuna, qhatatakuspa purejkuna ima.

²⁴ Chay yakutaj kay pachata 150 p'unchayta p'ampaykorqa.