Génesis 48 - DIOSPA QHELQACHISQAN DEUTEROCANONICAL

Jacobqa Efrainta Manasestawan saminchan

¹ Mana unaymanchu Joseman willarqanku tatan astawan onqoykapusqanta. Josetaj chayta yachaytawan, iskaynin churinkunata Manasesta, chantá Efraintawan ima pusariykukuspa, tatanta watukoj rerqa.

² Jacobmantaj willarqanku: Wawayki José watukoj jamusunki, nispa. Chayta yachaspa, Jacobqa ñak'ayta sayarispa, puñunanpi tiyarikorqa.

³ Chantá Jacobqa Joseta nerqa: Tukuy Atiyniyoj Diosqa Canaanpi, Luz llajtapi rikhuriwaspa, saminchawarqa.

⁴ Chaypachataj ajinata niwarqa: Noqa qanta ashkhata mirachisqayki, mirayniykimantataj suyukuna rikhurenqanku. Chay jawa, kay jallp'atapis mirayniykiman qopusaj wiñaypaj chayaqenku kananpaj, nispa.

⁵ Manaraj Egiptoman jamushajtiy, kaypi paqarej iskaynin churiykikuna Efrainwan, Manaseswan noqajta kanku, imaynachus Rubenwan, Simeonwan noqajta kanku, ajinata.

⁶ Sichus kaymanta qhepaman waj wawaykikuna kanqankuraj chayqa, chaykuna qanpata kanqanku. Efrainpata, Manasespatawan wawqenku kasqankurayku paykunapis qanmanta chayaqeta jap'illanqankutaj.

⁷ Noqa Padán Arammanta kutimushajtiy, Canaanpi Efrataman chayashajtiy, mamayki Raquel wañuporqa. Chantá Efrataman rina ñan qayllapi ayanta p'ampakaporqani. Kunan chaypa sutenqa Belén, nispa. Ajinata Israelqa Joseta nerqa.

⁸ Chantá Israelqa Joséj churinkunata rikuspa, taporqa: Pikunataj kaykunari? nispa.

⁹ Josetaj kuticherqa: Kaykunaqa kay Egiptopi Diospa qowasqan churiykuna kanku, nispa. Chantá tatan nerqa: Qayllaykuchimuway paykunata saminchanaypaj, nispa.

¹⁰ Israelqa allin machuña karqa, chayrayku manaña imatapis allinta rikuyta aterqachu. Josetaj wawankunata astawan tatanman qayllaykucherqa, paytaj much'araspa, paykunata ojllaykorqa.

¹¹ Chantá Joseta nerqa: Noqaqa manaña ujtawan rikusunayta yuyarqanichu. Chaywanpis Diosqa wawaykikunatapis rejsichiwanraj, nispa.

¹² Joseqa tatanpa moqon patamanta churinkunata oqharerqa, chantá pampakama k'umuykorqa.

¹³ Chaymanta Joseqa iskaynin churinkunata tatanman watejmanta qayllaykucherqa. Paña makinwan Efrainta churarqa tatanpa lloq'ennejman, lloq'e makinwantaj Manasesta churarqa tatanpa pañannejman. Ajinamanta Efraín Israelpa lloq'ennejpi karqa, Manasestaj pañannejpi.

¹⁴ Israeltajrí makinkunata cruzaspa, paña makinta sullk'a kajpa uman pataman churarqa, chayqa Efraín. Lloq'e makintataj Manasespa uman pataman churarqa, pay kuraj kaj kajtinpis.

¹⁵ Chantá Jacob ajinata nispa, Joseta samincharqa: Jatun tatay Abrahampata, chantá tatay Isaacpatawan Diosnin, pitachus paykuna yupaycharqanku, chay Dios kasqaymantapacha kunankama uywakuwarqa.

¹⁶ Paymin tukuy sajra kajmanta waqaychawaj Angelqa. Kunantaj pay kay wawakunata saminchachun. Paykunanejta sutiy yuyarisqa kachun, jinallataj ñawpa tataykuna Abrahampata, Isaacpatawan sutinkupis. Kaykuna wiñaspa, ashkha wawayoj kachunku, kay pachapitaj may chhikata mirachunku, nispa.

¹⁷ Joseman mana allinchu rijch'arqa tatan paña makinta Efrainpa umanman churasqanqa. Chayrayku tatanpa makinta jap'ispa, Manasespa umanman churayta munarqa.

¹⁸ Jinaspataj, José tatanta nerqa: Ama tatáy, ajinataqa ruwaychu. Kayraj kuraj kajqa. Paypa umanman paña makiykita churay, nispa.

¹⁹ Tatantajrí mana munarqachu, nerqataj: Yachani wawáy, yachani. Manasespis ashkha runayoj jatun suyuman tukonqa. Chaywanpis paymanta nisqaqa sullk'a kaj aswan kanqa, mirayninmantataj may chhika suyukuna rikhurenqanku, nispa.

²⁰ Chantá Jacobqa chay p'unchaypacha Efrainta, Manasestawan samincharqa: Israelitakuna qankunaj sutiykichejta oqharispa, wajkunata saminchanqanku, nenqankutaj: Dios qanwan ruwachun, imaynatachus Efrainwan, Manaseswan ruwarqa, ajinata, nispa. Ajinata Israelqa Efrainpa sutinta ñawpajta oqharerqa, Manasespa sutintataj qhepallata.

²¹ Chaymantataj Joseta nerqa: Noqaqa wañupusajña, chaywanpis Diosmin qankunawan kanqa. Aswan qhepamantaj payllataj ñawpa tataykichejpa Canaán jallp'aman kutichisonqachej.

²² Noqataj wawqeykikunamanta nisqa qanman aswan jatun jallp'ata qoyki Sichem cheqapi, mayqentachus mayta maqanakuspa amorreokunamanta qhechorqani, chayta, nispa.