Génesis 47 - DIOSPA QHELQACHISQAN DEUTEROCANONICAL

Joseqa faraonwan parlan

¹ Chaymanta Joseqa faraonman willaj rerqa: Wawqeykuna, tatay ima Canaanmanta chayamunku. Paykuna ovejankuwan, wakankuwan, tukuy imankuwan ima Gosenpiña kashanku, nispa.

² Chantá José wawqenkunamanta phishqata ajllaspa, faraonman rejsichinanpaj pusarqa.

³ Faraontaj paykunata taporqa: Imatataj ruwayta yachankichejri? nispa. Paykunataj kuticherqanku: Noqaykoqa ñawpa tatayku jina ovejata uywaspa kawsayku.

⁴ Noqayku kayman tiyakoj jamuyku ari, imaraykuchus Canaanpeqa manchay yarqhay kashan, uywaykupaj pastollapis mana kanchu. Chayrayku wiraqochíy, nirikusuyta munayku, ama jina kaspa, Gosenpi tiyarichinawaykuta, nispa.

⁵ Chaymanta faraonqa Joseta nerqa: Tatayki, wawqeykikuna ima qanwan tiyakoj jamuchunku.

⁶ Egipto suyoqa makiykipi kashan. Tatayki, wawqeykikuna tiyakunankupaj aswan sumajnin kaj jallp'ata qoy. Gosenpi tiyakuchunku. Chantá sichus paykuna ukhupi aswan yuyayniyoj kasqankuta qhawanki chayqa, uywayta michinankupaj churanki, nispa.

⁷ Chantá Joseqa tatan Jacobtañataj faraonman rejsichinanpaj pusarqa. Jacobtaj faraonta jatun respetowan napaykorqa.

⁸ Faraontaj payta taporqa: Mashkha watayojñataj kankiri? nispa.

⁹ Jacobtaj faraonta nerqa: Kayman jaqayman purispa kasqayqa ña 130 wataña kashan. Pisilla chaypis, kawsayneyqa llakiylla karqa. Chaywanpis ñawpa tataykuna mashkha unaytachus kawsasqankumanqa niraj chayanirajchu, nispa.

¹⁰ Chaymanta Jacobqa faraonta saminchaytawan, manchay respetowan ñawpaqenmanta llojsiporqa.

¹¹ Chantá José faraonpa nisqanman jina, tatan, chantá wawqenkuna ima tiyakunankupaj Egiptomanta sumajnin kaj jallp'ata qorqa. Ajinamanta tatan Jacob, wawqenkuna ima Ramesés cheqanejpi jallp'ayoj karqanku.

¹² Jinallataj Joseqa sapa aylluman mikhunankupaj qorqa mashkhachus kasqankuman jina.

¹³ Mikhunamanta pisichikuna anchapuni karqa, ni mayqen suyupi runapaj mikhuna kasqanrayku. Chayrayku Egiptopi, jinataj Canaanpi tiyakojkunaqa yarqhaymanta wañusharqankuña.

¹⁴ Jinapi Egipto llajtayojkuna, jinataj Canaán llajtayojkuna mikhuyta rantispa, qolqe pagasqankuta José tantarqa. Chantá faraonpa kamachinan wasipi waqaycharqa.

¹⁵ Chaywanpis Egiptopi jinataj Canaanpipis rantinankupaj qolqe tukukapojtin, runakunaqa Joseman rispa, nerqanku: Mikhunata qowayku. Qolqeyku tukukusqanrayku, yarqhaymanta wañojta qhawakullawasqaykuchu? nispa.

¹⁶ Josetaj paykunata nerqa: Sichus manaña qolqeykichej kanchu chayqa, uywaykichejta apamuychej ari, noqataj mikhunata qosqaykichej, nispa.

¹⁷ Jinata nejtintaj, runakuna caballonkuta, ovejankuta, wakankuta, chantá burronkuta ima Joseman apamorqanku. Josetaj uywankumanta chay runakunaman uj wata junt'ata mikhunankupaj qorqa.

¹⁸ Chay wata tukukojtintajrí, runakuna ujtawan Joseman rispa, nerqanku: Mana qanmanta imatapis pakayta atiykumanchu, wiraqochíy. Manaña qolqeyku tiyapuwaykuchu, uywaykupis qanpataña. Mikhunamanta paganaykupaj manaña imaykupis kanchu. Jallp'aykuwan, noqaykuwan imallaña kashayku.

¹⁹ Yarqhaywan wañojta ama qhawakullawaykuchu ari. Noqaykuta, jallp'aykutawan rantikapuwayku. Jinamanta faraonpa wata runan kasqayku. Jallp'aykutapis payllapajña llank'apusqayku. Tarpunaykupaj mujullata qowayku, ama wañunaykupaj, jallp'aykutaj ama ch'inman tukunanpaj, nispa.

²⁰ Ajinata Joseqa Egipto suyumanta tukuy jallp'ata faraonpaj rantirarqa. Yarqhay ancha kasqanrayku, Egipto llajtayojkuna jallp'ankutapis venderqanku. Ajinamanta jallp'ankoqa faraonpa makinman chayarqa.

²¹ Tukuynin Egiptopi kaj chhika runakunataj wata runanman tukorqanku.

²² Joseqa sacerdotekunaj jallp'allankuta mana ranterqachu. Paykuna kawsanankupaj faraón qosqanrayku, mikhunanku kallarqa. Chayrayku paykuna jallp'ankuta mana venderqankuchu.

²³ Chaymanta José runakunata nerqa: Kunanqa qankuna, jallp'aykichejwan imaqa faraonpata kankichej. Noqaqa paypaj ranterqaykichej. Kayqa muju, tarpumuychej.

²⁴ Chajrata oqharispaqa, phishqaman t'aqaspa, ujta faraonman qonkichej. Puchojtaj qankunapaj kanqa tarpunaykichejpaj, mikhunaykichejpaj, wawaykichejkuna mikhunankupaj ima, pikunachá wasiykichejpi tiyakunku, chaykunapis mikhunankupaj, nispa.

²⁵ Paykunataj nerqanku: Ama wañunaykupaj qanmin yanapawarqayku. Ama jina kaspa, faraonpa wata runanta jina jap'ikapuwayku, nispa.

²⁶ Ajinata Joseqa Egiptopi uj kamachisqata orqhorqa, chajrata oqharisqankumanta phishqamanta ujninta faraonman qonata. Ajina kamachisqa kunankama kashanrajpuni. Sacerdotekunalla mana imatapis faraonman qonankuchu karqa, imaraykuchus paykunaj jallp'anku mana jayk'ajpis faraonpa makinman chayarqachu.

²⁷ Israelitakunaqa Egiptopi, Gosén nisqa cheqanejpi tiyakorqanku. Chaypi jallp'ata rantikorqanku, jinataj may chhika wawayoj karqanku.

²⁸ Jacobqa Egiptopi chunka qanchisniyoj watata tiyakorqa. Tukuyninpi pay 147 watata kawsarqa.

²⁹ Ujpacha Israelqa wañupunan qayllallaña kasqanta reparaspa, Joseta wajyachispa, nerqa: Sichus cheqatapuni munakuwanki chayqa, makiykita khapay chayman churaspa, tiluy imatachus nisusqayta ruwanaykita: Wañupojteyqa, ama ari Egiptopi p'ampawankichu.

³⁰ Aswanpis ñawpa tataykunawan tinkukapoj ripojteyqa, qan ayayta Egiptomanta apaspa, ñawpa tataykunaj aya p'ampanankupi p'ampamuwanki, nispa. Josetaj kuticherqa: Ajinata ruwasaj, tatáy, nispa.

³¹ Chantá Israel ujtawan nerqa: Tiluy, nispa. Josetaj tilorqa. Chaymanta Israel puñunanpi sawnanan chaynejman k'umuykuspa, Dioswan parlarikorqa.