Génesis 45 - DIOSPA QHELQACHISQAN DEUTEROCANONICAL

José wawqenkunaman rejsichikun

¹ Judajpa nisqanta José uyarejtin, sonqon wawayarqa, jinataj kamachinkunaj ñawpaqenkupi manaña awantakuyta aterqachu. Chayrayku jatunmanta qhaparispa, paykunata nerqa: Kaymanta tukuy llojsiychej, nispa. Ajinaqa José wawqenkunaman rejsichikushajtin, Egipto llajtayojkunamanta mana pipis paywan karqachu.

² Chantá José jatunmanta jik'un jik'unta waqarikorqa. Waqarikusqantaqa Egipto llajtayojkunapis uyarerqanku, jinallataj faraonpa wasinpi kajkunapis yachallarqankutaj.

³ Chantá Joseqa wawqenkunata nerqa: Noqa José kani. Tatayqa kawsakushanrajchu? nispa. Wawqenkunatajrí mana imatapis kuticherqankuchu, imaraykuchus ñawpaqenpi ancha mancharisqa kasharqanku.

⁴ Josetaj ujtawan paykunata nillarqataj: Qayllaykamuwaychej, nispa. Paykuna qayllaykojtinkutaj, José nerqa: Noqa José kani, wawqeykichej, pitachus qankuna Egiptopi wata runa kanaypaj vendewarqankichej, chay.

⁵ Chaywanpis ama chaymanta anchata llakikuychejchu, nitaj vendewasqaykichejmanta juchachanakuychejchu. Diosmin qankunamanta ñawpajta kayman kachamuwarqa, qankunata kawsachinaypaj.

⁶ Kay suyupi yarqhay kasqanqa iskay wataña, phishqa watatawanraj kanan kashan. Chay watakunapi manapuni chajra oqharina kanqachu, nitaj tarpusqapis poqonqachu.

⁷ Chayrayku Dios qankunamanta ñawpajta noqata kayman kachamuwarqa, kay pachapi mirayniykichej ama tukukunanpaj uj jatun t'ukunata ruwasqannejta.

⁸ Ajinaqa Diospuni kay llajtaman kachamuwarqa, mana qankunachu. Paymin faraonta yuyaychanaypaj churawarqa. Jinallataj tukuy imanta qhawapunaypaj churallawarqataj, chantá tukuy Egiptopi kamachinaypaj ima.

⁹ Ajinaqa, maypichus tatay kashan, chayman usqhayta kutiychej, niychejtaj: Wawayki José nisunki: Egipto suyuta kamachinaypaj Dios churawan. Tatáy, waturikuwaj usqhayllata jamuy.

¹⁰ Egiptoman chayamuspataj, Gosén cheqanejpi, noqamanta qayllapi tiyakunki wawaykikunawan, allchhiykikunawan, uywaykikunawan, chantá tukuy kapuyniykiwan ima.

¹¹ Chantá kawsanaykichejpaj noqa mikhunata qosqaykichej, aylluykichej, tukuy qanwan kashajkuna ima ama imamanta pisichikunaykichejpaj, imajtinchus yarqhayqa phishqa watatawanraj kanan kashan, nispa.

¹² José nillarqataj: Qankuna, sullk'ay Benjaminwan ima testigo kankichej noqapuni kayta nishasqayta.

¹³ Ajinata qankuna tatayman willampuwaychej Egipto suyupi kamachej kasqaymanta, jinallataj imatachá rikusqaykichejta. Chayrayku usqhayta rispa, tatayta pusampuwaychej, nispa.

¹⁴ Chantá José ujtawan wawqen Benjaminta ojllaykuspa, waqarikorqa. Benjaminpis waqarikullarqataj.

¹⁵ Chaymantataj José sapa ujta much'aykuspa, ojllaykuspataj, waqarikorqa. Chaymantaña wawqenkunaqa mana manchachikuspa paywan parlarqanku.

¹⁶ Josejpa wawqenkuna chayamusqankuta faraonpa kamachinan wasipi yacharqanku. Chayta yachaspataj, faraonwan, yanapajninkunawan ima manchayta kusikorqanku.

¹⁷ Chantá faraón Joseta nerqa: Wawqeykikunata niy burronkukunaman trigota chajnariykukuspa, Canaanman kutinankuta.

¹⁸ Chantá tataykichejta, aylluykichejtawan pusamuchunku. Noqataj Egiptomanta sumajnin kaj jallp'ata qosqaykichej, qankunataj kaypi poqosqanmanta sumajta mikhunkichej, nispa.

¹⁹ Chantá wawqeykikunata kamachillaytaj Egiptomanta carretakunata apanankuta, chaykunapi wawankukunata, warminkukunata, tatankuta ima apakampunankupaj.

²⁰ Ama imaykichejta Canaanpi saqesqaykichejmanta llakikuychejchu, imajtinchus imachá Egiptopi tiyan, chaymanta sumajnin kaj qankunapaj kanqa, nispa.

²¹ Chaypacha Israelpa churinkuna ajinata ruwarqanku. Joseqa faraonpa kamachisqanman jina carretakunata paykunaman qorqa. Jinallataj ñanpi mikhunankupajpis qollarqataj.

²² Chantá sapa ujninkuman mosoj p'achata qollarqataj. Benjaminmantajrí 300 qolqeta qorqa, phishqa mosoj p'achatawan.

²³ Jinataj imachus Egiptopi sumajta poqojmanta chunka burropi tatanman apacherqa. Jinallataj tatan jamushaspa mikhunanpaj apachillarqataj chunka burropi trigota, t'antata, qoqawitawan ima.

²⁴ Chantá José wawqenkunata kacharpayashaspa, nerqa: Pajtataj ñanpi siminakuspa maqanakushawajchej, nispa. Paykunataj purirerqanku.

²⁵ Egiptomanta puririspa, Canaanman chayarqanku, maypichus tatanku Jacob tiyakusharqa, chayman.

²⁶ Chantá Jacobman willarqanku: Joseqa kawsashasqaraj, paytaj Egiptopi kamachej kasqa, nispa. Jacobtajrí mancharispa, ch'inlla karqa, imaraykuchus llullakushasqankuta yuyarqa.

²⁷ Chaywanpis paykuna Josejpa tukuy nisqanta allinta willajtinku, chantá apachisqan carretakunata rikuspa, Jacob manchayta kusikorqa.

²⁸ Chantá Israel nerqa: Niwasqaykichejqa jinapunichá, chayllata yachayta munarqani. Waway Joseqa kawsakushanraj. Chayrayku manaraj wañupushaspa, paypa uyanta rikumusaj, nispa.