Génesis 42 - DIOSPA QHELQACHISQAN DEUTEROCANONICAL

Joséj wawqenkuna Egiptoman rinku

¹ Canaanpi tiyakushaspa, Jacob yacharqa Egiptopi trigo rantinapaj kasqanta. Chantá churinkunata nerqa: Imata kaypi ruwashankichej uyaykichejta qhawanakuspallari?

² Willawanku Egiptopi trigo rantikunapaj kasqanta. Chayrayku jaqaymanta trigota rantimuychej, ama yarqhaywan wañunanchejpaj, nispa.

³ Chantá Joséj chunkantin wawqenkuna Egiptoman rerqanku trigota rantikoj.

⁴ Jacobrí mana munarqachu Josejpa sullk'an Benjamín paykunawan rinanta, imaraykuchus nerqa: Ichá paytapis ima pasashanman, nispa.

⁵ Jinapi Israelpa churinkuna Egiptoman waj rejkunawan khuska rerqanku, imaraykuchus tukuynin Canaán jap'iypipis manallataj mikhuna karqachu.

⁶ Chaypacha José Egiptopi kamachishaspa, tukuynejmanta jamojkunaman trigota venderqa. Wawqenkunataj chayaytawan, Josejpa ñawpaqenpi pampakama k'umuykorqanku.

⁷ Josetaj paykunata rikuytawan, wawqenkuna kasqankuta rejsikaporqa. Paytajrí manapis rejsinmanchu jina churakorqa. Chantá paykunata phiñarikuspa jina taporqa: Maymanta qankuna jamushankichejri? nispa. Paykunataj kuticherqanku: Canaanmanta trigota rantikoj jamuyku, tatáy, nispa.

⁸ Joseqa wawqenkunata rejsikaporqa, paykunatajrí mana payta rejserqankuchu.

⁹ Chaymantataj José paykunamanta imatachus mosqokusqanta yuyarikorqa. Chantá paykunata nerqa: Qankunaqa wateqaj jamunkichej, kay suyupi maynejchus as saqerpasqalla kashasqanta yachaj, nispa.

¹⁰ Paykunataj nerqanku: Mana, wiraqochíy, noqaykoqa trigota rantikojlla jamuyku.

¹¹ Tukuyniyku uj runaj wawallan kayku. Noqayku mana millayta ruwaspa puriyta yachaykuchu, nitaj wateqaspa puriykuchu, nispa.

¹² Josetaj nerqa: Chayqa mana jinachu, qankunaqa kay suyupi mana allin qhawasqa cheqakunata qhawaj jamunkichej, nispa.

¹³ Paykunataj kuticherqanku: Noqaykoqa chunka iskayniyoj kayku, uj tatayojlla, jamushaykutaj Canaanmanta. Sullk'a kaj wawqeykoqa tataykuwan qhepakun, ujnintaj chinkapun, nispa.

¹⁴ Chaywanpis José nillarqapuni: Niykichejña. Qankunaqa wateqaj jamunkichej.

¹⁵ Cheqatachus nishasqaykichejta kunanpacha yachasunchej. Faraonpa sutinrayku noqa tiluykichej: Sullk'a kaj wawqeykichejta chayachimunaykichejkama, mana kaymanta llojsinkichejchu.

¹⁶ Payta pusamoj ujnillaykichej rinkichej, wakinniykichejtaj kaypi preso qhepakunkichej. Chaypi yachakonqa cheqatapunichus parlashankichej manachus, chay. Manachus jina chayqa, qankunaqa wateqaspa purishankichej, nispa.

¹⁷ Jinamanta José tukuyninkuta kinsa p'unchayta carcelman wisq'acherqa.

¹⁸ Kinsa p'unchaymantataj José paykunata nerqa: Noqaqa Diosta manchachikuni. Sichus kawsayta munankichej chayqa, kayta ruwaychej:

¹⁹ Sichus qankuna cheqanta parlaj kankichej chayqa, ujnin wawqeykichejta carcelpi saqeychej, wakintaj ripuychej, aylluykichej mikhunanpajtaj trigota apaychej.

²⁰ Chantá kutimunawaykichejpaj sullk'aykichejta pusamuwankichej. Chaypi yachasaj cheqantachus parlashankichej manachus, chayta. Manachus wawqeykichejta pusamunkichej chayrí, wañuchisqa kankichej, nispa. Paykunataj kuticherqanku: Ajina kachun, tatáy, nispa.

²¹ Chantá paykunapura ninakorqanku: Wawqenchejta mana allinta ruwasqanchejmanta noqanchej kay jinata ñak'arishanchej. Khuyayta mañakushawajtinchej, may jinata waqashajta rikushaspapis, mana uyarerqanchejchu. Chayraykumin kay jina llakiy qhatirishawanchej, nispa.

²² Chantá Rubén paykunata nerqa: Chayrayku noqa nerqaykichej ama imatapis Joseta ruwanachu, nispa. Qankunatajrí mana kasuwarqankichejchu. Kunanqa wañusqanmanta juchachasqa kashanchej, nispa.

²³ Paykuna mana yacharqankuchu José imatachus parlasqankuta entiendeshasqanta, imaraykuchus José paykunaman parlasqanta waj runa hebreo rimayman tijrarqa.

²⁴ Chantá José qayllankumanta ithiriytawan, maytapuni waqarikorqa. Kutirimuspataj, paykuna rikushajtinku, Simeonta jap'ichispa, wataykucherqa.

²⁵ Chantá José kamachinkunata nerqa wawqenkunaj costalninkuman trigota junt'arachipunankuta, qolqe pagasqankutataj sapa ujpa costalninkuman churaykuspa, siraykunankuta. Nillarqataj qoqawitapis churapunankuta, ñanpi mikhunankupaj. Kamachinkunataj Joséj nisqanta ruwarqanku.

²⁶ Chaymanta Joséj wawqenkunaqa burronkunaman trigota chajnariykukuspa, riporqanku.

²⁷ Maynejpichus samarinankuman chayaspa, wawqekunamanta ujninku costalninta urayk'ucherqa burronta mikhuchinanpaj. Chantá costalninta kicharispa, qolqenta tarerqa.

²⁸ Chaymantataj wawqenkunata nerqa: Qhawariychej, qolqeyta kutichipuwasqanku, costalniypi kashasqa, nispa. Tukuyninkutaj chayta rikuspa, mayta mancharikorqanku, paykunapurataj ninakorqanku: Imatataj Dios kayta ruwashawanchejri? nispa.

²⁹ Canaanman chayaspa, paykuna imaynachus risqanta tatanku Jacobman willarqanku.

³⁰ Nerqankutaj: Egiptopi kamachej wiraqocheqa may phiñasqa parlawayku, tumpawaykutaj llajtankuman wateqaj risqaykumanta.

³¹ Noqaykutaj nerqayku allin runa kasqaykuta, nitaj ni jayk'aj wateqaspa purisqaykuta.

³² Willallarqaykutaj uj runaj wawallan chunka iskayniyoj wawqekuna kasqaykuta. Chantá willallarqaykutaj uj wawqeyku manaña noqaykuwanchu kasqanta, sullk'aykutaj qanwan Canaanpi qhepakusqanta.

³³ Jinata nejtiyku, chay llajtata kamachej runa niwarqayku: Cheqanta parlaj kasqaykichejta kay jinamanta yachasaj: Kaypi noqawan ujnin wawqeykichejta saqeychej, qankunataj aylluykichejpaj trigota apaspa llajtaykichejman kutipuychej.

³⁴ Chantá ujtawan kutimuspa, sullk'aykichejta pusamuwankichej. Ajinapi sut'ita yachasaj qankuna cheqanta parlaj kasqaykichejta, manataj wateqaspa purejkunachu. Chantá kay wawqeykichejta kacharipusaj, qankunataj kay llajtapi mana pejpa ima nisqan purinkichej, nispa.

³⁵ Chantá Jacobpa churinkuna costalninkumanta trigota jich'ashaspa, ch'uspitapi watasqata sapa uj qolqenkuta tarikaporqanku. Chantá paykuna, jinataj tatanku qolqe pagasqankuta pachanta rikuspa, mancharerqanku.

³⁶ Chaymanta Jacob paykunata nerqa: Qankunaqa mana wawayojta saqeshawankichej. José manaña noqanchejwanchu, Simeonpis manallataj kaypichu. Kunanqa Benjamintañatajchu pusankichej? Kay tukuy imaqa llakiywan wañunaypaj jina, nispa.

³⁷ Chantá Rubén tatanta nerqa: Benjaminmantaqa noqa cuentallikusaj, kawsashajta kutichimpusqayki. Manachus payta kutichimpusqayki chayqa, iskaynin wawaykunata wañuchiyta atinki, nispa.

³⁸ Jacobtajrí nerqa: Benjaminneyqa manapuni qankunawan renqachu. Wawqen José wañupun, kunantaj payllaña qhepakun. Sichus ñanta rishajtiykichej imapis pasanman chayqa, qankuna juchayoj kawajchej machu kayniypi llakiywan wañunaymanta, nispa.