Génesis 41 - DIOSPA QHELQACHISQAN DEUTEROCANONICAL

Joseqa faraonpa mosqokusqanta sut'inchan

¹ Iskay watanman jina, faraón mosqokorqa. Mosqoyninpitaj payqa Nilo mayu kantupi kashasqa.

² Jinallaman qanchis sumachaj wira wakakunata rikusqa, mayumanta llojsimuspa, mayu kantupi q'achuta mikhushajta.

³ Chaykunaj qhepantataj mayumanta qanchis millay rajchi wakakuna llojsimullasqankutaj. Chantá mayu kantupi wira wakakunaj ñawpaqenkupi sayasqanku.

⁴ Chantá millay rajchi wakakunaqa wira wakakunata mikhukapusqanku. Ajinata mosqokushaspa, faraonqa rijch'arerqa.

⁵ Chantá ujtawan puñukapuspa, mosqokullarqataj. Chaypacha rikusqa sumaj poqosqa qanchis trigo umata uj yurallamanta llojsishajta.

⁶ Chaykunaj qhepantataj llojsimullasqankutaj ch'aki wayraj ch'akichisqan, qanchis ch'usu trigo umakuna.

⁷ Chay ch'usu trigo umakunataj qanchis sumachaj trigo umakunata mikhuykusqanku. Chantá faraón rijch'arispa, mosqokusqallanta reparakorqa.

⁸ Q'ayantin paqarin faraón manchay phutisqa kasharqa. Chayrayku Egiptomanta tukuy watojkunata chantá tukuy yachayniyojkunata ima wajyacherqa. Chaywanpis faraón mosqokusqanta willajtin, ni pipis sut'inchayta aterqankuchu.

⁹ Chantá vinota jaywajkunaj kuraj kamachejninku faraonta nerqa: Kunan noqa mana allinta ruwasqayta yuyarikuni.

¹⁰ Maypachachus t'anta ruwajkunaj kamachejpa contranta, noqaj contraytawan qan phiñakorqanki chaypacha, qhawaj soldadokunaj capitanpa wasinpi carcelman wisq'achiwarqayku.

¹¹ Chantá uj ch'isilla paypis, noqapis mosqokorqayku, sapa ujpa mosqokusqaykutaj noqaykupaj imachus kananmanta niyta munasqa.

¹² Chayllapitaj uj hebreo waynuchu kasharqa. Payqa capitanpa kamachin karqa. Mosqokusqaykuta payman willarikorqayku, paytaj sut'inchawarqayku noqaykuwan imachus kananmanta.

¹³ Chantá sut'inchawasqaykuman jina kikin karqa. Noqaqa ruwanayman kutiykuchisqa karqani, chay ujtaj sipisqa karqa, nispa.

¹⁴ Jinapi faraón Joseta wajyachejtin, usqhayllata payta carcelmanta orqhomorqanku. Josetaj chujchanta k'utuchikuspa, chantá waj p'achatawan churakuspa, faraonpa ñawpaqenman rerqa.

¹⁵ Faraontaj Joseta nerqa: Noqa mosqokorqani, nitaj pipis sut'inchayta atiwanchu. Chaywanpis uyarini pipis mosqokusqankuta willasojtinku, qanpis sut'inchasqaykita, nispa.

¹⁶ Josetaj faraonta nerqa: Chayqa mana noqamantachu, Dioslla atin allinniykipaj sut'inchasuyta, nispa.

¹⁷ Chantá Joseman faraón nerqa: Mosqoyniypi Nilo mayu patapi sayashasqani.

¹⁸ Chantá jinallaman mayumanta qanchis sumachaj wira wakakuna llojsimuspa, mayu kantupi q'achuta mikhushasqanku.

¹⁹ Chaykunaj qhepankutataj qanchis millay rajchi wakakuna llojsimullasqankutaj. Chay jina rajchi wakakunata tukuy Egiptopi mana jayk'ajpis rikorqanichu.

²⁰ Chantá chay qanchis millay rajchi wakakunaqa qanchis sumaj wira wakakunata mikhukapusqanku.

²¹ Wira wawakunata mikhukapushajtinkupis, mikhukapusqankuta mana pipis reparasqachu, imaraykuchus ñawpata jina rajchillapuni kashasqanku. Noqataj jinallapi rijch'arerqani.

²² Chantá puñukapuspa, ujtawan mosqokullarqanitaj. Qanchis sumaj trigo uma uj yurallamanta llojsisqanta rikorqani.

²³ Jinallataj, ch'aki wayraj ch'akichisqan qanchis ch'usu trigo umata rikullarqanitaj.

²⁴ Chantá qanchis ch'usu trigo umaqa sumachaj trigo umata mikhuykusqanku. Mosqokuspa imatachus rikusqayta yachajkunaman willarqani, nitaj pipis imatachus niyta munasqanta sut'inchayta atiwankuchu, nispa.

²⁵ Chantá José faraonta nerqa: Iskaynin mosqokusqaykeqa ujlla kanku. Ajinamanta Diosmin imatachus ruwayta yuyashasqanta yachayta qoshasunki.

²⁶ Qanchis wira wakakunaqa qanchis watawan ninakun, kikillantataj niyta munan qanchis sumaj trigo umakunapis. Chay iskaynin mosqoykuna ujllata niyta munan.

²⁷ Wira wakakunaj qhepanta qanchis millay rajchi wakakuna llojsimojkunaqa qanchis watawan ninakullantaj, jinallataj ch'aki wayraj ch'akichisqan chay qanchis ch'usu trigo umapis. Chay niyta munan qanchis watata yarqhay kananta.

²⁸ Imachus kajllata qanman willashayki: Dios imatachus ruwananta qanman yachachishasunki.

²⁹ Tukuy Egipto suyupi qanchis watata chajra sumajta poqonqa.

³⁰ Chantá chay qhepata qanchis watatataj mana mikhuna kanqachu. Chaypacha ñawpajta ashkha mikhuna kasqanta ni pipis yuyarikonqachu. Ajinata yarqhayqa tukuy Egipto suyupi tiyakojkunata ñak'arichenqa.

³¹ Yarqhayqa anchapuni kanqa, chayraykutaj ñawpajta ashkha mikhuna kasqanmanta mana pipis yuyarenqachu.

³² Qan iskay kutita kikillantapuni mosqokusqaykeqa niyta munan Dios imatachus nisqanta ruwanantapuni. Arí, imatachus nisqanta usqhayllata ruwanqa.

³³ Chayrayku kuraj kamachejníy, chay yarqhay watakuna jamusqanrayku allin kanman allin yuyayniyoj, yachayniyoj runata mask'anayki, chantá Egipto suyuta kamachinanpaj churanayki.

³⁴ Jinataj kaytawan ruwawaj: Kamachejkunata churallawajtaj, paykuna tukuy Egiptopi qanchis watata chajra sumajta poqosqanmanta phishqaman t'aqaspa, ujta tantanankupaj.

³⁵ Jamoj sumaj watakunapi trigota tantachunku. Chantá qanpa rikunaykita llajtakunapi pirwachunku, yarqhay watapi tukuy runapaj mikhuna kananpaj.

³⁶ Pirwasqanku trigo tukuy Egipto suyupaj kanqa, qanchis wata yarqhaypi runakuna ama yarqhaywan wañunankupaj, nispa.

José Egipto suyupi kamachin

³⁷ Ajinaqa faraonman, jinallataj yanapajkunamanpis Josejpa yuyaychasqan allin rijch'arqa.

³⁸ Chantá faraón nerqa: Joseta jina Diospa espiritunwan kaj runataqa mana maypipis tarisunmanchu, nispa.

³⁹ Chantá faraonqa Joseta nerqa: Mana pipis qan jina sumaj yuyayniyoj, yachayniyoj runaqa kanchu. Kay tukuy imachus kananmanta Diosllamin qanman yachachisunki.

⁴⁰ Chayrayku qanmin kamachinay wasipi imachus ruwanata kamachiy ari, tukuytaj qanpa kamachisqaykita kasusonqanku. Noqalla qanmanta aswan kuraj kasaj, imaraykuchus noqaqa kuraj kamachej kani.

⁴¹ Noqaqa qanta tukuy Egipto suyuta kamachinaykipaj churayki, nispa.

⁴² Jinata niytawantaj, faraonqa selloyoj anillonta makinmanta orqhokuytawan, Josejpa makinman churaykorqa. Chaymantataj sumaj linomanta ruwasqa p'achata churanankuta kamacherqa. Jinaspataj, Josejpa kunkanman qorimanta ruwasqa walqatapis churaykucherqa.

⁴³ Chaymantataj faraonqa Joseta iskay kaj carretanman wicharicherqa. Chantá faraón kamachinkunata kamacherqa Joséj ñawpaqenta qhaparispa, rinankuta: Qonqorikuychej, nispa. Ajinata Joseqa Egipto suyuta kamachinanpaj churasqa karqa.

⁴⁴ Faraontaj Joseta nerqa: Noqa faraón kani. Chaywanpis kay tukuynin Egipto suyupeqa kamachejtillayki runakuna imatapis ruwanqanku.

⁴⁵ Chantá faraón Joseta “Safenat Paneaj”, nispa suticharqa. Chaymantataj payta On llajtamanta sacerdote Potiferaj ususin Asenatwan casaracherqa. Chay qhepatataj José tukuy Egipto suyuta muyurimorqa.

⁴⁶ Maypachachus Joseta Egiptopi kuraj kamachejman pusarqanku chaypacha, pay kinsa chunka watayoj karqa. Chantá Joseqa faraonpa ñawpaqenmanta llojsispa, tukuy Egipto suyuta purimuyta qallarerqa.

⁴⁷ Jinataj chay qanchis sumaj watapi chajraqa manchay sumajta poqorqa.

⁴⁸ Chay sumaj watapi tukuy Egipto suyupi chajra poqojta José waqaychacherqa. Sapa llajtapi muyuyninpi poqojta pirwacherqa.

⁴⁹ Joseqa mama qocha kantupi jina t'iyu chhikatapuni trigota oqharerqa. Chay chhika trigota manaña tupuspachu jap'ej, jinallataña pirwachej, ashkha kasqanrayku.

⁵⁰ Manaraj chay yarqhay wata chayamushajtin, Josejta Asenat warminpi iskayña churinkuna karqanku. Asenatqa On llajtapi sacerdote Potiferaj ususin karqa.

⁵¹ José kuraj kaj wawanta “Manasés” sutiwan suticharqa, imaraykuchus nerqa: Dios tukuy llakiyniyta, aylluytawan qonqachiwan, nispa.

⁵² Sullk'a kajtataj “Efraín” sutiwan suticharqa, imaraykuchus nerqa: Diosqa llakiywan ñak'arisqay llajtapi wawa rejsinayta munan, nispa.

⁵³ Ajinata qanchis sumaj wata kanan Egiptopi junt'akorqa.

⁵⁴ Josejpa nisqanman jinataj, qanchis yarqhay wata qallarerqa. Tukuy waj suyukunapipis yarqhay kallarqataj. Chaywanpis Egiptollapi mana yarqhay karqachu, imajtinchus mikhuna kallarqa.

⁵⁵ Egiptopi mikhuymanta pisiyta qallarerqanku chaypacha, llajtayojkuna mikhunata mañakoj faraonman rerqanku. Faraontaj nerqa: Rispa, Josemanta mañakamuychej, ruwaychejtaj paypa nisqanta, nispa.

⁵⁶ Tukuy suyupi manaña mikhuna kajtin, Joseqa trigo pirwakunata kicharerqa, Egipto llajtayojkunaman trigota vendenanpaj, imaraykuchus mikhunamanta pisichikuy astawan astawan kasharqa.

⁵⁷ Tukuy waj suyukunamantapis Egiptoman Josemanta trigota rantikoj jamullarqankutaj, imaraykuchus ni mayqen suyupi mikhuna karqañachu.