Génesis 40 - DIOSPA QHELQACHISQAN DEUTEROCANONICAL

José mosqoykunata sut'inchan

¹ Chaymanta qhepata kuraj kamachej faraonman vinota jaywaj runa, jinallataj t'anta ruwaj runa ima Egipto suyuta kuraj kamachejta phiñacherqanku.

² Chayrayku kuraj kamachej faraonqa iskayninkupaj phiñakorqa. Ujnenqa vinota jaywajkunaj kamachejnin, ujnintaj t'antata ruwajkunaj kamachejnin karqa.

³ Paykunata jap'ichispataj, faraonqa qhawaj soldadokunaj capitanpa wasinman apacherqa, maypichus cárcel karqa, chayman. Chayllapitaj Josepis kasharqa.

⁴ Jinapi capitanqa Joseta nerqa chay iskay presokunata qhawananta, mikhunankuta maychus kajta jaywaspa. Paykunataj unaytaña carcelpi wisq'asqa kasharqanku.

⁵ Chantá uj ch'isi, Egiptopi kuraj kamachejman vinota jaywaj, chantá t'antata ruwaj ima mosqokorqanku, sapa mosqokusqankutaj uj imata niyta munarqa.

⁶ Chantá José presokunata tutamanta watukuspa, rikorqa llakisqa kashasqankuta.

⁷ Chayrayku payqa patronninpa wasinpi preso masinkunata taporqa: Imamantá llakisqa kashankichejri? nispa.

⁸ Paykunataj kuticherqanku: Sapa ujniyku mosqokuyku, manataj pipis kanchu mosqokusqayku imatachus niyta munasqanta sut'inchanawaykupaj, nispa. Jinapi José nerqa: Dioslla mosqokusqaykichejta sut'inchayta atin. Imatachus mosqokusqaykichejta willariwaychej ari, nispa.

⁹ Chantá vinota jaywajkunaj kamachejnin mosqokusqanta Joseman willarqa: Mosqoyniypi uva sach'ata rikorqani.

¹⁰ Chay uva sach'aqa kinsa k'ajllayoj kasqa. Chaytaj ijispa, t'ikashasqa, chantá sumaj poqosqa uva chhullchuman tukusqa.

¹¹ Noqa faraonpa copanta jap'ishasqani. Uvata jap'ispataj, copaman ch'irwashasqani. Chaymantataj noqa kikiy copata faraonman jaywasqani, nispa.

¹² Chantá José nerqa: Imatachus mosqokusqaykeqa kayta niyta munan: Kinsa k'ajllaqa kinsa p'unchaywan ninakun.

¹³ Chay niyta munan kinsa p'unchaymantawan faraonqa qanta qhespichisunanta, chantá imachus ruwanaykiman kutiykuchisunanta. Jinamanta ujtawan faraonman vinota jaywanki, imaynatachus ñawpajta jaywaj kanki, ajinallatataj.

¹⁴ Ajinaqa, noqamanta yuyarikuwanki. Khuyarikuwaspa, faraonman noqamanta parlaripuwanki, kaymanta orqhopunawanpaj.

¹⁵ Noqataqa hebreokunaj llajtankumanta mana munashajta apamuwarqanku. Noqarí carcelpi kanaypaj jinaqa mana ima millaytapis ruwarqanichu, nispa.

¹⁶ Chantá José allinpaj sut'inchasqanta rikuspa, t'antata ruwajkunaj kamachejninñataj mosqokusqanta willarikorqa: Noqapis mosqoyniypi rikorqani kinsa canastapi yuraj t'anta umay patapi kashajta.

¹⁷ Patan kajpi imaymana t'anta faraonpaj kasqa. P'isqokunatajrí jamuspa, umay patapi canastamanta t'antata mikhushasqanku, nispa.

¹⁸ Josetaj nerqa: Qanpa mosqokusqaykeqa kayta niyta munan: Kinsa canastaqa kinsa p'unchaywan ninakun.

¹⁹ Chay niyta munan kinsa p'unchayninman jina faraonqa umaykita qholuchispa, sach'aman warkhuchisunanta, suwintukunataj aychaykita mikhonqanku, nispa.

²⁰ Jinataj karqa. Kinsa p'unchayman jina faraonpa wata junt'aynin karqa, chayraykutaj pay jatun raymita ruwarqa. Chaymantaj tukuy yanapajninkunata, yuyaychajkunatawan ima wajyarqa. Chantá paykunaj rikunanta, vinota jaywajkunaj kamachejninkuta, jinallataj t'antata ruwajkunaj kamachejninkutawan carcelmanta orqhochimorqa.

²¹ Jinaspataj, vinota jaywajkunaj kamachejninkuta ruwananman kutiykuchiporqa. Jinamantataj pay ñawpajta jina faraonman vinota jaywarqa.

²² T'anta ruwajkunaj kamachejninkutarí faraón sipicherqa. Ajinata Joséj sut'inchasqan junt'akorqa.

²³ Chaywanpis vinota jaywajkunaj kamachejninkoqa Josemanta mana yuyarikorqachu.