Génesis 34 - DIOSPA QHELQACHISQAN DEUTEROCANONICAL

Dinaj honran t'akasqa

¹ Uj kuti Jacobpa Lea warminpi rejsisqan warmi wawan Dinaqa chay llajtayoj sipaskunata waturikoj rerqa.

² Chantá Sichem Dinata rikuspa, mana munashajtin paywan puñuykorqa. Sichemqa heveo llajtayoj Jamorpa churin karqa. Paytaj chay llajtapi kamachej karqa.

³ Chaywanpis Sichempa sonqonman Dina yaykusqanrayku, payta anchatataj munakorqa. Chayrayku Dinaj sonqonta suwayta munaspa, atisqanta ruwarqa.

⁴ Jinapi Sichemqa tatan Jamorta nerqa: Mañaqampuway chay sipasta, imaraykuchus paywan casarayta munani, nispa.

⁵ Jacobqa ususin Dinata Sichem alqochasqanta yacharqa. Churinkuna uywata michishasqankuraykutaj, chayamunankukama mana imatapis nerqachu.

⁶ Chaykamataj Sichempa tatan Jamorqa Jacobwan parlananpaj rerqa.

⁷ Chantá Jacobpa churinkuna uywata michimusqankumanta chayamuspa, Dinawan imachus pasasqanta yacharqanku. Chaymantataj manchayta phiñakorqanku, imaraykuchus Sichem Jacobpa ususinta alqochasqanqa Israel ayllupaj manchay p'enqay karqa. Sichem chayta mana ruwananchu karqa.

⁸ Chaywanpis Jamor paykunata nerqa: Churiy Sichem may jinatapuni panaykichejta munakun. Chayrayku ari, churiy paywan casarananta ama jark'akuychejchu.

⁹ Ajinata qankuna noqaykuwan aylluchakunkichej. Noqayku ususiykichejwan casarasqayku, qankunataj ususiykuwan casarankichej.

¹⁰ Noqaykuwan tiyakuychej, imajtinchus llajtaykupi jallp'aqa ashkha tiyan. Chayrayku maypichá munasqaykichejpi wasichakuychej. Qhatuychej, jallp'atapis rantikuychej, nispa.

¹¹ Sichempis Dinaj tatan Jacobta, chantá turankunatawan ima nerqa: Ama jina kaspa, uyarillawaychej ari. Noqaqa imatachá niwasqaykichejta qosqaykichej.

¹² Mashkhatachus niwasqaykichejtapis qollasqaykichejtaj. Panaykichejwan casarachillawaychej ari, nispa.

¹³ Chaywanpis pananku Dinaj honranta Sichem t'akasqanrayku, Jacobpa churinkunaqa payman, jinataj tatan Jamorman llullakorqanku.

¹⁴ Paykuna nerqanku: Noqaykoqa panaykuta mana circuncidasqa runawan mana casarachiykumanchu. Chayqa noqaykupaj ancha p'enqay kanman.

¹⁵ Kayta ruwajtillaykichej, panaykuwan casarachiyta atiykuman: Qankuna noqayku jina kanaykichej tiyan. Chay niyta munan qankuna ukhupi tukuy qhari circuncidasqa kanankuta.

¹⁶ Chaymantaraj ususiykuwan casarayta atinkichej, jinallataj noqaykupis ususiykichejwan casarayta atisqayku. Jinaspataj, qankunawan khuska tiyakusqayku, ujllamantaj tukupusunchej.

¹⁷ Sichus mana circuncidakuyta munankichejchu chayrí, noqayku kaymanta ripuspa, panaykutapis pusakapusqayku, nispa.

¹⁸ Chaypacha Jamorman, chantá churin Sichemman, Jacobpa churinkuna imatachus nisqanku allin rijch'arqa. Chayrayku paykuna nerqanku Jacobpa churinkuna imatachus nisqankuta ruwanankuta.

¹⁹ Chantá Sichemqa usqhayllata circuncidachikorqa, imaraykuchus Jacobpa ususinta anchatapuni munakorqa. Chantapis Sichemqa llajtanpi manchay respetowan qhawasqa runa karqa.

²⁰ Chaymanta paywan, tatan Jamorwan ima llajtaman yaykuna punkuman rerqanku, maypichus runakuna tukuy ima rantinamanta, vendenamantawan parlaj kanku, chayman. Chaypitaj llajtayojkunaman nerqanku:

²¹ Kay runakunaqa noqanchejwan manchay k'acha kanku. Paykuna noqanchejwan tiyakonqanku. Jinallataj rantiyta, qhatuytapis atenqanku, imajtinchus llajtanchejpi jallp'aqa jinantin kakushan. Chantapis noqanchej ususinkukunawan casarakuyta atisunchej, jinallataj paykunapis ususinchejkunawan casarakonqanku.

²² Uj llajtayojlla kananchejpajrí, ninku noqanchejpis paykuna jina kananchejta. Noqanchej ukhupi tukuy qhari circuncidakunanchej tiyan, paykunaj usunkuman jina.

²³ Ajinata ruwajtinchej, tukuy kapuyninku, chantá uywanku ima noqanchejpata kanqa. Noqanchejqa nisqankuta kasunalla, chantá paykuna noqanchejwan tiyakonqanku, nispa.

²⁴ Jinapi llajta punkupi tukuy tantakojkuna Jamorta, churin Sichemtawan kasuspa, tukuyninku circuncidachikorqanku.

²⁵ Chaywanpis kinsa p'unchayninman jina, Dinaj turankuna Jacobpa churinkuna Simeón, chantá Leví ima llajtaman rispa, tukuy qharita wañuracherqanku. Chay qharikuna circuncidachikusqankumanta nanasqa kasqankurayku, mana pipis paykunaman sayaykoj karqachu.

²⁶ Jamorta, jinataj churin Sichemtapis espadawan wañuchillarqankutaj. Jinaspataj, Dinata Sichempa wasinmanta orqhomuspa, riporqanku.

²⁷ Chantá Jacobpa wakin churinkuna riytawan, wañusqakunaj patanta pasaspa, llajtaman yaykorqanku. Jinaspataj, tukuy imankuta apakaporqanku. Chayta ruwarqanku panankoj honranta Sichem t'akasqanmanta.

²⁸ Ovejakunata, wakakunata, burrokunata ima llajtamanta, campomantawan apakaporqanku.

²⁹ Wasikunaman yaykuspataj, tukuy imankuta suwarqanku. Jinallataj warmikunata, wawakunatapis jap'ispa, wata runanku kanankupaj aparqanku.

³⁰ Jacobtajrí Simeonta, chantá Levitawan nerqa: Qankuna kayta ruwaspa, jatun uma nanayta qowankichej. Kaynejpi tukuy tiyakojkuna, cananeokuna, chantá ferezeokuna ima chejnikuwanqanku. Tantaykukuspataj, noqaj contrayta jamuykonqanku, pisi runayojta rikuwaspataj, noqata, aylluytawan wañuchiwanqanku, nispa.

³¹ Paykunatajrí kuticherqanku: Chantá panaykuta sajra purikoj warmita jina imatapis ruwallananchu karqa? nispa.