Génesis 3 - DIOSPA QHELQACHISQAN DEUTEROCANONICAL

Adanwan Evawan Diosta mana kasunkuchu

¹ Katareqa Tata Dios tukuy imaymana k'ita animalkunata ruwasqanmanta may jina yuyaysapa karqa. Chantá uj kuti payqa warmita taporqa: Huertapi kaj tukuy sach'aj poqoyninta ama mikhunkichejchu, nispachu Dios nisorqachej? nispa.

² Warmitaj kuticherqa: Mana. Huertapi kaj tukuy sach'aj poqoyninmanta mikhuyta atiyku.

³ Huerta chawpipi kaj sach'aj poqoynillanmanta Dios niwarqayku: Ama mikhunkichejchu, ni llankharillankichejpischu. Chaymantachus mikhunkichej chayqa, wañunkichej, nispa.

⁴ Kataritajrí warmita nerqa: Chayqa mana jinachu, mana wañunkichejchu.

⁵ Dios allinta yachan kay sach'aj poqoyninta mikhojtiykichej, ñawiykichej kicharikunanta. Chantá yachallantaj allin kajta, jinataj mana allin kajta yachaspa, Dios jina kanaykichejta, nispa.

⁶ Chantá warmeqa chay sach'aj poqoynin mikhunapaj sumaj kasqanta qhawarqa, jinaqa maytapuni mikhuyta munarerqa. Qhawallarqataj yachayniyoj kanapaj jina sumajllataj kasqanta. Jinaqa pay ujnin poqoyta p'itispa, mikhuykorqa. Qosanmanpis jaywarqa, paypis mikhullarqataj.

⁷ Paykuna mikhusqankutawankamataj, sut'ita qhawarqanku, reparakorqankutaj q'alalla kashasqankuta. Chayrayku higo laqhemanta qhatanata sirakuspa, chaywan mayt'uykukorqanku.

⁸ Chantá inti yaykuyta jina wayrarishajtin, qhari warmi huertapi Tata Diospa purishasqanta uyarerqanku. Paykunatajrí usqhay usqhayta huertapi sach'a ukhuman pakaykukorqanku.

⁹ Jinapi Tata Diosqa qharita wajyarqa: Maypitaj kashankiri? nispa.

¹⁰ Qharitaj kuticherqa: Huerta ukhupi purishasqaykita uyarerqayki, manchachikorqanitaj q'alalla kasqayrayku. Chayrayku pakaykukorqani, nispa.

¹¹ Chantá Tata Dios taporqa: Q'alalla kasqaykita, pitaj nerqasunkiri? Mana mikhunaykita nerqayki, chay sach'aj poqoynintachu mikhorqanki? nispa.

¹² Qharitaj kuticherqa: Yanapanawanpaj qowasqayki warmi chay sach'aj poqoyninmanta qowarqa, noqataj mikhorqani, nispa.

¹³ Chantá Tata Diosqa warmita taporqa: Imatataj ruwarqankiri? nispa. Paytaj kuticherqa: Katari q'otiyawarqa, chayrayku mikhorqani, nispa.

¹⁴ Chantá Tata Diosqa katarita nerqa: Chayta ruwasqaykirayku tukuy uywakuna ukhupi, tukuy k'ita animalkuna ukhupipis maldicisqa kanki. Kunanmanta jaqayman kawsanayki p'unchaykama wijsamanta suchuspa purinki, jallp'atataj mikhunki.

¹⁵ Noqataj qantawan, warmitawan jap'inachisqaykichej. Jinallataj mirayniykiwan, mirayninwanpis chejninakonqanku. Warmej mirayninmanta kajqa umaykita sarusonqa, qantaj chaki talonninmanta khaninki, nispa. Ajinata Diosqa katarita nerqa.

¹⁶ Chantá Tata Diosqa warmita nerqa: Onqoj kashaspa, sinch'i nanayta ñak'arinki, may jina nanaywantaj wawaykikunata paqarichikunki. Chaywanpis sonqoykeqa qosaykiman aysasonqa, paytajrí qanta kamachisonqa, nispa.

¹⁷ Chantá Tata Dios qharitañataj nerqa: Warmiykita kasuspa, mana mikhunaykita nerqayki chay sach'aj poqoyninmanta mikhusqaykirayku, kunanqa jallp'a maldicisqa kanqa. Chayrayku kawsanaykikama sayk'uy sayk'uyta llank'aspa mikhunki.

¹⁸ Jallp'aqa khishkallata, qhorallata wiñachipusonqa, qantaj campopi wiñaj qhorata mikhunki.

¹⁹ Mikhunaykipaj jump'i suruyta llank'anayki kanqa, wañupunayki p'unchaykamataj ajina kanqa. Qanqa jallp'amanta ruwasqa kanki, chayrayku jallp'allamantaj kutinki, nispa.

²⁰ Chaymanta qhareqa warminta “Eva” sutiwan suticharqa, imaraykuchus payqa tukuy runaj maman kanan karqa.

²¹ Tata Diostaj qharipaj warmipajwan uywakunaj qaranmanta p'achata ruwaporqa, jinaspataj, paykunata p'achallicherqa.

²² Chantá Tata Dios nerqa: Runaqa allin kajta mana allin kajta yachaspa, noqanchej jinaman tukun. Sichus kawsachej sach'aj poqoyninmanta mikhullanmantaj chayqa, wiñaypaj kawsayta atinman, nispa.

²³ Chayrayku Tata Diosqa runata Edén huertamanta qharqorqa, churarqataj jallp'ata llank'ananpaj, jallp'amanta ruwasqa kasqanrayku.

²⁴ Chantá runata qharqospa, Tata Diosqa Edén huertaj inti llojsimuynejman querubinkunata churarqa. Jinallataj uj lawrashaj espadatawan churallarqataj, muyuyninta muyuspa jark'ananpaj amapuni pipis kawsachej sach'aman qayllaykunanpaj.