Génesis 28 - DIOSPA QHELQACHISQAN DEUTEROCANONICAL

¹ Chaymanta Isaacqa Jacobta wajyacherqa. Chantá saminchaykuspataj, payta kamacherqa: Qanqa amapuni Canaán llajtayoj warmiwan warmichakunkichu.

² Manachayqa Padán Aramman riy jatun tatayki Betuelpa wasinman, chaypitaj tioyki Labanpa ujnin kaj ususinwan casaranki.

³ Tukuy Atiyniyoj Dios saminchaspa may chhikatapuni mirachisuchun. Munallanitaj qanqa may jina ashkha runayoj jatun suyuman tukunaykita.

⁴ Tata Dios Abrahamta saminchasqanta qanman, chantá mirayniykiman ima qosuchun. Ajinamanta maypichus waj llajtayoj jina tiyakushanchej, kay jallp'amanta dueño kanki, mayqentachus Dios Abrahamman qonanta nerqa, chaymanta nispa.

⁵ Ajinata Isaacqa churin Jacobta Padán Aramman kacharpayarqa Betuelpa churin Labanpa wasinman rinanpaj. Betuelqa Rebecaj tatan karqa, Rebecataj Esaujta, Jacobpatawan mamanku karqa.

Esaú warmichakun

⁶ Esaú yacharqa tatan Isaacqa Jacobta saminchaspa, Padán Aramman kachasqanta, chaypi warmita mask'akuspa casarananpaj. Chantá Esaú yachallarqataj tatanqa Jacobta saminchashaspa, nisqanta Canaán llajtayoj warmita amapuni oqharikunanta.

⁷ Yachallarqataj Jacobqa tatanpa, chantá mamanpa nisqanta kasuspa, Padán Aramman risqanta.

⁸ Chayta yachaspa, Esaú repararqa tatan Isaac Canaán llajtayoj warmikunata mana allin ñawiwanchu qhawasqanta.

⁹ Chayrayku Esauqa Abrahampa churin Ismaelpaman rispa, ususin Majalatwan warmichakorqa. Majalatqa Nebayotpa panan karqa. Esaú Canaán llajtamanta iskay warmiyoj kashaspapis, Majalatta warminpaj oqharikullarqataj.

Diosqa Betelpi Jacobman rikhurin

¹⁰ Jacobqa Bersebamanta puririspa, Jaranman rej ñanta rerqa.

¹¹ Tutayaykushajtinña, uj cheqaman chayaspa, chaypi uj rumita sawnaykukuspa, puñorqa.

¹² Chantá puñushaspa, mosqokorqa, mosqokusqanpitaj uj escalerata rikorqa pampamanta janaj pachakama chayashajta. Pay rikullarqataj chay escaleranejta Diospa angelninkuna urayk'amushajta, wicharishajta ima.

¹³ Jinallataj Jacob rikorqa paypa ñawpaqenpi Tata Dios sayaspa, nishajta: Noqa Tata Dios kani, jatun tatayki Abrahampata chantá tatayki Isaacpatawan Diosnin. Maypichus puñushanki, chay jallp'ata qanman qosqayki, jinallataj mirayniykimanpis.

¹⁴ Mirayniykeqa t'iyu jina mana yupay atina kanqa, paykunataj wichaynejman, uranejman, inti llojsimuynejman, inti yaykuynejman ima junt'aykonqanku. Qannejta, jinallataj mirayniykinejtapis kay pachapi tukuy runakuna saminchasqa kanqanku.

¹⁵ Noqa qanwan kashani. Maymanpis rejtiyki, noqa waqaychasqayki, kutichimusqaykitaj kay jallp'aman. Mana saqerparisqaykichu, qanman imatachus nisqayta junt'anaykama, nispa.

¹⁶ Chantá Jacob puñusqanmanta rijch'arispa, nerqa: Cheqapuni Tata Dios kaypi kashan, noqataj mana yacharqanichu, nispa.

¹⁷ Anchatataj manchachikuspa, nillarqataj: Kay cheqaqa mancharina. Kayqa Diospa wasin, janaj pacha punkutaj, nispa.

¹⁸ Q'ayantin Jacob tutamanta jatarispa, maypichus sawnakorqa, chay rumita cheqanta sayaykucherqa. Chantá rumiman aceiteta jich'aspa, Diospaj t'aqarqa.

¹⁹ Unay chay cheqaqa Luz sutiyoj karqa. Jacobtaj chay cheqata suticharqa: “Betel”, nispa.

²⁰ Chantá Jacob tiluspa, ajinata Tata Diosta nerqa: Tata Dios, sichus noqawan kaspa, tukuy riyniypi waqaychawanki, jinallataj mikhunata, p'achatawan ima qowanki chayqa,

²¹ sitajchus tataypa wasinman allillanta kutipusaj chayqa, Tata Dios, qanqa noqaj Diosniy kanki.

²² Diosníy, kay sayachisqay rumeqa qanta yupaychana cheqa kanqa. Chantá tukuy ima qowasqaykimanta sapa chunkamanta ujta qanman qosqayki, nispa.