Génesis 24 - DIOSPA QHELQACHISQAN DEUTEROCANONICAL

Isaac Rebecawan casaran

¹ Abraham allin machuña karqa, Tata Diostaj payta tukuy imapi yanaparqa.

² Uj kuti pay kamachinkunamanta aswan machu kaj mayordomonta wajyaspa, nerqa: Makiykita khapayman churay.

³ Jinaspataj, janaj pachapi, kay pachapipis Tata Diosrayku tiluy ari, noqa maypichus tiyakushani kay Canaanpi kaj warmikunawan amapuni churiyta casarachinaykita.

⁴ Manachayqa llajtayman rispa, aylluy ukhumanta uj warmita churiy Isaacpaj pusamunki, nispa.

⁵ Abrahampa kamachintaj kuticherqa: Warmi mana jamuyta munajtinrí, imanasajtajri? Llojsimorqanki, chay suyumanchu churiykita pusasaj? nispa.

⁶ Abrahamtajrí nerqa: Amapuni churiytaqa jaqayman pusankichu.

⁷ Janaj pachapi kaj Tata Dios llajtaymanta, tataypa wasinmanta ima orqhomuwaspa, tiluwarqa: Kay jallp'ata mirayniykiman qosaj, nispa. Chayrayku paymin angelninta ñawpaqeykita kachanqa, churiypaj warmita pusamuyta yanapasunanpaj.

⁸ Sichus chay warmi qanwan mana jamuyta munanmanchu chayrí, tilusqaykimanta qan mana juchayojchu kanki. Jina kajtinpis, amapuni churiyta jaqayman pusankichu, nispa.

⁹ Chantá kamacheqa makinta Abrahampata khapanman churaspa, tilorqa patronnin Abrahampa nisqanta junt'ananta.

¹⁰ Chantá patronninpa tiyapuyninmanta sumajninta ajllaspa, chunka camellokunaman chajnaykorqa. Jinaspataj, Mesopotamia cheqapi Najorpa llajtanman purirerqa.

¹¹ Kamacheqa unayta purispa, inti yaykushajtinña llajta kantuman chayarqa. Chantá camellokunata pujyu kantupi samaricherqa. Chay karqa warmikuna yakuta apamoj rinanku phanita.

¹² Chantá kamacheqa Diosmanta mañarikorqa: Tata Dios, patronniy Abrahampata Diosnin, mañarikuyki allin rinawanpaj yanapanawaykita. Patronniyta khuyaspa, k'acha kasqaykita rejsichikuy ari.

¹³ Noqa kay pujyu kantupi suyasaj, kay llajtayoj sipaskuna yakuman jamunankuta.

¹⁴ Chantá paykunamanta ujninta nisaj: Ama jina kaspa, p'uñuykita urayk'uchikuy, yakuta ujyanaypaj, nispa. Sichus pay p'uñunta urayk'uchikuspa, niwanqa: Kayqa, ujyarikuy, camelloykikunamanpis ujyarichipusqayki, nispa chayqa, chay kachun kamachiyki Isaacpaj ajllasqayki warmi. Ajinapi yachasaj qan patronniyta khuyakusqaykita, nispa.

¹⁵ Kamachi manaraj Diosmanta mañakuyta tukushajtin, uj sipas p'uñu lijrarisqa yakuman jamorqa. Payqa Rebeca karqa, Betuelpa ususin. Betuelqa Milcajta, Najorpatawan churin karqa. Najortajrí Abrahampata wawqen karqa.

¹⁶ Rebecaqa manchay k'achita karqa, chantapis manaraj qharita rejsej. Paytaj pujyuman urayk'uspa, p'uñunman yakuta junt'achiytawan kutipusharqa.

¹⁷ Jinapi Abrahampa kamachin usqhayta sayarispa, taripaj phawarqa. Chantá nerqa: Sipas, ama jinachu kay, ujyanaypaj p'uñuykimanta uj chhika yakuta qoriway, nispa.

¹⁸ Rebecataj kuticherqa: Imarayku mana. Ujyarikuy, wiraqochi, nispa. Chantá usqhayta p'uñunta urayk'uchispa, ujyacherqa.

¹⁹ Kamachi ujyayta tukojtintaj, sipas nerqa: Camelloykikunapajpis yakuta orqhopusqayki sajsakunankukama ujyanankupaj, nispa.

²⁰ Usqhayta rispataj, rumi bateaman yakuta jich'arqa. Chantá ashkha kutita pujyuman yaykuspa, yakuta orqhomorqa, tukuynin camellokuna ujyanankukama.

²¹ Chaykama kamacheqa ch'inllamanta qhawasharqa, imaraykuchus pay allinta yachayta munarqa, puriyninpi Tata Dios yanapanqachus manachus, chayta.

²² Camellokuna yakuta ujyayta tukojtinkutaj, kamacheqa uj qori anillota sipaspa senqanman churarqa. Chay anillo sojta gramoyoj jina karqa. Chantá qorimanta iskay brazaleteta sipaspa makinman churallarqataj, chaytaj pachaj gramoyoj jina karqa.

²³ Chaymantataj Abrahampa kamachin nerqa: Ama jina kaspa, willaway ari. Pejpa ususintaj kankiri? Tatayki wasinman kunan ch'isi wajyarikuwaykumanchu? nispa.

²⁴ Chantá sipaku nerqa: Noqaqa Betuelpa ususin kani, Milcajta Najorpatawan allchhin.

²⁵ Wasiykupeqa camellokunapaj ashkha paja, chantá q'achu ima tiyan. Puñunaykichejpajpis campo kallantaj, nispa.

²⁶ Chantá kamacheqa qonqoriykukuspa, Tata Diosta kay jinata yupaycharqa:

²⁷ Patronniy Abrahampata Tata Diosnin, yupaychasqa kay, imajtinchus qanqa patronniywan k'acha karqanki, jinataj nisqaykita junt'anki. Qanllamin ayllunpa wasinman pusamuwarqanki, nispa.

²⁸ Chantá sipasqa usqhay usqhayta wasinman rispa, imachus kasqanta mamanman willarqa.

²⁹ Rebecajta uj turan Labán sutiyoj karqa. Paytaj chay runata taripaj yaku pujyuman phawarqa,

³⁰ imaraykuchus Labanqa panan anillota, brazaleteta ima makinpi apaykachashajta rikusqa. Chantá chay runa pananta imatachus nisqanta uyarillasqataj. Chayrayku Labanqa Abrahampa kamachinta mask'aj rispa, camellonkunawan pujyu chaypi kashajta tariparqa.

³¹ Nerqataj: Jamuy ari, Tata Diospa saminchasqan, ama kayllapi kakuychu. Wasitapis k'uchunchaykuña. Camelloykikuna puñunankupajpis tiyanña, nispa.

³² Chantá kamacheqa Labanpa wasinman rerqa. Labantaj Abrahampa kamachin wasinman chayajtinkama, camellokunamanta q'epita urayk'ucherqa. Jinaspataj, pajata, q'achutawan ima camellokunaman qararqa. Chaymantataj yakuta apamorqa Abrahampa kamachin, paywan jamojkuna ima chakinkuta mayllanankupaj.

³³ Chantá paykunaman mikhunata jaywarqanku. Chaywanpis Abrahampa kamachin nerqa: Mana mikhusajrajchu, imachus ninay kashan, chayta qankunaman manaraj nishaspaqa, nispa. Labantaj nerqa: Parlallay, nispa.

³⁴ Chantá kamachi nerqa: Noqaqa Abrahampa kamachin kani.

³⁵ Patronniy Abrahamqa manchay qhapaj, Tata Dios may jinata yanapasqanrayku. Tata Dios payman qon ovejakunata, wakakunata, qolqe metalta, qorita, qhari kamachikunata, warmi kamachikunata, camellokunata, chantá burrokunata ima.

³⁶ Jinallataj warmin Sarapis payayayninpi patronniypaj uj qhari wawata rejsin. Patronniytaj churin Isaacman tukuy kapuyninta saqeykonqa.

³⁷ Jinapi patronniy tiluchiwaspa, niwarqa: Maypichus tiyakushani, kay Canaán llajtayoj warmikunawan ama churiyta casarachinkichu.

³⁸ Aswanpis tataypa ayllunman rispa, chaymanta churiypaj warmita pusamunki, nispa.

³⁹ Noqataj nerqani: Wiraqochíy, sichus warmi noqawan mana jamuyta munanmanchu chayri? nispa.

⁴⁰ Paytaj niwarqa: Noqaqa Tata Diosta kasuspa purini. Chayrayku paymin angelninta qanta yanapasunanpaj kachamonqa, kay risqaykipi allin risunanpaj. Qanqa aylluy ukhumanta churiypaj uj warmita pusamunki.

⁴¹ Aylluyman rejtiyki, sichus ususinkuta mana qoyta munankumanchu chayqa, chaypacha tilusqaykita mana junt'asqaykimanta mana juchayojchu kanki, nispa.

⁴² Chayrayku ari, kunan noqa pujyuman chayamuspa, Diosmanta kay jinata mañakorqani: Patronniy Abrahampata Tata Diosnin, mañarikuyki imamanchus jamusqaypi allin rinawanpaj yanapanawaykita.

⁴³ Kunan pujyu qayllapi kashani. Kay jina kachun: Noqa yakuman jamoj sipasta nisaj: Ama jinachu kay, p'uñuykimanta yakuta ujyanaypaj qoriway, nispa.

⁴⁴ Nejtiytaj, sichus chay sipaku niwanman: Kayqa, ujyarikuy, noqataj camelloykikuna ujyanankupajpis yakuta orqhopusqayki, nispa chayqa, chay kachun ari patronniypa churinpaj ajllapusqayki warmi, nispa.

⁴⁵ Manaraj Diosmanta mañakuyta tukushaspataj, Rebecata p'uñun jap'irisqa yakuman jamushajta rikorqani. Pujyumanta yakuta orqhospa kutimpushajtintaj, nerqani: Sipas, ujyanaypaj yakuykita qoriway, nispa.

⁴⁶ Paytaj usqhayllata p'uñunta urayk'uchispa, niwarqa: Kayqa yaku, ujyarikuy, camelloykikunatapis ujyarachipusqayki, nispa. Noqataj yakuta ujyarqani, Rebecataj camelloykunatapis ujyachipullawarqataj.

⁴⁷ Chantá Rebecata taporqani: Pejpa ususintaj kankiri? nispa. Paytaj niwarqa: Noqaqa Betuelpa ususin kani, Najorpata Milcajpatawan allchhin, nispa. Niwajtinkama, senqanman uj anillota churarqani, makinmantaj brazaleteta.

⁴⁸ Chantá qonqoriykukuspa, Tata Diosta yupaycharqani. Noqa patronniy Abrahampata Tata Diosninta jatuncharqani pay cheqanta pusamuwasqanmanta, patronniypa wawqenpa ususinta churin Isaacpaj pusanaypaj.

⁴⁹ Kunantaj sut'inta niwaychej ari, patronniypa mañakusqanta junt'ankichejchus manachus, chayta. Ajinamanta imatachus niwasqaykichejta yachaspa, noqa imatachus ruwanayta nisaj, nispa.

⁵⁰ Chantá Labanwan, Betuelwan ima kuticherqanku: Kayqa Tata Diosmantamin, chayrayku mana niykumanchu “arí”, nispa, nitaj “mana”, nispa.

⁵¹ Chayqa, ñawpaqeykipi Rebeca kashan, pusay ari. Tata Diospa nisqanman jina, patronniykej churinpa warmin kachun, nispa.

⁵² Chantá Abrahampata kamachin ajinata nejta uyarispa, pampakama k'umuykukorqa Tata Diosta yupaychananpaj.

⁵³ Chaymantataj qorimanta, qolqe metalmanta tukuy imata, p'achata ima q'epimanta orqhospa, Rebecaman jaywarqa. Jinallataj turanman, mamanman ima sumaj imakunata qollarqataj.

⁵⁴ Chaymantaraj Abrahampa kamachin chantá paywan khuska jamojkuna mikhorqanku, ujyarqanku ima. Chantá chay ch'isi chaypi puñukorqanku. Jinataj q'ayantin tutamanta jatarispa, kamachi nerqa: Kunanqa patronniypaman kachapuwayku, nispa.

⁵⁵ Rebecaj turan Labanrí nerqa: Rebeca noqaykuwan chunka p'unchaytawan karikullachunraj ari, nispa. Kikillantataj mamanpis nerqa.

⁵⁶ Kamachitajrí kuticherqa: Amaña jark'awaychejchu. Tata Diosqa imamanchus jamusqaypi allin rinawanpaj yanapawanña. Chayrayku patronniypa wasinman kachapullawaychejña, nispa.

⁵⁷ Paykunataj kuticherqanku: Sipasta wajyaspa, tapusqayku, pay ima nenqachus, nispa.

⁵⁸ Chantá Rebecata wajyaspa, taporqanku: Kay runawan rillaytañachu munanki? nispa. Paytaj kuticherqa: Arí, rillasajña, nispa.

⁵⁹ Jinata nejtin, Labanqa Rebecata, uywaqen warmitawan ima, jinataj Abrahampa kamachintawan, chantá paywan jamojkunatawan ima kacharpayaporqanku.

⁶⁰ Kacharpayapushaspataj, Rebecaj ayllunmanta kajkuna ajinata nispa, samincharqanku: Panayku, ashkha wawaj mamanku kay. Mirayniykimanta kajkunataj awqankukunata atipachunku, nispa.

⁶¹ Jinata nejtinkukama, Rebecaqa uywaqenwan ima camellokunaman wicharispa, Abrahampa kamachinpa qhepanta rerqanku. Ajinata Abrahampa kamachenqa Rebecata pusaspa kutiporqa.

⁶² Chaykama Isaacqa “Rikuwaj Kawsaj Diospa Pujyun”, nisqa pujyumanta kutimusqa, imaraykuchus payqa Néguev nisqa cheqanejpi tiyakusharqa.

⁶³ Jinapi Isaac ch'isiyayta puriykacharej llojsisqa. Qhawarispataj, camellokunata jamushajta rikorqa.

⁶⁴ Jinallataj Rebecapis qhawarispa, Isaacta rikorqa, jinaspataj camellomanta urayk'orqa.

⁶⁵ Chantá Abrahampa kamachinta taporqa: Kaynejman jamushan, chay runa pitajri? nispa. Kamachitaj kuticherqa: Payqa patronniy, nispa. Chantá Rebecaqa velowan suk'umpaykukorqa.

⁶⁶ Chaymanta kamacheqa imatachus ruwasqanmanta tukuyninta Isaacman willarqa.

⁶⁷ Chantá Isaacqa maman Saraj toldonman Rebecata pusaykorqa, paywantaj casarakorqa. Isaacqa Rebecata mayta munakorqa. Ajinata maman wañupusqanmanta sonqochakorqa.