Génesis 22 - DIOSPA QHELQACHISQAN DEUTEROCANONICAL

Abrahamqa Tata Diosta kasun

¹ Chaymanta qhepanejman Diosqa, Abraham kasukonqachus manachus chayta yachariyta munaspa, payta wajyarqa: Abraham, nispa. Paytaj kuticherqa: Kaypi kashani, nispa.

² Chantá Dios nerqa: Munasqa churiyki Isaacta pusariykukuspa, Moriah sutiyoj cheqanejman riy. Chayman chayaspataj, churiykita q'olachispa, noqaman jaywawanki, may orqopichus nisqayki, chaypi, nispa.

³ Jinapi Abraham q'ayantin tutamanta jatarispa, q'olachinapaj llant'ata burronman chajnaykorqa. Chantá iskay kamachinkunawan, churin Isaacwan ima rerqanku, maymanchus Dios rinankuta nerqa, chayman.

⁴ Kinsa p'unchayninman jinataj, Abraham maymanchus risharqa, chay cheqata karumanta rikorqa.

⁵ Chantá Abraham kamachinkunata nerqa: Qankunaqa kayllapi burrowan qhepakuychej. Noqataj churiywan jaqayman rispa, Diosta yupaychasqayku. Chaymantataj kutimpusqayku, nispa.

⁶ Ajinata niytawan, Abrahamqa, Diosman q'olachinankupaj apasharqanku, chay llant'ata Isaacman q'epiriykucherqa. Chantá cuchillota, ninata ima oqharikuspa, iskaynillanku chayman rerqanku.

⁷ Rishajtinkutaj, Isaac tatan Abrahamta nerqa: Tatáy, nispa. Paytaj nerqa: Imatá ninki, wawáy? nispa. Isaactaj nerqa: Llant'awan, ninawan tiyapuwanchej. Diosman q'olachinapaj cordero maytajri? nispa.

⁸ Abrahamtaj kuticherqa: Wawáy, Diosmin q'olachinanchejpaj corderota qowasunchej, nispa. Chantá iskayninku rillarqankupuni.

⁹ Maymanchus rinankuta Dios nisqa, chayman chayaspa, Abraham uj altarta Diospaj ruwarqa, chay patamantaj llant'ata tawqarqa. Chaymantataj Isaacta wataykuspa, altarpi llant'a pataman winkuykucherqa.

¹⁰ Abraham ñapis cuchillowan wawanpa kunkanta khuchunanpaj kashajtin,

¹¹ Tata Diospa angelnin janaj pachamanta nimorqa: Abraham, Abraham, nispa. Paytaj kuticherqa: Kaypi kashani, imata ninki? nispa.

¹² Angeltaj nerqa: Ama wawata ñak'aychu, nitaj imanaychu. Yachaniña qanqa noqata may jatun respetowan qhawawasqaykita, imaraykuchus munasqa churiykita qonawaykipaj mana mich'akorqankichu, nispa.

¹³ Chantá Abraham qhawarispa, sach'a ukhupi uj carnerota rikorqa wajranmanta ch'ipaykusqata. Chantá pay carnerota aysamuytawan ñak'aspa, churinpa cuentamanta altarpi q'olachispa Diosman jaywarqa.

¹⁴ Chaypacha Abraham chay cheqata suticharqa: “Tata Dios qonqa”, nispa. Chayrayku kunankama ninku: “Orqopi Tata Dios qonqa”, nispa.

¹⁵ Ujtawan Tata Diospa angelnin janaj pachamanta Abrahamta wajyaspa, nerqa:

¹⁶ Tata Dios nisunki: Munasqa churiykita qonawaykipaj mana mich'akuwasqaykimanta, noqa kikiyrayku tiluspa, niyki:

¹⁷ Noqaqa may jinata saminchasqayki. Mirayniykitaqa janajpi ch'askakunata jina may chhikata mirachisaj. Paykuna mama qocha kantupi t'iyu jina, yupay mana atina kanqanku, jinataj mirayniykeqa tukuy awqankukunata atipanqanku.

¹⁸ Nisusqayta kasuwasqaykiraykutaj noqa kay pachapi tukuy runata mirayniykinejta saminchasaj, nispa.

¹⁹ Chaymanta Abraham, maypichus kamachinkuna kasharqanku, chayman kutimorqa. Chaymantataj tukuyninku Bersebaman kutiporqanku, maypichus tiyakusharqanku, chayman.

Najorpata churinkuna

²⁰ Unaymanta Abraham uyarerqa wawqen Najorpa warmin Milcapis ashkha wawayoj kasqanta.

²¹ Kuraj kaj Uz karqa, qhepantaj Buz, chaypa qhepantaj Kemuel, paytaj Arampa tatan karqa.

²² Chaymanta kallarqankutaj: Quesed, Jazó, Pildas, Yidlaf, Betuel ima.

²³ Aswan qhepanejman Betuelqa Rebecaj tatan kanan karqa. Abrahampata wawqen Najorpa warmin Milcajta churinkuna pusaj karqanku.

²⁴ Jinallataj Najorta ujnin warmin Reumapi churinkuna kallarqankutaj. Paykuna karqanku: Teba, Gaján, Tajás, Macá ima.