Génesis 21 - DIOSPA QHELQACHISQAN DEUTEROCANONICAL

Isaacpa paqarisqan

¹ Tata Diosqa Saraman imatachus nisqanta junt'arqa.

² Chayrayku Sara onqoj rikhurispa, qosan Abrahampaj wawayoj karqa. Chaypacha Abrahamqa allin machuña karqa. Saratajrí wawayoj karqa, Dios mayk'ajchus wawayoj kananta nisqanman jina.

³ Chantá Abraham warmin Saraj paqarichikusqan wawata Isaac sutiwan suticharqa.

⁴ Diospa kamachisqanman jinataj, Abrahamqa pusaj p'unchayninman wawata circuncidarqa.

⁵ Abraham pachaj watayoj karqa wawan Isaac paqarishajtin.

⁶ Chantá Sara sonqonpi nerqa: Dios kusiymanta asichiwarqa. Wawayoj kasqayta tukuy yachajkunapis noqawan khuska kusikonqanku.

⁷ Pitaj Abrahamta ninman karqa paypa wawanta chuchuchinaytari? Chaywanpis chay jina machuyayninpi payman wawata rejsichiniraj, nispa.

Abrahamqa Agarta Ismaeltawan wijch'un

⁸ Isaac wiñarqa, januk'asqa kanan p'unchaytataj Abrahamqa jatun mikhuyta wayk'ucherqa.

⁹ Chaywanpis uj kuti Saraqa Agarpa churin Ismaelta rikorqa, wawan Isaacmanta asikushajta. Ismaelqa Abrahampata churin karqa Egipto llajtayoj Agarpi.

¹⁰ Chantá Sara Abrahamta nerqa: Chay kamachi warmita, wawantinta wasinchejmanta wijch'uy, imaraykuchus kay kamachi warmej wawanqa mana wawaywan khuska chayaqeta jap'inmanchu, nispa.

¹¹ Abraham chayta uyarispa, mayta llakikorqa, imaraykuchus Ismaelpis wawallantaj karqa.

¹² Diosrí Abrahamta nerqa: Wawayki Ismaelmanta, kamachiyki Agarmanta ima ama llakikuychu. Manachayqa warmiyki Saraj nisusqanta uyariy, imaraykuchus qanpa mirayniykeqa wawayki Isaacnejta kanqa.

¹³ Noqataj kamachiykej churintapis may ashkha runayoj suyuman tukuchillasajtaj, qanpa churiyki kasqanrayku, nispa.

¹⁴ Q'ayantin tutamanta Abraham qoqawita, uj qara botapi yakutawan Agarman qorqa. Chantá Agarman q'epiriykuchispa, wawan Ismaeltawan qopuspa, kacharpayaporqa. Chaymanta Agar riporqa, Berseba sutiyoj ch'innejtataj kaynejta, jaqaynejta purerqa, mana mayman chayakuyta atispa.

¹⁵ Apakusqanku yaku tukukapojtintaj, Agar churinta uj juch'uy sach'a uraman siriykucherqa.

¹⁶ Chantá karunejman rerqa, tiyaykukuspataj, sonqonpi nerqa: Waway wañojta ama rikusajchu, nispa. Wawataj waqayta qallarerqa.

¹⁷ Diosrí wawaj waqasqanta uyarerqa. Chayrayku janaj pachamanta uj ángel Agarta wajyaspa, nerqa: Imataj tiyan, Agar? Ama phutikuychu. Diosqa wawaj waqasqanta uyarin.

¹⁸ Sayarispa, wawaykita makinmanta pusay, imaraykuchus noqa paypa mirayninmanta ashkha runayoj suyuman tukuchisaj, nispa.

¹⁹ Chantá Diosqa Agarman uj yaku pujyuta rikucherqa. Paytaj riytawan, qara botanman yakuta junt'achispa, Ismaelman ujyacherqa.

²⁰ Ajinata Diosqa Ismaelta yanaparqa. Wawataj runayarqa, ch'innejkunapitaj tiyakorqa. Ismaelqa sumajta arcowan flechata kachariyta yacharqa.

²¹ Paytaj Parán nisqa ch'innejpi tiyakorqa, aswan qhepanejmantaj maman payta Egipto llajtayoj warmiwan casaracherqa.

Abrahamwan Abimelecwan tratota ruwanku

²² Chaypachallataj Abimelec, soldadonkunata kamachej Ficol ima Abrahamwan parlaj rerqanku: Yachayku Diosqa qanta tukuy ima ruwanaykipi yanapasusqanta.

²³ Chayrayku qanqa Diospa sutinpi tiluway ni ima mana allin kajta ruwanaykita noqata, ni wawaykunata, ni wawaykunaj wawankunatapis. Tilullaytaj ari allinta ruwanawaykita, noqa qanta imaynatachus ruwarqayki, ajinata. Jinallataj suyuypi tukuy tiyakojkunata allinta ruwanaykita tilullaytaj, pikunaj llajtankupichus tiyakushanki, chaykunata, nispa.

²⁴ Abrahamtaj kuticherqa: Ajina kanqa, Diospa ñawpaqenpi tiluni, nispa.

²⁵ Chaywanpis Abrahamqa Abimelecta yuyaricherqa paypa kamachinkuna Abrahampa kamachinkunamanta uj yaku pujyuta qhechusqankuta.

²⁶ Abimelectajrí nerqa: Kunankama chayta mana yacharqanichu. Qanpis chaymantaqa mana imatapis niwarqankichu. Pichus chayta ruwasqanta mana yachanichu, nispa.

²⁷ Chantá Abrahamqa Abimelecman ovejakunata, wakakunata qorqa, iskayninkutaj uj tratota ruwarqanku.

²⁸ Jinallataj Abrahamqa qanchis ovejakunata wajnejman t'aqarqa.

²⁹ Abimelectaj Abrahamta taporqa: Imapajtaj chay qanchis ovejakunata t'aqankiri? nispa.

³⁰ Abrahamtaj kuticherqa: Kay qanchis ovejata qoshayki, chaytaj noqa kay pujyuta ruwasqay yachakunanpaj kanqa, nispa.

³¹ Chayrayku chay cheqata “Berseba” sutiwan suticharqanku, imaraykuchus chaypi tiluspa, iskayninku tratota ruwarqanku.

³² Chantá Bersebapi tratota ruwaytawan Abimelecwan, soldadonkunata kamachej Ficolwan ima Filistea suyuman kutiporqanku.

³³ Abrahamtaj uj tamarindo sach'ata chaypi churarqa. Chantá Bersebapi Abrahamqa Wiñay Kawsayniyoj Tata Diosta yupaycharqa.

³⁴ Chantá Abraham Filistea suyupi unayta tiyakorqa.