Génesis 20 - DIOSPA QHELQACHISQAN DEUTEROCANONICAL

Abrahamwan Abimelecwan

¹ Abraham maypichus kasharqa, chaymanta Néguev chaynejman riporqa. Chantá Gerar llajtapi tiyakorqa. Chay llajtaqa Cadeswan Shurwan chawpinnejpi kashan.

² Chaypi kashaspataj, Abrahamqa warmin Saramanta nerqa: Payqa panaymin, nispa. Chayrayku Gerarmanta kuraj kamachej Abimelecqa Sarata wasinman pusachimorqa.

³ Chaywanpis Dios chay ch'isipacha Abimelecman mosqoypi rikhurispa, nerqa: Kunan qan wañunki, imajtinchus pi warmitachus pusachimunki, chayqa qosayojmin, nispa.

⁴ Abimelecrí manaraj Sarawan puñuykusqachu. Chayrayku payqa Diosta nerqa: Tukuyta Kamachej Diosníy, mana juchayoj runata wañuchillawajchu?

⁵ Kikin Abraham niwarqa Saraqa paypa panallan kasqanta. Sarapis nillawarqataj Abrahamqa turan kasqanta. Chayrayku mana sonqoy juchachawanchu, imajtinchus mana ni ima millayta ruwanichu, nispa.

⁶ Diostaj mosqoypi Abimelecman kuticherqa: Noqa yachani qan allin sonqowan chayta ruwasqaykita. Chayrayku paywan puñuykunaykita mana saqerqaykichu, ama contraypi juchallikunaykipaj.

⁷ Kunanqa chay warmita qosanman kutichipuy, imaraykuchus payqa noqamanta sut'inchajmin. Paytaj kawsanaykipaj qanrayku noqamanta mañapusonqa. Warmintachus mana kutichipunki chayrí, qan, chantá tukuy qanpata kajkuna ima wañunkichejpuni, nispa.

⁸ Q'ayantin Abimelecqa tutamanta sayarispa, tukuy kamachinkunata wajyarqa. Chantá Dios mosqoypi imatachus nisqanta paykunaman willarqa. Chayta uyarispa, tukuyninku mayta mancharikorqanku.

⁹ Chaymanta Abimelecqa Abrahamtañataj wajyachispa, nerqa: Imajtintaj kayta ruwawaykuri? Imata ruwaspataj sonqoykita nanacherqayki, noqata, jinataj runaykunata millayta juchallichinawaykupajri? Qanqa mana ruwanata noqawan ruwanki.

¹⁰ Imata yuyaspataj kayta ruwarqankiri? nispa. Ajinata Abimelecqa Abrahamta k'amerqa.

¹¹ Chantá Abraham kuticherqa: Noqa sonqoypi nerqani: Kay llajtapi Diosta mana may jatun respetowan qhawayta yachankuchu. Chayrayku warmiyta qhechunawankupaj wañuchiwankumanchari, nispa.

¹² Arí, Saraqa panaypuni kashanpis, tataypa ususin, mana mamaypa wawanchu. Ajina kasqanrayku noqa paywan casarakorqani.

¹³ Maypachachus Dios llajtaymanta ripunayta kamachiwarqa chaypacha, noqa warmiyta nerqani: Maymanchá chayasunchej, chaypi qan ninki: Payqa turaymin, nispa.

¹⁴ Chantá Abimelecqa Abrahamman warmin Sarata kutichiporqa. Chantá payman qollarqataj ovejakunata, wakakunata, qhari kamachikunata, warmi kamachikunata ima.

¹⁵ Paytaj Abrahamta nerqa: Qhaway, suyoyqa ñawpaqeykipi kashan. Tiyakunaykipaj maynejtachá munasqaykita ajllakuy, nispa.

¹⁶ Chaymantataj Abimelecqa Saratañataj nerqa: Turaykiman waranqa phisu qolqeta qoni. Chay kanqa, qan allin warmi kasqaykita tukuy runakuna yachanankupaj. Ajinaqa mana pipis qanmanta manakajta parlayta atenqachu, nispa.

¹⁷ Chaymanta Abrahamqa Diosmanta mañaporqa. Diostaj Abimelecta, jinallataj warmintapis, chantá warmi kamachinkunatapis thañichillarqataj, paykuna wawayoj kayta atinankupaj.

¹⁸ Chayta Tata Dios ruwarqa, imajtinchus Abrahampa warmin Sararayku Dios nisqa Abimelecpa ayllunpi kaj warmikuna mana wawayoj kanankuta.