Génesis 2 - DIOSPA QHELQACHISQAN DEUTEROCANONICAL

¹ Ajinata Dios janajta, kay pachatapis, chaykunapi tukuy ima kajtawan ruwayta tukorqa.

² Jinataj Diosqa qanchis kaj p'unchaypi tukuy ima ruwananta tukuspa, samarikorqa.

³ Chantá Diosqa qanchis kaj p'unchayta saminchaspa, paypata kananpaj t'aqarqa, imaraykuchus pay chay p'unchaypi tukuy ima ruwasqanmanta samarikorqa.

Qhallallaj Edén huerta

⁴ Ajinata Tata Dios janajta, kay pachatapis ruwarqa. Maypachachus pay janajta, kay pachatawan ruwarqa chaypacha,

⁵ manaraj ima sach'apis kasqarajchu, nitaj ima qhorapis p'utumusqarajchu, Tata Dios jallp'aman manaraj parachimusqanrayku. Nillataj pipis jallp'ata llank'ananpaj kasqarajchu.

⁶ Chaywanpis Tata Dios pampamanta yakuta jutuchimuspa, chaywan tukuy kay pachata qarparqa.

⁷ Chantá Tata Dios runata jallp'amanta ruwarqa, senqanmantaj kawsay samayta samaykorqa. Ajinamanta runaqa kawsajman tukorqa.

⁸ Tata Dios inti llojsimuynejpi, Edén sutiyoj cheqanejpi uj qhallallaj huertata ruwarqa, chaymantaj runata churarqa.

⁹ Chay huertapi Tata Dios tukuy imaymana sach'akunata wiñacherqa. Chay sach'akunaqa ima munay karqa, poqoyninkutaj mikhunapaj sumaj karqa. Huerta chawpipi pay kawsachej sach'ata wiñachillarqataj, jinallataj allin kajta mana allin kajta yachana sach'atapis.

¹⁰ Huertata qarpanapaj kikin Edenmanta uj mayu llojserqa, chay mayutaj tawaman t'aqakorqa.

¹¹ Ñawpaj kaj mayoj sutin Pisón karqa. Chay mayoqa Javilá cheqanejta muyuykushan, chay jallp'apitaj qori tiyan.

¹² Chay jallp'api kaj qoritaj sumaj karqa. Jinallataj chaypi k'achituta q'apashaj sach'a waqay, bedelio chantá ónice rumi ima kallarqataj.

¹³ Iskay kaj mayoj sutenqa Guijón karqa, chay mayutaj tukuy Cus cheqanejta muyuykushan.

¹⁴ Kinsa kaj mayoj sutintaj Tigris karqa, chaytaj Asiriaj inti llojsimuyninnejta muyuykushan. Tawa kaj mayoj sutintaj Éufrates karqa.

¹⁵ Chantá Tata Dios runa ruwasqanta Edén huertaman churarqa, llank'ananpaj chantá qhawananpaj ima.

¹⁶ Jinataj Tata Dios runata kamacherqa: Huertapi kaj tukuynin sach'akunaj poqoyninta mikhuyta atinki.

¹⁷ Allin kajta mana allin kajta yachana sach'aj poqoynillanta amapuni mikhunkichu. Chay sach'aj poqoynintachus mikhunki chayqa, wañunki, nispa.

¹⁸ Chaymanta Tata Dios nillarqataj: Runa sapallan kananqa mana allinchu. Paywan kananpaj, paypaj jina uj yanapajta ruwapusaj, nispa.

¹⁹ Chantá Tata Dios jallp'amanta tukuy imaymana animalkunata, chantá tukuy imaymana phawajkunatawan ruwarqa. Jinaspataj, animalkuna ruwasqanta runaman pusarqa sapa ujta sutichananpaj. Chayrayku tukuy animalqa Adanpa sutichasqan sutiwan rejsisqa kanku.

²⁰ Runataj sapa animalta sutichararqa k'ita animalkunata, phawajkunata, chantá uywakunata ima. Chaywanpis Adanta yanapananpaj jina mana pipis karqachu.

²¹ Chayrayku Tata Diosqa runata sinch'ita puñurparicherqa. Puñushajtintaj, Tata Diosqa runamanta ujnin wajtanninta orqhorqa, chantá khallasqan aychata wisq'aykaporqa.

²² Chantá Tata Diosqa qharimanta wajtanta orqhosqanmanta uj warmita ruwarqa, jinaspataj, qhariman pusarqa.

²³ Qharitaj warmita rikuytawan, kusikuspa nerqa: Paymin kikin tulluymanta, kikin aychaymanta. Qharimanta orqhosqa kasqanrayku paypa sutenqa warmi kanqa, nispa.

²⁴ Chayrayku qhareqa tatanta mamantawan saqespa, warminwan ujchakapun, iskayninkutaj uj runa jinalla kanku.

²⁵ Chaypacha qharipis warmipis q'alalla kasharqanku, manataj q'alalla kasqankumanta p'enqakorqankuchu.