Génesis 15 - DIOSPA QHELQACHISQAN DEUTEROCANONICAL

Tata Diosqa Abramwan tratota ruwan

¹ Chaymanta Tata Diosqa Abramman mosqoypi jina parlarqa: Ama manchachikuychu, Abram, imaraykuchus noqa waqaychasojniyki kani. Qanpa t'inkaykeqa may chhikapuni kanqa, nispa.

² Abramtajrí kuticherqa: Tukuyta Kamachej Tata Dios, imapajtaj imatapis qowankiri? Qan yachanki waway mana kasqanta. Chayrayku wañupojtiy, Damascomanta kamachiy Eliezer tukuy imayta chayaqeta jap'enqa, nispa.

³ Chantá Abram nillarqataj: Tata Dios, mana wawata qowankichu. Chayrayku tukuy imay kajtapis wasiypi paqarej kamachillaychá chayaqeta jap'enqa ari, nispa.

⁴ Tata Diostajrí kuticherqa: Chayaqetaqa mana kamachiykichu jap'enqa, manachayqa wawaykipuni, nispa.

⁵ Chantá Tata Diosqa Abramta jawaman pusaspa, nerqa: Janajta qhawarispa, ch'askakunata yupay. Yupayta atiwajchu? Mirayniykeqa ajina mana yupay atina kanqa, nispa.

⁶ Chantá Abramqa Tata Diospa nisqanta jap'ikorqa, chayraykutaj Tata Dios chaynejta Abramta cheqan runapaj qhawarqa.

⁷ Tata Dios nillarqataj: Noqa Tata Dios kani. Noqamin Caldea suyupi Ur llajtamanta orqhomorqayki, kay jallp'ata qanman chayaqeta qosunaypaj, nispa.

⁸ Chantá Abram nerqa: Tukuyta Kamachej Tata Diosníy, imaynapitaj sut'ita yachasaj kay jallp'ata chayaqeypaj jap'inaytari? nispa.

⁹ Tata Diostaj nerqa: Apamuy uj wakata, uj cabrata, uj carnerota ima, sapa ujtaj kinsa watayojkama kachun. Jinallataj apamuy uj jurk'utata, urpi irpatawan, nispa.

¹⁰ Jinataj Abram chay uywakunata apamuspa, Diospa ñawpaqenpi ñak'arqa, chantá khuskanmanta khuchuspataj, chimpapurata churarqa. Jurk'utata, urpi irpatawanrí mana khuchorqachu.

¹¹ Jinapi suwintukuna ñak'asqa uywakunaj patanman tiyaykojtinku, Abram chaykunata manchacherqa.

¹² Inti yaykuykushajtin, Abramqa sinch'ita puñurparerqa, chantá manchay laqhapi rikhurispa, manchachikorqa.

¹³ Chantá Tata Dios payta nerqa: Kunan ujta nisqayki: Mirayniykeqa runaj llajtanpi tiyakonqanku, chaypitaj wata runa jina tawa pachaj watata sinch'ita ñak'arenqanku.

¹⁴ Qhepanejmanrí noqa wata runaman tukuchej suyumanta llajtayojkunata ñak'arichisaj, mirayniykitaj chaymanta manchay qhapaj llojsimonqanku.

¹⁵ Qantajrí allin machuña, sonqo tiyaykusqa kawsaypi wañupunki, jinataj maypichus ñawpa tataykikuna kashanku, chayman rinki.

¹⁶ Tawa pachaj wata tukukuytataj mirayniykeqa kay jallp'aman kutimponqanku, imajtinchus kaypi tiyakoj amorreokunaj millayta ruwasqankoqa manaraj chaykamachu. Chayrayku paykunata manaraj chinkarparichisajchu, nispa.

¹⁷ Laqhayaykuytataj uj horno manchayta q'oshñishaj rikhurerqa, jinallataj lawrashaj nina, chaykunataj uywa ñak'asqaj chawpinta pasasharqa.

¹⁸ Chay p'unchay Tata Diosqa Abramwan kay tratota ruwarqa: Noqa kay jallp'ata mirayniykiman qosaj Egipto mayumantapacha Éufrates jatun mayukama.

¹⁹ Chay jallp'api kunan tiyakushanku quenitakuna, quenizitakuna, cadmoneokuna,

²⁰ jeteokuna, ferezeokuna, refaitakuna,

²¹ amorreokuna, cananeokuna, gergeseokuna, jebuseokuna ima, nispa.