Génesis 12 - DIOSPA QHELQACHISQAN DEUTEROCANONICAL

Diosqa Abramta wajyan

¹ Uj kuti Tata Diosqa Abramta nerqa: Llajtaykita, aylluykita, chantá tataykej wasintawan saqespa, noqa rikuchisqayki, chay jallp'aman ripuy.

² Noqataj mirayniykimanta ashkha runayoj jatun suyuta ruwasaj. Saminchasqayki, manchay uyarisqatataj ruwasqayki, qannejtataj wajkunapis saminchasqallataj kanqanku.

³ Qanta saminchasojkunata noqa saminchasaj, qanta maldicisojkunatatajrí maldicillasajtaj. Jinallataj qannejta kay pachapi tukuy runata saminchasaj, nispa.

⁴ Chantá Abram Tata Diospa kamachisqanta kasuspa, Jarán llajtamanta riporqa. Lotpis paywan rillarqataj. Abram Canaanman ripushaspa, qanchis chunka phishqayoj watayoj karqa.

⁵ Abramqa warmin Saraita, chantá sobrinon Lottawan ima pusariykukorqa, paykunataj Canaanman ripunankupaj purirerqanku. Jinallataj Abramqa Jaranpi kashaspa imatachus tarisqanta apakaporqa. Wata runakunata rantikusqantapis pusakapullarqataj. Chantá Canaanman chayarqanku.

⁶ Abramqa tukuy chay cheqanejta pasaspa, Sichem nisqa cheqanejman chayarqa, Morepi encina sach'a karqa, chayman. Chaypacha chay cheqanejpi cananeokuna tiyakusharqanku.

⁷ Chantá Tata Diosqa chaypi Abramman rikhurispa, nerqa: Kay jallp'atamin mirayniykiman qosaj, nispa. Abramtaj chaypi Tata Diospaj uj altarta ruwaporqa, chaynejpi Tata Dios payman rikhurisqanrayku.

⁸ Chaymanta Betel llajtaj inti llojsimuynejpi kashan, chay orqonejman riporqa, chaypitaj toldonta sayacherqa. Betel llajtaqa jarakusqanmanta inti yaykuynejpi kasharqa, Hai llajtataj inti llojsimuynejpi kasharqa. Chay cheqapipis Abramqa Tata Diospaj uj altartawan ruwallarqataj, chantá Tata Diospa sutinta oqharispa, yupaycharqa.

⁹ Chaymantataj Abramqa Néguev nisqa cheqanejman alliymanta alliy rillarqapuni.

Abram Egiptoman rin

¹⁰ Chaypacha Canaanpi yarqhay wata karqa. Chayrayku Abramqa Egiptoman tiyakoj yaykorqa, imaraykuchus tiyakusharqanku chaynejpi manapuni imapis mikhunankupaj karqachu.

¹¹ Egiptoman chayashaspataj, Abram warmin Saraita nerqa: Qanqa manchay k'achita warmi kanki.

¹² Egipto llajtayojkunataj qanta rikususpa, nenqanku: Kay warmeqa jaqay qharejpa warmin, nispa. Ajinaqa noqata wañuchiwanqanku, qantarí mana.

¹³ Chayrayku niy ari, qan noqaj panay kasqaykita, qanrayku ama wañuchinawankupaj, manachayqa allin rinawanpaj, nispa.

¹⁴ Jinapi Egiptoman Abram chayajtinkama, chay llajtayojkunaqa Saraí manchay k'achita warmi kasqanta rikorqanku.

¹⁵ Faraonta yanapajkunapis manchay k'achita warmi kasqanta rikullarqankutaj, chantá faraonman willamorqanku. Chaymantataj Saraitaqa faraonpa kamachinan wasiman pusarqanku.

¹⁶ Chantá faraonqa Sarairayku Abramta allinpaj qhawarqa, qorqataj ovejakunata, wakakunata, qhari kamachikunata, warmi kamachikunata, burrokunata, camellokunata ima.

¹⁷ Chaywanpis Abrampa warmin Saraita faraón wasinman pusachisqanrayku Tata Dios payta, chantá aylluntawan ima mayta ñak'aricherqa.

¹⁸ Chayrayku faraonqa Abramta wajyachispa, nerqa: Imaraykutaj qan kayta ruwawankiri? Imaraykutaj mana niwarqankichu kay warmi qanpa warmiyki kasqantari?

¹⁹ Panayki kasqanta niwasqaykirayku, yaqhalla payta warmiypaj oqharikuni. Kayqa, warmiykita pusakapuy, ripuytaj kaymanta, nispa.

²⁰ Chantá faraonqa soldadonkunata kamacherqa Abramta, warminta, chantá imachus tiyapusqantawan khuska Egiptomanta qharqonankuta.