Génesis 11 - DIOSPA QHELQACHISQAN DEUTEROCANONICAL

Babelpi torreta ruwanku

¹ Chaypacha tukuy runaqa uj parlayniyojlla karqanku.

² Maypachachus inti llojsimuynejmanta llojsimorqanku chaypacha, Sinarpi uj pampata tarerqanku, chaypitaj tiyakunankupaj qhepakorqanku.

³ Ujpacha paykunapura ninakorqanku: Ladrillota ruwaspa, ninapi chayachinachej, nispa. Ajinaqa rumej cuentanmanta ladrillo karqa, t'uroj cuentanmantataj t'iyuwan, breawan chhapusqa karqa.

⁴ Chaymantataj ninakorqanku: Kunanqa uj llajtata, janaj pachaman chayaj torretawan ruwanachej. Ajinata ruwaspa, noqanchej manchay uyarisqa kasunchej, manataj kay pachaman ch'eqerasunchu, nispa.

⁵ Tata Diostajrí runakunaj ruwashasqanku llajtata, torretawan qhawarej urayk'amorqa.

⁶ Chantá pay nerqa: Runakunaqa uj parlayniyojlla kaspa, kunan sumaj ujchasqa kashanku. Ruwayta qallarinkuña, chayraykutaj ruwayta yuyasqankuta mana pipis sayachiyta atenqachu.

⁷ Chayrayku urayk'uspa, parlayninkuta pejturparimunachej ama entiendenakunankupaj, nispa.

⁸ Ajinata Tata Diosqa tukuynejman runakunata ch'eqeracherqa, chayraykutaj paykuna llajtata ruwashasqankuta saqerqanku.

⁹ Chay cheqapi Tata Dios kay pachapi tukuy runaj parlayninkuta pejturparerqa, chaynejmantataj paykunata tukuynejman ch'eqeracherqa. Chayrayku chay llajtaj sutin Babel karqa.

Sempa miraynin

¹⁰ Kaykuna Semmanta mirajkuna karqanku. Jatun musphay paramanta iskay watanman Sempata churin Arfaxad paqarerqa. Chaypacha Semqa pachaj watayoj karqa.

¹¹ Semqa, churin Arfaxad paqarisqanmanta qhepaman 500 watatawanraj kawsarqa, wawankunataj qharikuna, chantá warmikuna ima karqankuraj.

¹² Arfaxad kinsa chunka phishqayoj watayoj kashajtin, churin Selajqa paqarerqa.

¹³ Chaymanta qhepamantaj Arfaxad 403 watatawanraj kawsarqa, wawankunataj qharikuna, chantá warmikuna ima karqankuraj.

¹⁴ Selaj kinsa chunka watayoj kashajtin, churin Éber paqarerqa.

¹⁵ Chay qhepata Selajqa 403 watatawanraj kawsarqa, wawankunataj qharikuna, chantá warmikuna ima karqankuraj.

¹⁶ Eber kinsa chunka tawayoj watayoj kashajtin, churin Peleg paqarerqa.

¹⁷ Chaymanta qhepamantaj Eberqa 430 watatawanraj kawsarqa, wawankunataj qharikuna, chantá warmikuna ima karqankuraj.

¹⁸ Peleg kinsa chunka watayoj kashajtin, churin Reu paqarerqa.

¹⁹ Chaymanta qhepamantaj Pelegqa 209 watatawanraj kawsarqa, wawankunataj qharikuna, chantá warmikuna ima karqankuraj.

²⁰ Reu kinsa chunka iskayniyoj watayoj kashajtin, churin Serug paqarerqa.

²¹ Chaymanta qhepaman Reuqa 207 watatawanraj kawsarqa, wawankunataj qharikuna, chantá warmikuna karqankuraj.

²² Serug kinsa chunka watayoj kashajtin, churin Najor paqarerqa.

²³ Chaymanta qhepamantaj Serugqa 200 watatawanraj kawsarqa, wawankunataj qharikuna, chantá warmikuna ima karqankuraj.

²⁴ Najor iskay chunka jisq'onniyoj watayoj kashajtin, churin Téraj paqarerqa.

²⁵ Chaymanta qhepamantaj Najorqa 119 watatawanraj kawsarqa, wawankunataj qharikuna, chantá warmikuna ima karqankuraj.

²⁶ Téraj qanchis chunka watayoj kashaspa, kinsa churikunayoj karqa. Paykuna karqanku Abram, Najor, chantá Jarán ima.

Téraj miraynin

²⁷ Kaykuna Terajmanta mirajkuna karqanku. Paypata kinsa churinkuna karqa: Abram, Najor, Jarán ima. Jaranqa Lotpa tatan karqa.

²⁸ Jaranrí tatan Terajmanta ñawpajta wañuporqa Caldea sutiyoj suyupi, Ur llajtapi, maypichus paqarerqa, chaypi.

²⁹ Abramqa Saraí sutiyoj warmiwan casarakorqa, Najortaj Milca sutiyojwan casarakorqa. Milcaqa Jaranpa ususin karqa, ñañantaj Isca karqa.

³⁰ Sarairí mana wijsallikuyta atisqanrayku mana wawata rejsej karqa.

³¹ Chantá Terajqa churin Abramta, allchhin Lotta, chantá ñojch'an Saraitawan ima pusariykukuspa, Caldea suyupi, Ur sutiyoj llajtamanta riporqa, Canaán sutiyoj cheqanejman rinanpaj. Chaywanpis Jarán llajtaman chayaspa, chaypi tiyakoj qhepakorqanku.

³² Chantá Terajqa 205 watayoj kashaspa, Jarán llajtapi wañuporqa.