Génesis 10 - DIOSPA QHELQACHISQAN DEUTEROCANONICAL

Noéj miraynin

¹ Kaykuna Noéj churinkuna karqanku: Sem, Cam chantá Jafet ima. Jatun musphay para qhepata paykunaj wawankukunapis kallarqankutaj.

² Jafetpata churinkuna karqanku Gomer, Magog, Maday, Javán, Tubal, Mesec, Tiras ima.

³ Gomerpa churinkunataj karqanku Askenaz, Rifat, Togarmá ima.

⁴ Javanpa churinkuna karqanku Elisa, Tarsis, Quitín, Rodanín ima.

⁵ Paykuna mama qocha kantupi sapa uj ayllunkuwan, parlayninkuwan ima jap'iyninkupi tiyakorqanku.

⁶ Campa churinkuna karqanku Cus, Misrayin, Fut, Canaán ima.

⁷ Cuspa churinkunataj karqanku Sebá, Javilá, Sabta, Ragama, Sabteca ima. Ragamaj churinkunataj karqanku Sebá, Dedán ima.

⁸ Cusqa Nimrodpa tatan karqa. Nimrodtaj kay pachapi ñawpaj kaj may atiyniyoj runa karqa.

⁹ Nimrodqa Tata Dios munasqanrayku k'ita animalkunata jap'inapaj manchay wapu karqa. Chayrayku runakuna ajinata niyta yachaj kanku: Kay runaqa Nimrod jina wapu, pichus Tata Dios munasqanrayku k'ita animalkunata jap'inapaj wapu karqa, chay jina nispa.

¹⁰ Nimrodqa Sinarpi kay llajtakunapi kamacherqa: Babel, Erec, Acad, Calne ima.

¹¹ Chaynejmantapacha Nimrodqa Asiriaman llojserqa, chaypitaj kay llajtakunata sayaricherqa: Niniveta, Rejobotta, Calajta,

¹² Resén jatun llajtatawan ima. Chay llajtaqa Ninivewan Calajwan chawpipi kashan.

¹³ Misrayinpa mirayninmanta karqanku ludimkuna, anameokuna, lehabitakuna, naftuhitakuna,

¹⁴ patruseokuna, casluhitakuna, caftoreokuna ima. Filisteokunaqa Caftorimmanta rikhurejkuna kanku.

¹⁵ Canaanpa kuraj kaj churin Sidón karqa, qhepan kajtaj Jet karqa.

¹⁶ Canaanmanta mirajkunataj karqanku jebuseokuna, amorreokuna, gergeseokuna,

¹⁷ heveokuna, araceokuna, sineokuna,

¹⁸ arvadeokuna, semareokuna, jamateokuna ima. Chay qhepata Canaanpa ayllunkuna tukuynejman ch'eqerarqanku.

¹⁹ Cananeokunaj jap'iyninku Sidonmantapacha Gerarpi Gaza llajtakama karqa, chaymantataj Sodoma, Gomorra llajtanejmanta, Adma, Zeboyinnejmanta Lasa llajtakama.

²⁰ Chaykuna Campa miraynin karqanku, sapa ayllu kikin jallp'ankuwan, kikin parlayninkuwan ima.

²¹ Jafetpa kurajnin Sempata churinkunapis kallarqankutaj. Semqa Eberpa churinkunaj jatun tatanku karqa.

²² Sempa churinkuna karqanku Elam, Asur, Arfaxad, Lud, chantá Aram ima.

²³ Arampa churinkunataj karqanku Uz, Jul, Geter, chantá Mas ima.

²⁴ Arfaxadqa Selajpa tatan karqa, Selataj Eberpa tatan karqa.

²⁵ Eberpatapis iskay churinkuna kallarqataj. Ujninpata sutin Peleg karqa, imaraykuchus chaypacha runakuna t'aqanakorqanku. Pelegpa sullk'antaj Joctán karqa.

²⁶ Chantá Joctán Almodadpa tatan karqa, chantá Selefpata, Jasar Mavetpata, Yerajpata,

²⁷ Hadoranpata, Uzalpata, Diclajta ima.

²⁸ Jinallataj Obalpata, Abimaelpata, Sebajta,

²⁹ Ofirpata, Javilajta, Jobabpatawan ima tatanku kallarqataj. Chay tukuynin Joctanpa churinkuna karqanku.

³⁰ Maypichus tiyakorqanku, chay jallp'aqa Mesamanta Sefarkama karqa, chaytaj inti llojsimuynej orqorara cheqanejpi karqa.

³¹ Paykuna Sempata churinkuna karqanku, sapa llajta, sapa ayllu kikin jallp'ankupi, kikin parlayninkuwan ima.

³² Paykunaqa sapa mirayninkuman jina chantá jap'iyninkuman jina Noéj churinkunamanta mirajkuna karqanku. Paykunataj jatun musphay para qhepaman tukuynejman ch'eqeraspa, suyukunata jataricherqanku.