Génesis 1 - DIOSPA QHELQACHISQAN DEUTEROCANONICAL

Janajta, kay pachatawan Dios ruwan

¹ Qallariypi Diosqa janajta, kay pachata ima ruwarqa.

² Kay pachaqa t'ustipacha, ch'usajlla kasharqa. Yakutaj sinch'i laqhawan p'ampasqa karqa. Diospa Espirituntaj yaku patata muyuykachasharqa.

³ Chantá Dios nerqa: K'anchay kachun, nispa. K'anchaytaj karqa.

⁴ Diostaj k'anchayta sumaj kasqanta qhawarqa, chantá k'anchayta laqhamanta t'aqarqa.

⁵ Chantá Dios k'anchayta suticharqa “p'unchay”, nispa. Laqhatataj “tuta”, nispa suticharqa. Jinaqa inti yaykuymanta q'ayantin inti yaykuykama, ñawpaj kaj p'unchay karqa.

⁶ Chaymanta Dios nerqa: Yakuta uramanta patamantawan t'aqananpaj uj ch'usaj kachun, yakuta iskayman t'aqananpaj, nispa. Ajinataj karqa.

⁷ Chantá Dios yakuta t'aqananpaj ch'usajta ruwarqa. Jinaqa t'aqaj ch'usajqa urapi kaj yakuta t'aqarqa patapi kaj yakumanta.

⁸ Diostaj yakuta iskayman t'aqaj ch'usajta suticharqa: “Janaj”, nispa. Jinaqa inti yaykuymanta q'ayantin inti yaykuykama, iskay kaj p'unchay karqa.

⁹ Chaymanta Dios nerqa: Janajpa urayninpi kaj yakoqa uj cheqallapi tantakuchun, ch'aki kaj rikhurinanpaj, nispa. Ajinataj karqa.

¹⁰ Chantá Diosqa ch'aki kajta suticharqa: “Jallp'a”, nispa. Yaku uj cheqallapi tantakojtataj suticharqa: “Mama qocha”, nispa. Chayta Diosqa sumaj kasqanta qhawarqa.

¹¹ Chantá Dios nillarqataj: Jallp'api tukuy imaymana qhorakuna, sach'akuna wiñachunku: Mujuyoj qhorakuna, poqoj sach'akuna ima, nispa. Ajinataj karqa.

¹² Chantá jallp'api tukuy imaymana q'omer kaj wiñarqa: Mujuyoj qhorakuna, poqoyninpi mujuyoj sach'akuna ima. Chaykunatataj Dios sumaj kasqanta qhawarqa.

¹³ Jinaqa inti yaykuymanta q'ayantin inti yaykuykama, kinsa kaj p'unchay karqa.

¹⁴ Chaymanta Dios nerqa: Janajpi k'anchajkuna kachun, p'unchayta tutamanta t'aqananpaj, jinallataj pacha mit'ata, p'unchaykunata, watakunata ima t'aqananpaj.

¹⁵ Janajpi k'anchajkuna kachunku kay pachata k'anchamunankupaj, nispa. Ajinataj karqa.

¹⁶ Diosqa iskay jatuchaj k'anchajkunata ruwarqa, jatun kajta p'unchaypi k'anchananpaj, juch'uy kajtataj tutan k'anchananpaj. Chaymanta ch'askakunatapis ruwallarqataj.

¹⁷ Chantá Dios k'anchajkunata janajpi churarqa,

¹⁸ tutapis, p'unchaypis kay pachata k'anchamunankupaj, chantá k'anchayta laqhamanta t'aqanankupaj. Chaykunatataj Diosqa sumaj kasqanta qhawarqa.

¹⁹ Ajinaqa inti yaykuymanta q'ayantin inti yaykuykama, tawa kaj p'unchay karqa.

²⁰ Chantá Dios nillarqataj: Yakupi kawsaj tukuy imaymana animalkuna rikhurichunku, jinallataj jallp'a patata phawajkunapis kachunku, nispa. Ajinataj karqa.

²¹ Diosqa mama qochapi jatuchachaj animalkunata ruwarqa, yakupi tukuy imaymana kawsajkunata ima. Jinallataj tukuy imaymana phawajkunatapis ruwallarqataj. Chaykunatataj Diosqa sumaj kasqanta qhawarqa.

²² Chantá Dios tukuy ruwasqan animalkunata saminchaspa, nerqa: Miraychej, mama qochamantaj junt'aychej. Phawajkunapis jallp'a patapi may chhikata mirachunku, nispa.

²³ Ajinaqa inti yaykuymanta q'ayantin inti yaykuykama, phishqa kaj p'unchay karqa.

²⁴ Chaymanta Dios nillarqataj: Jallp'a patapi tukuy imaymana animalkuna rikhurichunku: Uywakuna, k'ita animalkuna, pampata qhatatakuspa purej animalkuna ima, nispa. Ajinataj karqa.

²⁵ Diosqa tukuy imaymana animalkunata ruwarqa: K'ita animalkunata, uywakunata, jinallataj qhatatakuspa purejkunata ima. Chaykunatataj Diosqa sumaj kasqanta qhawarqa.

²⁶ Chaymantataj Dios nerqa: Runata ruwanachej noqanchej jina kananpaj, noqanchejman rijch'akojta. Chantá pay kamachichun tukuy challwata, p'isqokunata, tukuy animalta, qhatatakuspa purejkunata ima, nispa.

²⁷ Diosqa runata ruwaspa, payman rijch'akojta ruwarqa. Qharitawan, warmitawan ruwarqa.

²⁸ Chantá paykunata saminchaspa, nerqa: Ashkhata miraychej, kay pachamantaj junt'aychej. Kamachiyniykichej uraman churaychej, makiykichejpitaj jap'iychej mama qochapi kaj challwakunata, phawajkunata, jallp'a patapi qhatatakuspa purejkunatapis, nispa. Ajinata Dios nerqa.

²⁹ Chaymanta Diosqa ruwasqan runakunata nerqa: Qhawaychej, qankunaman kay pachapi tukuy mujuyoj qhorakunata, tukuy imaymana poqoj sach'akunatawan qoykichej chaymanta mikhunaykichejpaj.

³⁰ Tukuy kay pachapi k'ita animalkunaman, phawajkunaman, qhatatakuspa purejkunaman ima qhorata mikhunankupaj qoni, nispa. Ajinataj karqa.

³¹ Chantá Diosqa tukuy ima ruwasqan manchay sumajpuni kasqanta qhawarqa. Ajinaqa inti yaykuymanta q'ayantin inti yaykuykama, sojta kaj p'unchay karqa.