Gálatas 3 - DIOSPA QHELQACHISQAN DEUTEROCANONICAL

Jesucristopi atinikuynejta qhespichisqa kanchej

¹ Galaciapi kaj wawqe panakuna, qankuna wampu kankichej. Pitaj layqaykusorqachej cheqa kajta mana kasunaykichejpajri? Noqa Jesucristoj wañusqan ima niytachus munasqanta qankunaman sumajta sut'incharqaykichej, kikin ñawiykichejwanpis Jesucristo cruzpi chakatasqa wañushajta rikushawajchej jina.

² Kunantajrí ujllata tapusqaykichej: Diosqa Santo Espirituta qosorqachej Moisespa kamachisqankunata junt'asqaykichejraykuchu, chayrí Jesusmanta sumaj willayta jap'ikusqaykichejraykuchu?

³ Chay jina mana yuyayniyojchu kankichej? Qankuna Santo Espíritoj yanapasqan mosoj kawsayta qallarerqankichej. Kunantajrí Moisespa kamachisqanta junt'ayta munaspachu Diospa sonqonta kusichiyta munashankichej?

⁴ Chay jinata ñak'arisqaykichejqa qhasipajchu karqa? Mana yuyanichu qhasipaj kasqanta.

⁵ Diosqa Espiritunta qosorqachej, qankuna ukhupitaj pay t'ukuna imakunata ruwan. Chaykunata Dios ruwan Moisespa kamachisqankunata kasusqaykichejraykuchu, chayrí Jesusmanta sumaj willayta jap'ikusqaykichejraykuchu?

Abraham Diospi atinikusqanrayku cheqan runapaj qhawasqa

⁶ Yuyarikuychej ñawpa tata Abrahamwan imachus kasqanta. Payqa Diospa nisqanta jap'ikorqa, Diostaj chaynejta cheqan runapaj payta qhawarqa.

⁷ Chayrayku kayta yachaychej: Tukuy pikunachus Diospa nisqanta jap'ikojkunaqa cheqapuni Abrahampa churinkuna kanku.

⁸ Diospa Qhelqachisqanpi ñawpajmantaña willarqa Diosqa mana judío kajkunata paypa nisqanta jap'ikusqankurayku cheqan runapaj qhawananta, chay sumaj willaytataj Abrahamman willarqa: Qannejta tukuy imaymana runakuna saminchasqa kanqanku, nispa.

⁹ Ajinaqa Diospa nisqanta tukuy jap'ikojkuna Abrahamwan khuska saminchasqa kanku, pichus Diospa nisqanta jap'ikorqa, chaywan.

¹⁰ Chaywanpis Moisespa kamachisqanta kasusqankurayku cheqanpaj qhawasqa kayta tukuy munajkunaqa maldicisqa kanku, imaraykuchus Diospa Qhelqachisqanpi nin: Pichus Diospa qhelqachisqan kamachisqakunamanta tukuyninta mana junt'ajqa maldicisqamin, nispa.

¹¹ Sut'i kashan mana pipis kamachisqata junt'asqanraykuchu Diospa ñawpaqenpi cheqan runapaj qhawasqa kananta, imaraykuchus Diospa Qhelqachisqanpi nillantaj: Cheqan runaqa Diospa nisqanta jap'ikusqanrayku Dioswan allinpi kawsallanqapuni, nispa.

¹² Chaywanpis Moisespa kamachisqanta junt'aspa wiñay kawsayniyoj kanapajqa Diospa nisqanta jap'ikuna mana necesariochu kanman. Chaypajqa kamachisqakunallata junt'ana kanman, imaraykuchus Diospa Qhelqachisqanpi nin: Pichus kamachisqakunata junt'ajqa kasusqanrayku wiñay kawsaniyoj kanqa, nispa.

¹³ Jinapis kamachisqakunata mana kasusqanchejmanta maldicisqa kananchejmanta Cristo kawsayninwan pagaspa kacharichiwarqanchej. Chayta ruwarqa, imaraykuchus cruzpi chakatasqa kaspa, pay noqanchejrayku maldicisqa karqa. Diospa Qhelqachisqanpi nin: Kurkupi tukuy warkhusqa kajqa maldicisqa kachun, nispa.

¹⁴ Dios imaynatachus Abrahamta saminchananta nerqa, ajinallatataj Cristo Jesusnejta mana judío kajkunatapis saminchallantaj. Ajinaqa Cristopi atinikusqanchejrayku Diosqa Santo Espirituta qowanchej, qonawanchejta nisqanman jina.

Kamachisqakunaqa Diospa nisqanta mana manakajman tukuchinchu

¹⁵ Wawqe panakuna, runa imatachus ruwanchej, chaymanta parlasqaykichej: Maypachachus pipis runa masinwan tratota ruwan chayqa, mana pipis manakajman tukuchiyta atinchu, nitaj imatapis yapaykuyta.

¹⁶ Jinallatataj Diosqa Abrahamman chantá mirayninman ima imatachus qonanta nerqa. Diospa Qhelqachisqanpi Abrahampa mirayninmanta parlaspa, mana ashkhamantachu parlan, manachayqa ujllamanta, chaytaj Cristo.

¹⁷ Chaywanqa kayta niyta munani: Ñawpajta Dios Abrahamwan tratota ruwaspa, nerqa imatachus qonanta. Moisespa kamachisqantajrí 430 watamanña churasqa karqa. Chayrayku Moisespa kamachisqanqa Diospa nisqanta mana chinkachiyta atinchu, nitaj yanqhayachiyta.

¹⁸ Sichus Moisespa kamachisqanta junt'asqannejta pipis Diospa qosqanta jap'iyta atinman karqa chayqa, manaña Diospa nisqannejtachu qosqa kanman. Diosrí Abrahamman imatachus qonanta nerqa, chayta qhasilla qorqa, nisqanta junt'aspa.

¹⁹ Ajina kajtenqa, Moisespa kamachisqan imapajtaj churasqa karqari? Dios qosaj nisqanmanta qhepaman Moisespa kamachisqan churasqa karqa runakuna kamachisqakunata p'akispa mana kasukoj kasqankuta sut'inchananpaj. Chaywanpis chay kanan karqa Abrahampa mirayninmanta kaj jamunankamalla, pimantachus Dios Abrahamman parlarqa, chay. Chantá Diosqa angelkunanejta kamachisqata Moisesman qorqa, pichus allinyachej karqa Dioswan, israelitakunawan, chayman.

²⁰ Maypachachus Dios Abrahamta nerqa imatachus qonanta chaypacha, mana allinyachej kananchu karqa, imaraykuchus Dios kikin Abrahamman imatachus qonanta nerqa.

Diospa kamachisqan imapajchus

²¹ Jina chayqa, yuyasunmanchu Moisesnejta qosqa kamachisqaqa Diospa qosaj nisqanpa contranpi kasqanta? Ni imarayku. Sichus pipis kamachisqata junt'aspa wiñay kawsayta jap'iyta atinman karqa chayqa, cheqan runapaj qhawasqa kanaqa kamachisqata junt'asqanejta kanman karqa.

²² Chaywanpis Diospa Qhelqachisqanpi nin tukuyninchej juchaj makinpi kashasqanchejta. Chayqa ajina, Dios kacharichinawanchejta nisqanta noqanchej Jesucristopi atinikuynejllata jap'inanchejpaj.

²³ Manaraj Jesucristopi atinikuna kashajtin, Moisespa kamachisqanpa makinpi karqayku Jesucristopi atinikuna sut'inchasqa kanankama.

²⁴ Ajinamanta Moisespa kamachisqanqa uywaqeyku jina karqa Cristoman pusanawaykupaj, ajinamanta Cristopi atinikuynejta cheqan runapaj qhawasqa kanaykupaj.

²⁵ Kunantajrí Jesucristopi atinikuna kasqanta Dios sut'inchajtin, manaña uywaqej pusananchu kayku.

²⁶ Chayrayku tukuyniykichej Diospa wawan kankichej Jesucristopi atinikusqaykichejrayku.

²⁷ Bautismonejta Cristoman tukuy ujchasqa kajkunaqa, Cristo imaynatachus kawsarqa, ajinallatataj kawsaychej mosoj p'achatapis churakushawajchej jina.

²⁸ Ajinaqa, judío kana chayrí mana judío kana, wata runa kana chayrí mana wata runa kana, qhari kana chayrí warmi kanapis mana imananchu. Sichus qankuna Cristo Jesusman ujchasqa kankichej chayqa, tukuyniykichej uj rejllaña kankichej.

²⁹ Jinallataj sichus qankuna Cristojta kankichej chayqa, cheqapuni Abrahampa mirayninmanta kankichej, Diospa nisqanman jinataj chayaqeta jap'ejkuna.