Gálatas 2 - DIOSPA QHELQACHISQAN DEUTEROCANONICAL

¹ Chantá chunka tawayoj watamanta noqa ujtawan Jerusalenman rillarqanitaj Bernabeta, Titotawan pusariykukuspa.

² Chayman rerqani Diospa sut'inchawasqanta kasuspa. Chantá chaypi kurajkunaman sut'incharqani Jesucristoj sumaj willayninmanta mana judío kajkunaman imaynatachus willashasqayta. Chayta paykunallaman sut'incharqani willasqay ama qhasi kananpaj.

³ Chaypacha Tito noqawan khuska kasharqa. Pay Grecia llajtayoj karqa chaypis, chay kurajkuna pay circuncidachikunanta mana mat'iykorqankuchu.

⁴ Chaywanpis wakinkuna Jesusta qhatejman tukuspa, iglesiaman yaykumorqanku Cristo Jesusnejta kamachisqata junt'anamanta kacharichisqaña kasqaykumanta wateqanawaykupaj. Paykuna watej wata runaman tukuchiyta munawarqayku, Moisespa kamachisqankunata munaspa mana munaspa kasunaykupaj.

⁵ Noqaykurí paykunata manapuni kasu ruwarqachu, imaraykuchus munarqayku Jesusmanta sumaj willayta maychus kajta kasunaykichejta.

⁶ Chantá pikunachus kurajkunapaj qhawasqa kanku, chaykunaqa Jesusmanta sumaj willayta willasqayman mana imatapis yaparqankuchu. Kurajkunachus manachus kanku chayqa, mana riwanchu nitaj jamuwanchu, imaraykuchus Dios mana runaj rijch'aynintachu qhawan.

⁷ Aswanpis paykuna repararqanku mana judío kajkunaman Jesuspa sumaj willayninmanta willanaypaj churasqa kasqayta, imaynatachus Pedropis judiokunaman sumaj willaymanta willananpaj churasqa karqa, ajinata.

⁸ Diospuni imaynatachus Pedrota churarqa judiokunaman kuraj kachan kananpaj, ajinallatataj noqatapis churawarqa mana judío kajkunaman kuraj kachan kanaypaj.

⁹ Santiago, Pedro, Juan ima Jerusalén iglesiapi kurajpaj qhawasqa karqanku. Chantá paykuna Diospa qhasilla k'acha yanapayninrayku willanaykupaj atiyta qowasqaykuta repararqanku. Chayrayku noqata, Bernabetawan tukuy sonqo q'apiriwarqayku, paykunawan uj yuyaylla kasqaykuta rejsichinankupaj. Jinaspataj, mana judío kajkunaman willaj rinaykuta niwarqayku, paykunataj judiokunaman.

¹⁰ Chaywanpis paykuna niwarqayku wajchakunamanta amapuni qonqakunaykuta, noqataj kunankama tukuy sonqo chayta ruwani.

Pabloqa Pedrota k'amin

¹¹ Chantá Pedro Antioquía llajtaman jamojtin, uyanpi niporqani, imaraykuchus paypa ruwasqan nipuni allinchu karqa.

¹² Santiagoj kachasqankuna manaraj jamushajtinku, Pedroqa mana judío kajkunawan khuska mikhoj. Chayamojtinkutajrí, manaña mana judío kajkunawan mikhorqachu. Aswanpis Santiagoj kachasqankunata manchachikuspa, mana judío kajkunamanta t'aqakorqa.

¹³ Ajinaqa judiokunamanta Jesucristota qhatejkunapis Pedro jina puraj uya kallarqankutaj. Bernabepis paykunawan apachikullarqataj.

¹⁴ Noqa maypachachus Jesuspa cheqa kaj sumaj willayninman jina mana allinta purisqankuta rikorqani, chaypacha tukuypa ñawpaqenpi Pedrota k'amerqani: Qan judío kashaspapis, mana judío jina purinki. Sichus mana judío jina purinki chayqa, imaraykutaj mana judío kajkunata kunan kamachinki judiokunaj usunkuta ruwanankutari? nispa.

Diosqa Jesucristonejta cheqan runapaj qhawawanchej

¹⁵ Noqayku paqarisqaykumantapacha judío kayku, manataj mana judío kajkuna jina juchasapachu.

¹⁶ Chaywanpis yachayku runaqa mana Moisespa kamachisqankunata junt'aspachu cheqan runapaj qhawasqa kasqanta, manachayqa Jesucristopi atinikusqanraykulla. Noqaykupis Cristopi atinikorqayku, paypi atinikusqaykuraykutaj Diospa ñawpaqenpi cheqan runapaj qhawasqa kayku, manataj kamachisqakunata junt'asqaykuraykuchu. Mana pipis kamachisqakunata junt'asqanrayku Diospa ñawpaqenpi cheqan runapaj qhawasqa kayta atenqachu.

¹⁷ Noqayku Cristonejta cheqan runapaj qhawasqa kayta mask'ashaspa, manaña Moisespa kamachisqanta junt'aykuchu. Sichus ajinata noqaykupis juchasapallataj kasqaykuta reparakuyku chayqa, yuyasunmanchu Cristoqa juchasapaman tukuchiwasqaykuta? Ni imarayku.

¹⁸ Noqaqa kamachisqakunata junt'aspa Diospa ñawpaqenpi cheqan runapaj qhawasqa kayta qhesacharqani. Chaywanpis sichus watej kamachisqakunata junt'aj churakuyman chayqa, juchayoj kasqayta nishayman.

¹⁹ Chayqa jina, imajtinchus Moisespa kamachisqanta kasuyta munashajtiy, kikin kamachisqallataj juchachawaspa wañuchiwarqa. Ajinamanta kamachisqata kasunapaj wañusqa jina kani, Diospa munasqanman jina kawsanaypaj.

²⁰ Noqaqa Cristowan khuska chakatasqa karqani, kunantaj manaña ñawpajta jinachu kawsani. Manachayqa noqapi Cristo munayninta ruwaspa kawsan. Chayrayku kunan Diospa Churinpi atinikusqayrayku kawsashani, imaraykuchus paymin munakuwarqa, noqaraykutaj pay kikin wañuchisqa kananpaj jaywaykukorqa.

²¹ Jinallataj noqa Diospa qhasilla k'acha yanapayninta mana qhesachanichu. Sichus Moisespa kamachisqanta junt'aspa cheqan runapaj qhawasqa kayta atisunman karqa chayqa, Cristo qhasi manakajta wañunman karqa.