Filipenses 1 - DIOSPA QHELQACHISQAN DEUTEROCANONICAL

Pablo napaykun

¹ Jesucristoj wata runankuna Pablowan, Timoteowan ima kay cartata qhelqaspa, apachimuyku Filipos llajtapi Diospa ajllakusqankunaman, pikunachus Cristo Jesuspata kanku, chaykunaman. Jinallataj napaykuyku chay iglesiamanta kurajkunata chantá diaconokunata ima.

² Tata Diosninchejpa, jinataj Tukuyta Kamachej Jesucristonchejpa qhasilla k'acha yanapayninku, sonqo tiyaykuyninku ima qankunawan kachun.

Pabloqa paykunarayku mañapun

³ Sapa kuti qankunamanta yuyarikuspa, Diosniyman pachis ninipuni.

⁴ Dioswan parlarikuspataj, may kusisqa tukuy qankunapaj mañapuykichej,

⁵ qallariymantapacha kunankama Jesusmanta sumaj willayta willanapi yanapawasqaykichejmanta.

⁶ Jinataj kayta allinta yachani: Diosqa qankunapi ima allin ruwaytachus qallarerqa, chayta sumaj tukusqa kanankama junt'anqa, Jesucristo kutimunan p'unchaykama.

⁷ Qankunamanta ajinata yuyanayqa allinpuni, imaraykuchus qankunata anchatapuni munakuykichej. Chayta nini, imajtinchus carcelpi wisq'asqa kashajtiypis, chayrí juezkunaj ñawpaqenpi kutichikushaspa Jesusmanta sumaj willay cheqan kasqanta sut'inchashajtiypis, qankuna Diospa qowasqan ruwanapi yanapawarqankichejpuni.

⁸ Dioslla yachan imaynatachus qankunata munakusqayta Jesucristoj sinch'i munakuyninwan.

⁹ Chayrayku Diosmanta mañakuni, munakuyniykichej astawan astawan kananta, jinallataj yachaypi, tukuy imata reparanapi ima wiñanaykichejta.

¹⁰ Ajinamanta imachus aswan allin kajta ajllayta yachankichej, Cristoj kutimunan p'unchaypi llimphu sonqoyoj, mana k'amina kanaykichejpaj.

¹¹ Chay jinamanta qankuna Jesucristoj yanapasqanwan allin kajta ruwayta atinkichej, runakuna Tata Diosta yupaychanankupaj, chantá jatunchanankupaj ima.

Pabloqa Jesucristollata kasuspa kawsan

¹² Munasqa wawqe panakuna, yachanaykichejta munani kay tukuy ima qhatiriwasqanqa Jesusmanta sumaj willayta willanaypaj yanapawasqanta.

¹³ Ajinamanta kuraj kamachejpa wasinta qhawaj soldadokuna, jinallataj tukuy runakuna yachanku Cristorayku noqa wisq'asqa kasqayta.

¹⁴ Jinallataj wisq'asqa kasqayta yachaspa, ashkha wawqe panakunapis kallpachakorqanku. Chayrayku paykunapis mana manchachikuspa Diospa willachisqanta willarqanku.

¹⁵ Arí, wakenqa Cristomanta willanku qhawanakuspa, churanakuspa ima. Wakintajrí allin sonqowan paymanta willanku.

¹⁶ Paykunaqa noqata munakuspa Jesusmanta sumaj willayta willanku, yachaspa Jesusmanta sumaj willay cheqan kasqanta rikuchinaypaj churasqa kasqayta.

¹⁷ Wakinkunatajrí churanakuyta munaspa Cristomanta willanku, mana tukuy sonqochu, wisq'asqa kashajtiy astawan llakichiwayta munaspa.

¹⁸ Chaywanpis chayqa mana imananchu. Cheqan sonqowanpis amapis tukuy sonqochu, paykuna Cristomanta willashanku. Chaytaj mayta kusichiwan, chaypis astawanraj kusikusaj,

¹⁹ imajtinchus noqa yachani kacharichisqa kanayta qankuna Diosmanta mañapuwasqaykichejrayku, Jesucristoj Espíritun yanapawasqanraykutaj.

²⁰ Noqa sut'ita yachani mana ni imapi p'enqachisqa kanayta. Aswanpis tukuy sonqo suyashani kunanpis mayk'ajllapis Cristoj may jatun kaynin noqapi rikuchisqa kananta, kawsasaj chaypis, wañusaj chaypis.

²¹ Kawsasajraj chayqa, Cristota kasuspa kawsayta munani. Wañupuyman chayrí, noqapaj aswan allinraj kanman.

²² Chaywanpis kay pachapi kawsaymanraj chayqa, Cristopaj astawanraj ruwayman. Ajinaqa noqapaj imachus aswan sumaj kasqanta mana yachanichu.

²³ Chay iskaymantaqa mana ajllakuyta atinichu. Astawanqa wañupuyta munayman, Cristowan khuska kamunaypaj, chaytaj noqapaj aswan sumaj kanman.

²⁴ Jinapis kawsanayraj qankunapaj aswan allin kanman.

²⁵ Ajinaqa, allinta yachani kawsanaytaraj qankunata yanapanaypaj, Diospi atinikusqaykichejmantapis kusikunaykichejpaj.

²⁶ Ajinaqa maypachachus noqa ujtawan qankunawan kasaj chaypacha, Jesucristota astawan jatunchayta atinkichej.

²⁷ Kayta niykichej: Qankuna allinta puriychej Cristomanta sumaj willayta allinpi rikhurichinaykichejpaj jina. Ajinapi noqa watukoj jamuspapis, chayrí karupi kashaspapis, qankuna sinch'ita sayashasqaykichejta uyariyta munani, jinallataj uj sonqolla kashasqaykichejta. Chantá uyariyta munallanitaj khuska Jesusmanta sumaj willayta mana sayk'uspa willashasqaykichejta.

²⁸ Contraykichejpi kajkunamanta ama manchachikuychejchu. Mana manchachikusqaykichejqa yachayta qon paykuna chinkayman rishasqankumanta, qankunataj qhespichisqa kasqaykichejmanta. Chaytaj Diosmanta.

²⁹ Paymin qankunata maypaj qhawaspa, atiyta qosunkichej mana Cristopi atinikunallaykichejpajchu, manachayqa payrayku ñak'arinaykichejpaj.

³⁰ Kunantaj qankunapis noqa jinallataj chay churanakojkunawan tinkushankichej. Imaynatachus qankuna ñawpajta paykunawan tinkojta rikuwarqankichej, ajinallatataj kunanpis uyarishankichej chay churanakojkunawan tinkushallasqaytapuni.