Filemón 1 - DIOSPA QHELQACHISQAN DEUTEROCANONICAL

Pablo napaykun

¹ Munasqa yanapajniyku Filemón, noqa Pablo Timoteowan khuska, kay cartata qhelqaspa, qanman apachimuyki. Yachanki jina, noqa Jesucristomanta parlasqayrayku preso kashani.

² Jinallataj kay cartata qhelqaspa apachimuni munasqa pananchej Apiaman, soldado jina maqanakoj masinchej Arquipoman, chantá wasiykipi tantakoj iglesiaman ima.

³ Tata Diosninchej, chantá Tukuyta Kamachej Jesucristo ima qhasilla k'acha yanapayninkuta, chantá sonqo tiyaykusqa kawsakuyta ima qosuchunku, nispa napaykuyki.

Pablo Dioswan parlarikuspa, Filemonmanta pachis nin

⁴ Filemón, Diosniywan parlarikuspa, qanrayku pachis ninipuni,

⁵ imaraykuchus Diospa tukuy ajllakusqankunata munakusqaykita uyarini, chantá tukuy sonqo Tukuyta Kamachej Jesuspi atinikusqaykita ima.

⁶ Qanqa noqayku jina Cristopi atinikunki, paytataj munakunki. Chayrayku Diosmanta mañapuyki sut'ita yachanaykipaj tukuy ima allin kajta ruwayta atisqanchejta.

⁷ Chayrayku wawqe panakunata munakusqaykirayku sonqoy t'ikaririn, kusikunitaj. Qanqa ashkha kutita Diospa ajllakusqankunaj sonqonkuta kawsaricherqanki.

Pabloqa Onesimorayku Filemonta parlapayan

⁸ Noqaqa Cristoj sutinpi imachus allin kajta ruwanaykita kamachisuyta atiyman.

⁹ Chaywanpis qanta munakususqayrayku ujta ruwapunawaykita mañarikuyki. Noqa machuña kaspa, chantá Jesucristomanta parlasqayrayku preso kaspa,

¹⁰ Onesimorayku mañarikuyki. Payqa waway jina, imaraykuchus preso kashaspa, Cristomanta payman willarqani, paytaj Diosman kutirikorqa.

¹¹ Ñawpajta Onesimoqa ni imapaj allin runa karqa. Kunantajrí qanpajpis, noqapajpis sumajta yanapakoj runaman tukun.

¹² Noqatajrí payta qanman kachampushayki, jinataj mañarikuyki noqata jina payta jap'inaykita.

¹³ Mayta munayman karqa pay noqawan qhepakunanta Jesusmanta sumaj willayta willasqayrayku preso kashajtiy, pay cuentaykimanta yanapanawanpaj.

¹⁴ Chaywanpis manaraj qanwan parlashaspa, mana imatapis ruwayta munarqanichu. Manachayqa munarqani qan sonqomanta munasqaykirayku payta yanapanaykita, manataj noqalla nisqayraykuchu.

¹⁵ Ichapis Onesimoqa mana unaypajchu qanmanta karunchakorqa, kunanmanta payta wiñaypaj jap'ikapunaykipaj.

¹⁶ Kunantajrí payta manaña wata runata jinachu jap'ikapuy, aswanpis munasqa wawqeykita jina. Noqaqa Onesimota mayta munakuni. Qanpajrí aswan munasqaraj kanqa, mana wata runa jinallachu, manachayqa Tukuyta Kamachej Jesucristoman kutirikusqannejta wawqeyki kasqanrayku.

¹⁷ Ama jina kaspa, Diospa ruwananpi ruwaysikoj kasqanchejrayku, qanqa Onesimota noqatapis jap'ikushawankiman jina jap'ikapuy.

¹⁸ Chantá sichus ima mana allin kajta ruwasorqa, chayrí manu kasunkiman chayqa, noqa junt'apusqayki.

¹⁹ Noqapuni kayta qhelqamuyki: Chay manutaqa noqa qopusqayki. Jinapis mana yuyarichisuyta munanichu, qanpis noqaman manullataj kasqaykita. Manoqa qan kikiykimin kanki.

²⁰ Arí, wawqéy, Tukuyta Kamachej Jesusta munakusqaykirayku, ama jina kaspa, kayllatapis noqarayku ruway ari. Ajinata ruwaspataj, sonqoyta qhallallarichiwanki.

²¹ Noqa yachani kay qhelqasusqayta kasunawaykita jinallataj kay nisusqaymantapis astawanraj ruwanaykita.

²² Chay jawaqa wasiykipi uj cheqata wakichipuway chayman chayakamunaypaj, imaraykuchus qankunata watukoj jamuyta yuyashani, Diosmanta mañapuwasqaykichejman jina.

Cartata tukuychaspa napaykuykuna

²³ Napaykamusunki Jesucristomanta parlasqanrayku presochasqa masiy Epafras.

²⁴ Chantá Jesusmanta sumaj willayta willanapi yanapawajkuna Marcos, Aristarco, Demas, Lucas ima napaykamullasunkutaj.

²⁵ Tukuyta Kamachej Jesucristoj qhasilla k'acha yanapaynin qankunawan kachun.