Éxodo 9 - DIOSPA QHELQACHISQAN DEUTEROCANONICAL

Uywapaj onqoy rikhurin

¹ Chantá Tata Dios Moisesta nillarqataj: Rispa, faraonta nimuy: Israelitakunaj Tata Diosninku ajinata nisunki: Aylluyta kacharipuy, rispa yupaychamunawankupaj.

² Sichus mana kachariyta munaspa, jap'iyllatapuni munanki chayqa,

³ noqa manchay millay onqoywan tukuy uywaykikunata wañuchisaj: Caballokunata, burrokunata, camellokunata, wakakunata, ovejakunata ima, nispa.

⁴ Chaywanpis Tata Diosqa israelitakunaj uywankuta Egipto llajtayojkunaj uywankumanta t'aqanqa. Chayrayku israelitakunaj uywankumanta ni ujpis wañonqachu.

⁵ Chay jawa Tata Diosqa mayk'ajchus chay kananta ninña: Q'ayapacha chayta ruwasaj, nispa.

⁶ Q'ayantinpacha Tata Dios nisqanta ruwarqa. Jinataj Egiptopi tukuy uywakuna wañurarqanku. Israelitakunaj uywankunamantarí ni ujpis wañorqachu.

⁷ Faraonqa israelitakunaj uywankunata qhawajta kacharqa, nitaj uj wañusqatapis tarerqankuchu. Chaywanpis faraonqa sonqonta rumiyachillarqapuni, manataj israelitakunata kachariporqachu.

Llejti onqoy

⁸ Chaymanta Tata Dios Moisesta, Aarontawan ima nillarqataj: Hornomanta ushphata orqhospa, Moisés faraonpa rikunanta chay ushphata pataman qhallichun.

⁹ Ushpha qhallisqantaj tukuy Egiptoman junt'aykonqa. Chantá runakunapi, uywakunapi ima llejti onqoy rikhurenqa, nispa.

¹⁰ Jinapi Moiseswan, Aaronwan hornomanta ushphata orqhospa, faraonpaman rerqanku. Chaypitaj Moisés ushphata pataman qhallerqa. Chaymantataj runapi, uywapi ima, tukuy ukhunkupi llejti onqoy rikhurerqa.

¹¹ Layqakunapis Moisespa ñawpaqenman mana riyta aterqankuchu, imaraykuchus paykunapis, jinallataj tukuy Egipto llajtayojkunapis llejtiwan onqosqa karqanku.

¹² Chay tukuywanpis Moisesman Tata Dios nisqanman jina, faraón astawan sonqonta rumiyacherqa. Chayrayku Moisesta, Aarontawan ima mana kasuta ruwarqachu.

Chijchi para

¹³ Chaymanta Tata Dios Moisesta nillarqataj: Q'aya paqarin tutamanta jatarispa, faraonta nimuy: Israelitakunaj Tata Diosnin nisunki: Kachariy israelitakunata, ch'innejman rispa yupaychamunawankupaj.

¹⁴ Manachus kacharinki chayqa, kunan sinch'i ñak'ariyta tukuy Egiptoman kachaykamusaj qanpa contraykita, yanapajniykikunaj, chantá runaykikunaj contrankuta ima. Ajinamanta yachanki tukuy kay pachapi noqa jina mana waj dios kasqanta.

¹⁵ Sichus noqa qanta, jinataj tukuy Egipto llajtayojkunata sinch'ita ñak'arichispa, may jina atiyniyoj kasqayta rikuchiykiman karqa chayqa, kay pachamanta chinkachisqaña kawaj karqa.

¹⁶ Noqarí kawsanaykita munaniraj, atiyniyoj kasqayta rikunaykipaj, ajinamanta qannejta tukuy kay pachantinpi uyarisqa kanaypaj.

¹⁷ Chaywanpis qanqa aylluypa contranpi churanakushankiraj, manataj paykunata kachariyta munashankichu.

¹⁸ Chayrayku q'aya, kunanta jina, jatuchaj chijchi parata parachimusaj. Chay jina chijchi paraqa Egipto rikhurisqanmantapacha mana ni jayk'aj karqachu.

¹⁹ Chayrayku kachaspa, tukuy uywaykikunata kanchaman wisq'anaykipaj tantachimuy, jinallataj campopi imachus tiyapusojta. Sichus runa, chayrí ima uywallapis jawallapi qhepakonqa chayqa, chijchi para paykunata wañurachenqa, nispa.

²⁰ Ajinaqa faraonpa wakin yanapajninkuna Tata Diospa nisqanta uyarispa, manchachikorqanku. Chayrayku kamachinkunata, uywankukunatapis wasiman pakarqanku.

²¹ Pikunachus Tata Diospa nisqanta mana kasuta ruwajkunarí kamachinkuta, uywankukunatapis jawallapi saqerqanku.

²² Chantá Tata Dios Moisesta nillarqataj: Makiykita janajnejman oqhariy, tukuynin Egipto suyupi runakunaman, uywakunaman, tukuy q'omer kaj chhikaman ima chijchi para paramunanpaj, nispa.

²³ Chantá Moisés varanta janajnejman oqharerqa. Tata Diostaj tukuy Egipto suyuman illapata, chijchi paratawan ima kachaykamorqa.

²⁴ Chijchi paraqa illapaj t'ojyasqanwan khuska mana samarispa paramorqa. Chay jina chijchi paraqa Egipto suyu rikhurisqanmantapacha ni jayk'aj kasqachu.

²⁵ Chijchi paraqa Egiptopi tukuy imata t'unaykorqa. Runakunata, uywakunata wañuracherqa, jinallataj tukuy q'omer kajta ch'anqarparerqa, sach'akunatapis q'ara k'aspillata sayacherqa.

²⁶ Chaywanpis Gosenman, maypichus israelitakuna tiyakusharqanku, chaynejmanqa mana chijchi para chayarqachu.

²⁷ Chaymanta faraonqa Moisesta, Aarontawan ima wajyachispa, nerqa: Juchallini. Tata Dios cheqanta ruwan, noqawan, llajta masiykunawantajrí juchayoj kayku.

²⁸ Tata Diosmanta mañaychej ari, illapakuna, chijchi para ima sayananpaj. Chantá noqa kacharipusqaykichej, manaña astawan jark'asqaykichejchu, nispa.

²⁹ Moisestaj nerqa: Kay llajtamanta llojsiytawanpacha, makiyta oqharispa, Tata Diosmanta mañakusaj. Chantá illapakuna ch'inyanqa, chijchi parapis thañenqa. Ajina kanqa kay pacha Tata Diospata kasqanta yachanaykipaj.

³⁰ Chaywanpis noqa yachani, ni qan, nitaj kamachiykikunapis manaraj Tata Diosta manchachikusqaykichejta, nispa.

³¹ Chijchi paraqa linota, cebadatawan ima sonqo nanayta ch'anqarparerqa, imaraykuchus cebada umasharqaña, linopis t'ikasharqaña.

³² Trigotawan, centenotawanrí mana imanarqachu, imaraykuchus qhepatallata tarpusqankurayku manaraj p'utumorqachu.

³³ Moisesqa faraonpa qayllanmanta llojsispa, llajtamanta jawaman rerqa. Chantá makinta oqharispa, Tata Diosmanta mañakorqa. Jinataj chaypacha illapakuna, chijchi parawan ima thañiporqanku. Jinamanta illapakuna manaña karqachu.

³⁴ Chantá faraón, para thañisqanta, chijchipis, illapapis sayasqanta rikuspa, ujtawan juchallillarqataj. Chantá pay, jinallataj yanapajninkunapis astawan sonqonkuta rumiyacherqanku.

³⁵ Faraón sonqonta rumiyachispa, mana israelitakunata kacharipuyta munarqachu, Tata Dios Moisesnejta nisqanman jina.