Éxodo 7 - DIOSPA QHELQACHISQAN DEUTEROCANONICAL

¹ Chantá Tata Dios Moisesta nerqa: Faraón qanta qhawasonqa Diospis kawaj jinata, wawqeyki Aarontaj nisqaykita sut'inchaj kanqa.

² Noqa imatachus kamachisqayki, qan chay tukuyninta wawqeyki Aaronman willanki. Wawqeykitaj chayta faraonman willanqa israelitakunata jallp'anmanta kacharipunanpaj.

³ Noqatajrí faraonpa sonqonta rumiyachisaj, Egipto suyupitaj runaj mana jayk'aj rikusqan t'ukuna imakunata ruwasaj.

⁴ Chaywanpis faraón manapuni uyarisonqachejchu. Chayrayku noqaqa Egipto llajtayojkunata jatun atiyniywan sinch'ita ñak'arichisaj, chaymantataj aylluyta Egipto suyumanta soldadokunata jina orqhokapusaj.

⁵ Egipto llajtayojkunaj contrankuta atiyniyta rikuchispa, israelitakunata chaymanta orqhosaj. Chaypachataj Egipto llajtayojkuna yachanqanku noqamin Tata Dios kasqayta, nispa.

⁶ Chantá Moiseswan, Aaronwan ima Tata Diospa kamachisqanman jina kikinta ruwarqanku.

⁷ Maypachachus faraonwan parlaj yaykorqanku chaypacha, Moisés pusaj chunka watayoj karqa, Aarontaj pusaj chunka kinsayoj watayoj karqa.

Aaronpa varan

⁸ Chantá Tata Diosqa Moisesta, Aarontawan nerqa:

⁹ Sichus faraón nisonqachej: T'ukunapaj jina imallatapis ruwaychej ari, nispa chayqa, Aaronta ninki: Varaykita jap'ispa, faraonpa rikunanta pampaman choqay, katariman tukunanpaj, nispa.

¹⁰ Chantá Moiseswan, Aaronwan ima faraonwan parlaj rispa, Tata Diospa kamachisqanman jina ruwarqanku. Aaronqa faraonpa rikunanta, jinataj yanapajninkunaj rikunanta varanta pampaman choqarqa. Varantaj katariman tukurparerqa.

¹¹ Chaywanpis faraonqa yachayniyojkunata, yatirikunatawan ima wajyacherqa. Egiptomanta yatirikunataj yachasqankuwan kikillantataj ruwarqanku.

¹² Sapa uj varankuta pampaman choqarqanku, jinataj sapa vara katariman tukullarqataj. Aaronpa varantajrí yachayniyojkunaj, yatirikunajpatawan varankukunata oqoykaporqa.

¹³ Chayta rikuspapis, faraón sonqonta astawan rumiyacherqa, Tata Dios nisqanman jinataj pay Moisesta, Aaronta ima mana kasuta ruwarqachu.

Yaku yawarman tukun

¹⁴ Chantá Tata Dios Moisesta nerqa: Faraonpata sonqon rumiyasqa kashan, manataj israelitakunata kachariyta munashanchu.

¹⁵ Faraonqa q'aya tutamanta Nilo mayuman renqa, qantaj paywan tinkukoj rinki. Chantá, katariman tukorqa, chay varayki aparisqa qan mayu kantupi faraonta suyaykunki.

¹⁶ Chantá paywan tinkukuspa, ninki: Israelitakunaj Tata Diosnin kay jinata nisunaypaj kachamuwan: Aylluyta kacharipuy, ch'innejman rispa yupaychanawankupaj, nispa. Qantajrí kunankama mana kasukunkichu.

¹⁷ Chayrayku Tata Dios ajinata nisunki: Kunan qan yachanki noqa Tata Dios kasqayta, nispa. Noqataj, makiypi jap'ishani, chay varawan Nilo mayupi yakuta wajtasaj, chaypachataj yakoqa yawarman tukonqa.

¹⁸ Ajinaqa mayupi challwakuna wañonqanku, mayutaj millayta asnanqa. Egipto llajtayojkunapis mayumanta yaku ujyayta millachikonqanku, nispa.

¹⁹ Chantá Tata Dios Moisesta nillarqataj: Niy Aaronta, yaku yawarman tukunanpaj varanta jap'ispa oqharinanta mayukunaman, wayq'okunaman, qochakunaman, yaku jallch'anaman, jinataj tukuy imapichari yaku tiyan, chaynejman. Ajinata ruwajtintaj, tukuy Egiptopi yakoqa yawarman tukonqa, k'ullumanta chayrí rumimanta yaku jallch'anapi kachunpis, nispa.

²⁰ Moiseswan, Aaronwan ima Tata Diospa kamachisqanman jina, kikinta ruwarqanku. Aaronqa faraón rikushajtin, Nilo mayupi yakuta varanwan wajtarqa, jinataj mayupi tukuy yakoqa yawarman tukorqa.

²¹ Nilo mayupi tukuy challwakunapis wañurarqanku. Mayu millayta asnasqanraykutaj, Egipto llajtayojkuna mana yakuta ujyayta aterqankuchu. Tukuy Egipto suyupi yakoqa yawarlla karqa.

²² Egiptomanta yatirikunarí yachasqankuwan kikillantataj ruwarqanku. Chayta rikuspataj, faraonqa sonqonta astawan rumiyacherqa, manataj Moisesta, Aaronta ima kasorqachu, Tata Diospa nisqanman jina.

²³ Manachayqa faraón manapis ni ima kanmanchu karqa jina, wasinman riporqa.

²⁴ Egipto llajtayojkunarí, mayumanta yakuta mana ujyayta atisqankurayku, llimphu yakuta mask'aspa, Nilo mayu kantupi pujyukunata allarqanku.

²⁵ Tata Dios, Nilo mayupi yakuta yawarman tukuchisqanqa qanchis p'unchayña karqa.