Éxodo 5 - DIOSPA QHELQACHISQAN DEUTEROCANONICAL

Moiseswan Aaronwan faraonwan parlaj rinku

¹ Chantá Moiseswan, Aaronwan ima faraonwan parlaj rispa, nerqanku: Israelpa Diosnin Tata Dios ajinata nisunki: Noqaj ajllakusqay aylluyta kachariy, ch'innejman rispa, sutiypi uj raymita ruwapunawankupaj, nispa.

² Faraontajrí kuticherqa: Pitaj chay Tata Dios kasqa, noqa payta kasuspa, israelitakunata kacharinaypajri? Noqaqa chay Tata Diosta mana rejsinichu, nitaj israelitakunata kacharisajchu, nispa.

³ Chantá Moisés, Aaronwan ima nerqanku: Diosniykoqa noqayku hebreokunaman rikhuriwarqayku. Chayrayku ch'innejman kinsa p'unchay puriyta rinayku tiyan, chaypitaj uywa ñak'asqata q'olachispa, Tata Diosman jaywamusqayku. Manachus Tata Diosman jaywaykuman chayqa, ichapis pay onqoywan, chayrí espadawan wañuchiwaykuman, nispa.

⁴ Egipto suyuta kamachej faraontajrí paykunata nerqa: Moisés, Aarón, imaraykutaj israelitakunata ruwanankumanta sayachiyta munashankichejri? Qankunapis ruwanaykichejman kutipullaychejtaj, nispa.

⁵ Chantá faraón nillarqataj: Egiptopi israelitakuna may chhika kanku. Qhawallasajchu ruwanankumanta sayanankuta? nispa.

⁶ Chantá chay p'unchaypacha faraonqa sapa t'aqamanta kurajkunata, jinataj jilaqatakunatawan kay jinata kamacherqa:

⁷ Kunanmantaqa israelitakuna adobenankupaj amaña ichhuta qonkichejchu, imaynatachus kunankama qosharqankichej, jinataqa. Manachayqa paykuna kikinku ichhuta pallakamuchunku.

⁸ Chaywanpis kunankama mashkhatachus adobeta ruwashanku, chay chhikallatapuni ruwanankuta ninkichej. Ama pisiyachinkichejchu. Paykuna qhellallamanta nishanku: Ch'innejman rispa, Diosniykuman uywa ñak'asqa q'olachinata jaywamusqayku, nispa.

⁹ Qankunarí paykunata astawan sinch'ita ruwachiychej, imachus ruwanallankupi yuyanankupaj, amataj llulla parlajkunata uyarinankupaj, nispa.

¹⁰ Chantá sapa t'aqata kamachejkuna, jilaqatakuna ima rispa, israelitakunata nerqanku: Faraón kamachiwayku amaña ichhuta qankunaman qonaykuta.

¹¹ Kunanmantaqa qankuna kikiykichej maymantapis ichhuta pallakamunaykichej tiyan. Chaywanpis mashkhatachus adobeta ruwaj kankichej, chay chhikallatapuni ruwanaykichej kanqa, nispa.

¹² Chayrayku israelitakuna tukuy Egipto suyuman rispa, rastrojota ichhoj cuentanmanta apamorqanku.

¹³ Egipto llajtayoj jilaqatakunataj israelitakunata astawan sinch'ita ruwacherqanku, nerqankutaj: Ichhuta qoshajtiyku mashkhatachus ruwaj kankichej, ajinallatataj adobeta ruwanaykichej tiyan, nispa.

¹⁴ Israelitakuna mashkhatachus ruwanankuta mana junt'ajtinkutaj, faraonpa jilaqatankunaqa israelitakuna ukhumanta jilaqatakuna churasqankuta seq'orqanku, nerqankutaj: Imaraykutaj mana qayna, nitaj kunanpis junt'arqankichejchu, mashkhatachus ñawpajta ruwaj kankichej, chay chhikata? nispa.

¹⁵ Chayrayku israelitakunaj jilaqatankunaqa faraonman quejakoj rispa, nerqanku: Imaraykutaj kamachiykikunata kay jinata ruwawaykuri?

¹⁶ Manaña ichhuta qowaykuchu, chaywanpis nishawayku: Adobeychej, nispa. Mana junt'ayta atejtiykurí, maqawaykurajtaj. Chaypajqa runaykikuna juchayoj kanku, nispa.

¹⁷ Faraontajrí kuticherqa: Qankuna qhella kankichej, mana ni ima ruwanayojpis kawajchej jina. Chayrayku nishankichej: Ch'innejman rispa, noqayku Tata Diosman uywa ñak'asqa q'olachinata jaywamusqayku, nispa.

¹⁸ Kutirispa, ruwanaykichejta ruwamuychej. Ichhuta manañapuni qosonqachejchu. Jinapis chaywan mana chaywan qankunaqa sapa p'unchay mashkhatachus ruwaj kankichej, chay chhikallatapuni adobenaykichej tiyan, nispa.

¹⁹ Ajinata israelitakunaj jilaqatankukunaqa imatachus ruwanankuta mana yacharqankuchu, imaraykuchus faraón nisqa: Sapa p'unchay mayk'atachus adobe ruwanaykichejqa mana pisiyachisqachu kanqa, nispa.

²⁰ Chay jilaqatakuna faraonwan parlasqankumanta llojsimuspa, Moiseswan Aaronwan tinkukorqanku. Paykuna jawapi suyasharqanku.

²¹ Jinapi jilaqatakuna nerqanku: Tata Dios qankunaj ruwasqaykichejta allinta qhawachun. Qankuna juchayoj kankichej faraonwan, yanapajninkunawan ima astawan chejninawaykupaj. Kunantaj qankunaj nisqaykichejrayku paykuna espadawan wañuchiwasqayku, nispa.

Moisés Tata Diosman willakun

²² Chantá Moisesqa Tata Dioswan parlaspa, nerqa: Diosníy, imajtintaj aylluykita kay jinatapuni ñak'arichinkiri? Imapajtaj kachamuwarqankiri?

²³ Sutiykipi faraonman parlaj jamusqaymantapacha, payqa Israel aylluykita astawan ñak'arichin. Qantaj aylluykita kacharichinaykipaj mana imatapis ruwankichu, nispa.