Éxodo 40 - DIOSPA QHELQACHISQAN DEUTEROCANONICAL

Moisés Dioswan Tinkukuna Toldota sayachin

¹ Chantá Tata Dios Moisesta nerqa:

² Wata qallariy killapi, killa qallariy p'unchayta Dioswan Tinkukuna Toldota sayachinki.

³ Chaymantaj kamachisqakuna qhelqasqayoj kashan, chay arcata churanki, chantá velowan qhataykunki.

⁴ Chantataj Dioswan Tinkukuna Toldo ukhuman mesata, tukuy imantinta apaykuspa, maychus kananman churanki. Toldo ukhuman candelerota apaykullankitaj, chantá lamparakunata jap'ichinki.

⁵ Jinallataj incienso q'oshñichina qorimanta altarta arcaj ñawpaqenman churanki. Chantá Dioswan Tinkukuna Toldo punkupi cortinata warkhunki.

⁶ Chantaqa Dioswan Tinkukuna Toldoj ñawpaqenman uywa ñak'asqata q'olachinapaj altarta churallankitaj.

⁷ Chaymantaqa Dioswan Tinkukuna Toldowan, altarwan kashan, chay chawpiman jatun ch'illamita churallankitaj. Jinaspataj chay jatun ch'illamiman yakuta junt'achinki.

⁸ Chaymantataj toldoj pationta cortinawan muyuykuchinki, punkunmantaj uj cortinata warkhuykunki.

⁹ Chantá Diospaj t'aqanapaj aceiteta jap'ispa, Dioswan Tinkukuna Toldota jawiykunki. Jinallataj chay ukhupi imachus kajtapis jawillankitaj. Ajinata chaypi tukuy ima kajta Diospaj t'aqanki.

¹⁰ Jinallataj uywa ñak'asqata q'olachina altarta, tukuy imantawan jawina aceitewan jawiykunki. Ajinata altarta noqapaj t'aqanki, jinamantataj altarqa llimphu llimphumin kanqa.

¹¹ Jatun ch'illamitapis sayanantinta jawina aceitewan jawillankitaj. Ajinata Diospaj chay ch'illamita t'aqanki.

¹² Chaymantataj Aaronta, churinkunatawan ima Dioswan Tinkukuna Toldo punkuman pusanki, chaypitaj paykunata yakuwan mayllanki.

¹³ Chantá Aaronta sumaj ruwasqa p'achawan p'achallichinki, aceitewantaj jawispa, sacerdotey kananpaj payta t'aqanki.

¹⁴ Chaymantaqa churinkunatañataj qayllachimuspa, sumaj ruwasqa p'achawan p'achallichillankitaj.

¹⁵ Jinaspataj, sacerdoteykuna kanankupaj aceitewan paykunata jawinki, imaynatachus tatankuta jawerqanki, ajinata. Aceitewan jawisqaykirayku paykuna, jinataj mirayninkuna wiñay wiñaynintinpaj sacerdoteykuna kanqanku, nispa.

¹⁶ Moisesqa Tata Diospa kamachisqanman jina tukuy imata kikinta ruwarqa.

¹⁷ Ajinaqa israelitakuna Egiptomanta llojsimusqankumanta iskay watanman, killa qallariy p'unchaypi Dioswan Tinkukuna Toldo sayachisqa karqa.

¹⁸ Moisesqa Dioswan Tinkukuna Toldota sayacherqa. Chukukunata churararqa, tablakunata sayaricherqa, jinaspataj k'aspinkunata pasacherqa, chaymantataj sayantakunata sayacherqa.

¹⁹ Chantá Moisesqa Tata Diospa kamachisqanman jina, Diospa tiyakunan kanan karqa, chay patanman toldota aysaspa, qhataykorqa.

²⁰ Chaymanta Moisesqa rumipi Diospa kamachisqan qhelqasqa karqa, chayta arcaman churaykorqa. Chantá arcaj ninrinkunamantaj k'aspita pasacherqa. Jinaspataj, kirpanawan arcata kirpaykorqa.

²¹ Chantá Moisesqa Tata Dios kamachisqanman jina, arcata Dioswan Tinkukuna Toldoman apaykorqa. Velota warkhuykuspataj, chaywan arcata pakaykorqa.

²² Chaymantataj mesata Dioswan Tinkukuna Toldoman apaykullarqataj, churarqataj Dioswan Tinkukuna Toldomanta wichaynejman, velomanta ñawpaqenman.

²³ Chay mesamantaj Tata Diospa ñawpaqenpi churana t'antata sumaj suk'asqata churarqa, Tata Dios payman kamachisqanman jina.

²⁴ Jinallataj Moisés Dioswan Tinkukuna Toldoman candelerota apaykullarqataj, churarqataj mesaj chimpanman, Dioswan Tinkukuna Toldoj urannejman.

²⁵ Chaymantataj Moisesqa Tata Dios kamachisqanman jina, Diospa ñawpaqenpi lamparakunata jap'ichillarqataj.

²⁶ Chantá Moisesqa Dioswan Tinkukuna Toldoman veloj ñawpaqenman, qorimanta ruwasqa altartapis churallarqataj.

²⁷ Chantá altar patapi k'achituta q'aparishaj inciensota q'oshñicherqa, Tata Dios payman kamachisqanman jina.

²⁸ Chaymantataj Moisesqa Dioswan Tinkukuna Toldo punkuman uj cortinata warkhuykorqa.

²⁹ Jinallataj Moisesqa Tata Dios kamachisqanman jina, Dioswan Tinkukuna Toldo punkuman uywa ñak'asqata q'olachina altarta churarqa. Chantá chay altar patapi uywa ñak'asqata, ch'aki mikhuy ofrendatawan Tata Diosman q'olacherqa.

³⁰ Chaymantaqa Dioswan Tinkukuna Toldowan, altarwan kashan, chaynejman jatun ch'illamita churaykorqa, chaymantaj mayllakunapaj yakuta junt'acherqa.

³¹ Moiseswan, Aaronwan, chantá churinkuna ima chaymanta yakuta wisispa makinkuta, chakinkuta mayllakoj kanku.

³² Tata Dios Moisesman kamachisqanman jina, sacerdotekuna Dioswan Tinkukuna Toldoman yaykunankupaj, jinallataj altarman qayllaykunankupaj chaypi mayllakoj kanku.

³³ Chaykunata ruwayta tukuytawan, Moisesqa Dioswan Tinkukuna Toldoj pationpa muyuyninta, altarpa muyuyninta ima cortinawan muyuykucherqa. Chaymantataj patioj punkuman uj cortinata churallarqataj. Ajinata Moisés chay tukuy imata ruwayta tukuycharqa.

Dioswan Tinkukuna Toldota phuyu p'ampaykun

³⁴ Chantá Dioswan Tinkukuna Toldota phuyu p'ampaykorqa, Tata Diospa jatun kayninpa lliphipiynintaj toldoman junt'aykorqa.

³⁵ Chayraykumin Moisesqa chayman mana yaykuyta aterqachu, imaraykuchus tukuyninta phuyu p'ampaykorqa. Tata Diospa jatun kayninpa lliphipiynintaj toldoman junt'aykorqa.

³⁶ Dioswan Tinkukuna Toldomanta phuyu oqharikojtintaj, israelitakuna tukuy imankuta oqharikuspa, purirej kanku.

³⁷ Mana phuyu oqharikojtintaj, israelitakuna puririnankupaj mana oqharikojchu kanku. Mayk'ajchus phuyu oqharikunanta suyaj kanku.

³⁸ P'unchayqa Tata Diospa phuyun Dioswan Tinkukuna Toldo patapi karqa, tutantaj nina k'anchay karqa. Ajinata israelitakunaqa tukuy puriyninkupi sapa p'unchay phuyuta, ninatawan rikorqanku.