Éxodo 37 - DIOSPA QHELQACHISQAN DEUTEROCANONICAL

Arcata ruwanku

¹ Chay jawa Besalelqa acacia maderamanta arca nisqa uj cajonta ruwallarqataj. Chayqa sayt'unman uj metro chunka centimetroyoj karqa, kinrayninmantaj sojta chunka phishqayoj centímetro. Sayayninmantaj sojta chunka phishqayoj centimetrollataj karqa.

² Besalel chay arcaj ukhunta, jawantapis sumaj qoriwan lluch'iykorqa, kantuntataj qorimanta jark'achata jina ruwaspa muyuykucherqa.

³ Chaymantataj arcaj tawantin chakinpaj qorimanta ninrita ruwaspa, iskayta qhepaman churarqa, iskaytataj ñawpajman.

⁴ Jinallataj acacia maderamanta iskay jatuchaj k'aspikunata ruwallarqataj, chantá qoriwan lluch'iykorqa.

⁵ Chaymantataj k'aspikunata qorimanta ninrikunanejta pasacherqa, wantuspa arcata apanapaj.

⁶ Chantataj sumaj qorimanta Khuyakuyta Tarina nisqa kirpanata ruwallarqataj. Sayt'unman uj metro chunka centimetroyoj karqa, kinrayninmantaj sojta chunka phishqayoj centímetro.

⁷ Khuyakuyta Tarina kirpanaj puraj kantunpi churanapajtaj qorimanta takaspa, iskay querubinkunata ruwarqa.

⁸ Ujninta uj kantuman sayacherqa, ujnintataj uj kantunman. Kirpanawan, iskaynin querubinkunawan imaqa ujlla ruwasqa karqanku.

⁹ Querubinkunaqa chimpanpura churasqa karqanku. Iskayninku Khuyakuyta Tarina nisqa kirpanata qhawashaj karqanku, lijrankuwantaj Khuyakuyta Tarina nisqa kirpanata qhatasharqanku.

T'antata churanapaj mesa

¹⁰ Chantá Besalelqa acacia maderamanta mesatañataj ruwarqa. Chay mesa sayt'unman jisq'on chunka centimetroyoj karqa, kinrayninmantaj tawa chunka phishqayoj centímetro. Sayayninmantajrí sojta chunka phishqayoj centímetro karqa.

¹¹ Chantá mesata sumaj qoriwan lluch'iykorqa, kantuntapis qorimanta jark'achata jina ruwaspa, muyuykucherqa.

¹² Mesaj tukukuyninpi muyuynenqa uj t'ajllu jina karqa, chaytataj qorimanta jark'achata jina ruwaspa, muyuykuchillarqataj.

¹³ Jinallataj qorimanta tawa ninrita ruwaspa, tawantin esquinanman churarqa, mesaj chakin kasharqa, chaynejman.

¹⁴ Qorimanta ruwasqa ninrikunaqa mesa urapi churasqa karqa. Chayninta k'aspita pasachispa, mesata wantunankupaj.

¹⁵ Mesata wantunapaj k'aspitaqa acacia maderamanta ruwarqa, jinaspataj, qoriwan lluch'iykorqa.

¹⁶ Imachus mesapi kananku karqa, chaykunatapis sumaj qorimanta ruwallarqataj: Chuwakunata, wisllakunata, yurukunata, qerukunata ima chaypi vino ofrendata ch'ajchunapaj.

Qorimanta candelero

¹⁷ Besalelqa sumaj qorimanta martillowan takaspa, uj candelerota ruwallarqataj: Jap'inanta, sayananta, t'ikanta, t'ika mut'unta, t'ikaman rijch'asqa puntanta ima. Chay tukuynin ujllapis kanman jina ruwasqa karqanku.

¹⁸ Candeleromantaqa sojta palqakuna llojserqa, sapa ladopitaj kinsa palqayojkama karqa.

¹⁹ Sayananmanta llojsej sojta palqaqa almendro t'ikaman rijch'asqa karqa. Sapa palqapitaj kinsa t'ika jina, t'ika mut'uyoj, phancharishaj t'ika ima karqa.

²⁰ Candeleroj sayananpi uramantapacha almendro t'ika jina tawa copayoj karqa, t'ika mut'uyoj, t'ika jina phancharishaj ima.

²¹ Ñawpaj kaj palqaj uranpeqa uj t'ika mut'u jina karqa. Jinallataj karqa iskay kaj palqaj uranpi kinsa kaj palqaj uranpipis.

²² Mut'ukuna, palqakuna imaqa candelerowan ujlla karqa. Chaytaqa martillowan takaspa, sumaj qorimanta ruwarqa.

²³ Jinallataj sumaj qorimanta qanchis lamparakunata ruwarqa. Pábilo allinchanata, ushpha jap'inatapis qorillamantataj ruwarqa.

²⁴ Lamparakunata, chantá tukuy imantawan sumaj qorimanta ruwaspa, kinsa chunka kinsayoj kilota jina tukorqanku.

Inciensota q'oshñichinapaj altar

²⁵ Jinallataj Besalelqa acacia maderamanta incienso q'oshñichina altarta ruwallarqataj. Altarqa puraj kantunman chhikachajkama karqa. Sayt'unman tawa chunka phishqayoj centímetro karqa, kinrayninman kikillantaj. Sayayninmanrí jisq'on chunka centimetroyoj karqa. Altarpa esquinanpi wajrakunaqa altarwan ujlla ruwasqa karqanku.

²⁶ Chaymantataj patanta, tawantin kantunta, wajrankunata ima sumaj qoriwan lluch'iykorqa. Chantá jark'achata jina qorimanta ruwaspa, chaywan altarpa kantunta muyuykucherqa.

²⁷ Chantá jark'achata jina churasqaj uranman qorimanta ruwasqa ninrikunata churarqa, ujnin esquinanman iskayta, ujnin esquinanmantaj iskayllatataj. Altarta wantunapaj k'aspikunatataj chayninta yaykuracherqa.

²⁸ Chay iskay k'aspikunata acacia maderamanta ruwarqa, chantá qoriwan lluch'iykorqa.

Diospaj t'aqana aceiteta, inciensotawan wakichinku

²⁹ Chaymantataj Besalelqa Diospaj t'aqanapaj jawina aceiteta ruwarqa. Jinallataj k'achituta q'apaj inciensotapis ruwallarqataj, imaynatachus sumaj q'apashaj jawinata ruwajkuna ruwanku, ajinata.