Éxodo 25 - DIOSPA QHELQACHISQAN DEUTEROCANONICAL

Dioswan Tinkukuna Toldota ruwanapaj

¹ Tata Dios Moisesta nerqa:

² Israelitakunata niy noqapaj t'aqasqa ofrendata apamunawankuta. Tukuy pichus ofrendata apamuyta munajkunaqa tukuy sonqomanta apamuchunku.

³ Paykunamanta ofrendata kay imakunata jap'inkichej: Qorita, qolqe metalta, cobreta,

⁴ anqa telata, puka telata, puka panti telata, linomanta awasqa sumaj telata, cabraj millmanta ima.

⁵ Jap'illankichejtaj apamusqanku pukaman tiñisqa mocho qarakunata, waj sumajnin kaj qarakunata ima. Kay imakunatapis apamullachunkutaj: Acacia sach'amanta kurkuta,

⁶ k'anchachinapaj aceiteta, jawina aceitepaj inciensopajwan ima sumajta q'apashaj imakunata.

⁷ Kay imakunatapis apamullachunkutaj ónice rumikunata, ashkha lliphirishaj rumikunatawan ima unkuman, chantá kuraj kaj sacerdotej pecheranman churanapaj.

⁸ Chaykunawan yupaychana toldota ruwapuwanqanku, noqa paykuna ukhupi tiyakunaypaj.

⁹ Tiyakunay toldota, jinataj chaypi tukuy imachus kajta, noqa rikuchisqayki, chayman jinapuni ruwanqanku, nispa.

Arca ruwanapaj kamachisqakuna

¹⁰ Tata Dios nillarqataj: Jinallataj israelitakunata niy: Arca nisqa cajonta acacia maderamanta ruwankichej. Arcaqa sayt'unman uj metro chunka centimetroyoj kanqa, kinrayninmantaj sojta chunka phishqayoj centimetroyoj, sayayninmantaj sojta chunka phishqayoj centimetroyoj kanqa.

¹¹ Chay cajonpa ukhunta, jawantawan sumaj qoriwan lluch'inki, kantuntataj q'empisqata jina qorillawantaj muyuykuchinki.

¹² Jinallataj sumaj qorimanta jatuchaj ninrita jina tawata ruwanki. Chaykunatataj tawantin chakinman churanki, iskayta ñawpajman, iskaytataj qhepaman.

¹³ Chantá acaciamanta iskay jatuchaj k'aspita ruwallankitaj, jinaspataj qoriwan lluch'iykunki.

¹⁴ Chay k'aspikunatataj qorimanta ruwasqa ninriman churanki, chaykunawan arcata wantunaykichejpaj.

¹⁵ Chay k'aspikunaqa arcaj ninrinkunapi churasqa kallanqapuni. Chaymanta ni pipis orqhonqachu.

¹⁶ Chantá arca ukhuman, p'alta rumipi qhelqasqa kamachisqakuna qosqayki, chayta churanki.

¹⁷ Arca kirpanata sumaj qorimanta ruwallankitaj. Sayt'unman uj metro chunka centimetroyoj kanqa, kinrayninmantaj sojta chunka phishqayoj centimetroyoj.

¹⁸ Chaymantaqa qorita martillowan takaspa, iskay querubinkunata ruwanki, chantá kirpanaj kantunman churanki.

¹⁹ Querubinkunawan, arcaj kirpananwanqa ujlla ruwasqa kanqanku. Uj kaj querubenqa ujnej kantupi kanqa, uj kajtaj ujnej kantupi.

²⁰ Querubinkunaqa Khuyakuyta Tarina nisqa kirpana patapi purajmanta qhawarinasqa kanqanku, lijrankuwan arcata ojllaykoj jina. Uyankupis kirpana qhawarisqa kanqa.

²¹ Chantá kirpanata arca pataman churanki. Arcaj ukhunmantaj rumipi noqaj qhelqasqay kamachisqakunata churanki.

²² Chaypi qanman rikhurisqayki, chantá Khuyakuyta Tarina nisqamanta, arca patapi kashanku, chay querubinkunaj chawpinmanta qanwan parlasaj. Willasqaykitaj israelitakunaman imatachus kamachisqayta.

Diospaj t'anta churana mesa

²³ Jinallataj acaciamanta uj mesata ruwanki. Chaytaj sayt'unman jisq'on chunka centimetroyoj kanqa, kinrayninmantaj tawa chunka phishqayoj centimetroyoj, sayayninmantaj sojta chunka phishqayoj centimetroyoj.

²⁴ Chantá sumaj qoriwan tukuyninta lluch'iykunki. Kantuntapis qorillawantaj q'empisqata jina muyuykuchinki.

²⁵ Jinallataj mesaman qanchis centímetro khuskanniyojta jina jark'achata jina churanki. Chantá kantunta q'empisqata jina qoriwan muyuykuchillankitaj.

²⁶ Ruwallankitaj qorimanta tawa ninrikunata, chaytataj mesaj tawantin chakinman churanki.

²⁷ Ninrikunaqa mesaj kantun chaypi churasqa kanqa, chayninta k'aspikunata pasachispa, mesata wantunapaj.

²⁸ Mesa wantuna k'aspikunataqa acaciamanta ruwanki, chaykunatataj qoriwan lluch'iykunki.

²⁹ Jinallataj mesaman churanapaj ruwanki, wisllakunata, chuwakunata, yurukunata, vino ofrendata jap'inapaj copakunatapis, chay tukuyninta sumaj qorimanta ruwanki.

³⁰ Chantá chay mesaman churanki noqaman qonawaykichej t'antata, chaytaj ñawpaqeypi kanallanpuni tiyan.

Qorimanta candelero

³¹ Jinallataj martillowan takaspa, sumaj qorimanta candelerota ruwanki. Ruwallankitaj candeleroj jap'inanta, sayananta, k'ancha churananta, t'ika mut'unta, t'ikankunata ima. Chaytaj ujllapis kanman jina sumaj qorimanta ruwasqa kanqa.

³² Candeleroqa sojta palqayoj kanqa, uj ladopi kinsa, uj ladopitaj kinsa.

³³ Sapa palqaqa almendra t'ika jina kanqa, mut'uyoj, t'ikayojtaj.

³⁴ Kikin candeleroj chawpinpi tawa copayoj kanqa, almendro t'ikaman rijch'asqa, mut'untin, t'ikantin ima.

³⁵ Sapa palqaj uranpitaj uj t'ika mut'uyoj kanqa. Ñawpaj palqakunaj uranpi, jinallataj iskay kaj uranpipis kallanqataj. Sojtantin palqakunaj uranpi ajina kanqa.

³⁶ Palqakuna, t'ika mut'unkuna imaqa candelerowan ujlla ruwasqa kanqa. Chantá sumaj qorimanta martillowan takaspa ruwasqa kanqa.

³⁷ Ruwallankitaj qanchis lamparakunata, chaykunatataj jap'ichispa, ñawpajman jina k'anchanankupaj churanki.

³⁸ Jinallataj pábilo k'utunata, ushpha jap'ina chuwitatapis qorillamantataj ruwanki.

³⁹ Candelerota, chantá imanchus kajtawanqa kinsa chunka kinsayoj kilo qorimanta ruwanki.

⁴⁰ Tukuy chaykunataqa Sinaí orqopi rikuchisqayman jina ruwanki.