Éxodo 24 - DIOSPA QHELQACHISQAN DEUTEROCANONICAL

Tata Dios israelitakunawan tratota ruwan

¹ Tata Dios Moisesta nerqa: Maypichus noqa kashani, chayman Aaronwan, Nadabwan, Abiuwan, chantá israelitakunamanta qanchis chunka kurajkunapiwan ima wicharimuy. Paykunaqa noqamanta karullapi qonqorikonqanku.

² Qanlla noqaman qayllamuwanki. Paykunarí karunejllapi kanqanku, nitaj waj runakuna qanwan jamonqankuchu, nispa.

³ Moisés chaymanta kutirispa, payman Tata Dios imatachus parlasqanta, kamachisqantataj runakunaman willarqa. Paykunataj uj similla kuticherqanku: Noqaykoqa Tata Diospa tukuy kamachisqanta ruwasqayku, nispa.

⁴ Chaymanta Moisesqa Tata Diospa tukuy nisqanta qhelqarqa. Q'ayantintaj tutamanta jatarispa, orqo k'uchupi chunka iskayniyoj rumiwan uj altarta jataricherqa. Jinallataj chunka iskayniyoj rumita sayacherqa, sapa jatun ayllumanta uj rumi karqa.

⁵ Chantá Moisesqa waynakunata kacharqa, torillokuna ñak'asqata q'olachispa, Tata Diosman jaywanankupaj. Jaywallarqankutaj k'achata kawsakuy jaywanatapis.

⁶ Moisestaj torillokuna ñak'asqaj yawarninmanta khuskanta jap'ispa, juch'uy ch'illamipi jallch'arqa. Khuskan yawarwantaj altar ruwasqanta ch'ajchorqa.

⁷ Jinaspataj, trato ruwasqamanta qhelqata runakunaj uyarinankuta ñawirerqa. Runakunataj nerqanku: Noqaykoqa Tata Diospa tukuy kamachisqanta kasusqayku, nispa.

⁸ Chantá Moisés yawarta jap'iytawan, runakunata ch'ajchuspa, nerqa: Kay yawarwanmin Tata Diosqa qankunawan trato ruwasqanta sut'inchan, tukuy kay nisqaman jina, nispa.

⁹ Chaymanta Moisesqa Aaronwan, Nadabwan, Abiuwan, israelitakunamanta qanchis chunka kurajkunawan khuska orqoman wicharerqa.

¹⁰ Chaypitaj Israelpa Diosninta rikorqanku. Chakin urapitaj safiromantapis pampan ruwasqa kanman jina lliphipirishajta, janajta jina pichasqata rikorqanku.

¹¹ Diosqa israelitakunaj kurajninkunata mana imanarqachu. Paykunaqa Diosta rikorqanku, chantá mikhorqanku, ujyarqankutaj.

Moisés Sinaí orqoman wicharin

¹² Chaymanta Tata Dios Moisesta nerqa: Maypichus noqa kashani, kay orqoman wicharimuy, chantá chaypi suyaway. Noqataj p'alta rumipi kamachisqakuna qhelqasqayta israelitakuna yachanankupaj qosqayki, nispa.

¹³ Chantá Moisesqa yanapajnin Josuewan khuska Diospa orqonman wicharerqa.

¹⁴ Kurajkunatataj Moisés nerqa: Kutimunaykukama kayllapi suyashawayku. Kaypi qankunawan Aaronwan, Jurwan ima qhepakushanku. Pejpatapis imamanta quejan kanman chayqa, paykunaman richunku, nispa.

¹⁵ Chantá Moisesqa orqo pataman wicharerqa, phuyutaj chay orqota p'ampaykorqa.

¹⁶ Jinapi Tata Diospa jatun kayninpa lliphipiynin Sinaí orqoman urayk'amorqa. Chay phuyoqa orqota sojta p'unchayta p'ampaykorqa, qanchis kaj p'unchaypitaj Tata Dios phuyu ukhumanta Moisesta wajyamorqa.

¹⁷ Tata Diospa jatun kayninpa lliphipiynintaj nina lawrarishaj jina israelitakunaj rikunankuta rikhurimorqa.

¹⁸ Moisestaj phuyu ukhuman yaykuspa, orqoman wicharerqa. Chaypitaj payqa tawa chunka p'unchayta, tawa chunka tutatawan qhepakorqa.