Éxodo 21 - DIOSPA QHELQACHISQAN DEUTEROCANONICAL

Wata runakunata runata jina qhawana

¹ Tata Dios Moisesta kay jinata nerqa: Kay kamachisqakunata israelitakunaman rejsichinki.

² Sichus israelita masiykita wata runata jina rantikunki chayqa, sojta watata makiykipi kanqa. Qanchis kaj watapitaj mana mashkhatapis pagachikuspa, kacharipunki.

³ Sichus sapallan wata runa jina yaykorqa chayqa, sapallan llojsiponqa. Sitajchus warmiyoj yaykorqa chayqa, warminwan khuska riponqa.

⁴ Sichus patronnin wata runanta casaracherqa chayqa, chay warmipitaj qhari wawankuna, warmi wawankuna ima kanman karqa chayqa, warmin, jinataj wawankunawan patronninpata kanqanku. Wata runatajrí sapallan llojsiponqa.

⁵ Sitajchus wata runa ninman: Noqaqa patronniyta, warmiyta, wawaykunatapis munakuni. Chayrayku mana ripuyta munanichu, nispa chayqa,

⁶ patronnin chay wata runata Diosta yupaychana cheqaman pusanqa. Chantá punkuman, chayrí punku sayantaman k'askachispa, ninrinta jusk'onqa. Ajinamanta chay wata runaqa wiñaypaj patronninpa wata runan kanqa.

⁷ Sichus pillapis ususinta wata runa kananpaj vendenman chayqa, mana llojsiponqachu imaynatachus qhari wata runakuna llojsipunku, jinataqa.

⁸ Sichus patronnin mana paywan casarayta munanchu mana payta munasqanrayku chayqa, wajkuna pagaspa kacharichinankuta saqellanqa. Manataj waj llajtayojman vendeyta atenqachu.

⁹ Chaywanpis sichus patronnin payta churinwan casarachenqa chayqa, ususinta jina qhawanqa.

¹⁰ Sichus patronnin chay warmiwan casarasqa kashaspa, waj warmiwan casarallanmantaj chayqa, ñawpa warminmanta mana mikhunata, ni p'achatapis pisiyachenqachu. Chantá qosaqa ñawpa warminwan maychus puñukunanta puñukullanqapuni.

¹¹ Sichus kay kinsa imakunata mana qonmanchu chayqa, warmenqa mana ni imata pagaspa, llojsiponqa, nispa.

Runa wañuchejkunata jasut'inapaj kamachisqakuna

¹² Tata Dios nillarqataj: Sichus pipis runa masinta maqaspa wañuchin chayqa, paypis wañuchisqallataj kanqa.

¹³ Sichus pipis runa masinta mana yuyashaspa wañuchinman, noqapuni jina kananta munasqayrayku chayqa, noqa nisqayki maymanchus pakakoj ayqekunanta.

¹⁴ Chaywanpis sichus pipis runa masinwan phiñakuspa, mana khuyarikuspataj, wañurparichinman chayqa, altarniy chaynejpipis pakakuchun, wañuchisqapuni kanan tiyan.

¹⁵ Pichus tatanta, chayrí mamanta maqajqa wañuchisqa kanqa.

¹⁶ Sichus pipis runa masinta suwaspa vendenman, chayrí sichus suwasqa runa makillanpiraj kashanman chayqa, chay runa suwa wañuchisqa kanqa.

¹⁷ Jinallataj sichus pipis tatanta, chayrí mamanta maldicinman chayqa, wañuchisqallataj kanqa.

¹⁸ Nisunman iskay runakuna maqanakushaspa, ujnin sajmaspa, chayrí rumiwan ch'anqaspa k'irirparinman, manataj chay runa wañunmanchu, manachayqa camachakunman.

¹⁹ Chantá sichus alliymanta chay nanasqa runa sayarispa, tojnuwan puririnman chayqa, pichus jinata ruwajqa mana juchachasqachu kanqa. Chaywanpis jampichinan tiyan. Chantá mashkha unaytachus mana imata ruwaspa kasqanmanta kutichipunan tiyan.

²⁰ Sichus mayqen patronpis qhari wata runanta, chayrí warmi wata runanta k'aspiwan wajtaspa wañuchinman chayqa, wata runanta wañuchisqanmanta jasut'isqa kanqa.

²¹ Sichus wata runan uj p'unchayta, chayrí iskay p'unchaytawan kawsanmanraj chayqa, patronqa mana jasut'isqachu kanqa, imaraykuchus wata runaqa paypata karqa.

²² Sichus iskay maqanakushaspa, uj onqoj warmita sajmaspa chayrí jayt'aspa jap'irparichinkuman chayqa, chaypacha ajinata ruwanqanku: Sichus warmi sullurparinman, manataj wañunmanchu chayqa, juchayoj kaj, warmej qosan mashkhatachus nisqanta, jinataj juezkunaj nisqankuman jina paganan tiyan.

²³ Sitajchus warmi wañunman chayrí, wañuchejqa wañuchisqallataj kanqa.

²⁴ Sichus pejpa ñawinta sururparichenqa chayqa, paytapis ñawinta suruchillanqankutaj, kirunta p'akerqa chayqa, paypatapis uj kirunta p'akillanqankutaj, makinmanta makinwan, chakinmanta chakinwan paganqa.

²⁵ Jinallataj pitachus ruphachejqa ruphachisqallataj kanqa, nanachejqa nanachisqallataj kanqa, q'oyullata ruwajqa paypis q'oyuyachisqallataj kanqa.

²⁶ Sichus mayqenpis qhari wata runanta, chayrí warmi wata runanta sajmaspa uj ñawinta sururparichinman chayqa, lerq'oyachisqanrayku wata runanta kacharipunan tiyan.

²⁷ Sitajchus maqaspa kirunta phawachinman chayqa, kirunta phawachisqanrayku wata runanta kacharipunan tiyan.

Uywayojkuna imachus ruwanankumanta

²⁸ Sichus waka uj qharita, chayrí warmita wajraspa wañuchinman chayqa, wakata rumiwan ch'anqaspa wañuchinkichej. Aychantarí ni pi mikhonqachu. Wakayojtaj runa wañusqanmanta mana juchachasqachu kanqa.

²⁹ Sichus chay waka wajrakojpuni, dueñontaj yachashaspa mana wisq'arqachu, sitajchus chay waka pitapis wajraspa wañuchinman chayqa, chay wakata rumiwan ch'anqaspa wañuchinkichej. Wakayojpis wañuchisqallataj kanqa.

³⁰ Sitajchus wakayoj mana wañuchisqa kananpaj wañojpa ayllun wakayoj mashkhatachus pagananta ninkuman chayqa, wakayojqa nisqankuta paganan tiyan.

³¹ Sichus waka uj waynuchuta, chayrí uj sipakuta wajranman chayqa, kay kamachisqaman jina ruwankichej.

³² Sichus waka uj qhari wata runata, chayrí uj warmi wata runata wajranman chayqa, chay wakata rumiwan ch'anqaspa wañuchichunku. Wakayojtaj wata runaj patronninman kinsa chunka qolqeta pagapuchun.

³³ Sichus mayqenpis uj pujyuta allaspa, mana kirpasqallata saqenman, chaymantaj pejpa wakanpis, chayrí burronpis urmaykunman chayqa,

³⁴ pujyuyojqa wakayojman, chayrí burroyojman paganan tiyan. Chantá wañusqa uywataj pujyuyojpaj kanqa.

³⁵ Sichus mayqenpa wakan wajpa wakanta wajraspa wañuchinman chayqa, wajrayta yachaj wakata vendespa, qolqeta khuskanmanta rak'inakunanku tiyan. Wañusqa wakaj aychantapis kikillantataj iskayninku rak'inakonqanku.

³⁶ Sichus chay waka wajrayta yachajpuni chayqa, dueñontaj yachashaspa mana wisq'anmanchu chayqa, wañusqa wakayojman kawsashaj wakata qoponqa. Kawsashaj wakayojtaj wañusqa wakawan qhepakaponqa.