Éxodo 20 - DIOSPA QHELQACHISQAN DEUTEROCANONICAL

Chunka kamachisqakuna

¹ Chantá Dios parlaspa, kay kamachisqakunata israelitakunaman rejsicherqa:

² Noqa Tata Diosniyki kani, pichus Egiptopi wata runa kashajtiyki orqhomorqayki, chay.

³ Noqamanta jawa ama waj dioskuna kapusuchunchu.

⁴ Ama ni imaman rijch'akoj lantita ruwakunkichu, ni janajpi kajman, ni kay pachapi kajman, nitaj yakupi kajkunaman rijch'akojta.

⁵ Amallataj chaykunaman qonqorikunkichu, nillataj yupaychankichu, imaraykuchus noqamin Tata Diosniyki kani. Noqa celoso kani mana munanichu chay lantikunata yupaychanaykichejta. Noqata chejnikuwaj tata mama juchallisqankumanta imachus kananta chayachisaj, wawankuman, allchhinkuman, chantá allchhinkoj wawankuman ima.

⁶ Kamachisqayta junt'ajkunata, munakuwajkunatarí, mirayninkumanta waranqa waranqata noqa khuyakuywan qhawasaj.

⁷ Ama Tata Diosniykej sutinta yanqhata oqharinkichu. Pichus sutiyta yanqhata oqharejtaqa, mana qhawakullasajchu.

⁸ Samarina p'unchayta ama qonqankichu, noqapaj t'aqasqa p'unchayniy kasqanrayku.

⁹ Sojtantin p'unchayta llank'anki, chay p'unchaykunapitaj tukuy ima ruwanaykita ruwanki.

¹⁰ Qanchis kaj p'unchayrí, samarina p'unchay kanqa, noqapaj t'aqasqa p'unchaymin. Chay p'unchayqa ama ni ima ruwanaykita ruwankichu ni qan, ni churiyki, ni ususiyki, ni qhari kamachiyki, ni warmi kamachiyki, ni uywaykikuna, nitaj qankunawan tiyakoj waj llajtayojpis.

¹¹ Chayqa ajina kanqa imajtinchus noqa sojta p'unchaypi janajta, kay pachata, mama qochata ima ruwarqani. Jinataj chaykunapi imachus tiyan, chaykunatawan ruwarqani. Qanchis kaj p'unchaypitaj samarikorqani. Chayrayku noqa Tata Dios samarina p'unchayta saminchaspa, noqallapaj t'aqarqani.

¹² Tataykitawan, mamaykitawan ima sumaj respetowan qhawakuy. Ajinata ruwanki chayqa, Tata Diosniyki jallp'ata qosonqa, chaypi unayta kawsakunki.

¹³ Ama runa masiykita wañuchinkichu.

¹⁴ Ama warmiykita nitaj qosaykita wasanchankichu.

¹⁵ Ama suwankichu.

¹⁶ Ama runa masiykej contranta llullakuspa parlankichu.

¹⁷ Ama runa masiykej wasinta, ni warminta, ni qhari kamachinta, ni warmi kamachinta munapayankichu, jinallataj ni wakanta, ni burronta, nitaj ni iman kajtapis munapayankichu, nispa.

Israelitakuna manchachikunku

¹⁸ Chaypacha tukuy israelitakuna llijurishajta illapata rikorqanku, pututoj waqasqanta uyarerqanku, chantá orqopi q'oshñita rikorqanku. Chayrayku mayta manchachikuspa, karullapi sayarqanku.

¹⁹ Chantá Moisesta nerqanku: Qanlla parlawayku, noqaykutaj kasusqayku. Sichus Dios noqaykuwan parlanman chayqa, wañuykumanchari, nispa.

²⁰ Moisestaj paykunata nerqa: Ama manchachikuychejchu. Diosqa sonqoykichej imaynachus kasqanta yachaj jamun, qankuna payta manchachikuspallapuni kanaykichejpaj, amataj juchallinaykichejpaj, nispa.

²¹ Israelitakuna karullapi kashanankukamarí, Moisés laqhayarishaj phuyuman qayllaykorqa, maypichus Dios kasharqa, chayman.

Diosqa imaynatachus altarta ruwanankuta nin

²² Chantá Tata Diosqa Moisesta nerqa: Israelitakunata kay jinata niy: Qankunaqa janaj pachamantapacha imaynatachus parlasqayta rikunkichej.

²³ Ama qolqe metalmanta, nitaj qorimanta dioskunata ruwakuspa, noqata jina yupaychankichejchu.

²⁴ Altartaqa jallp'amanta ruwapuwankichej. Chay patapitaj apamuwasqaykichej wakata, ovejata ñak'aytawan q'olachispa, jaywawankichej. K'achata kawsakuy jaywanatapis jaywallawankichejtaj. Noqataj maynejpichus yupaychanawaykichejpaj ajllakusaj, chayman jamuspa, allin rinasuykichejpaj saminchasqaykichej.

²⁵ Sichus rumimanta altarta ruwapuwankichej chayqa, ama ch'eqosqa rumiwanchu ruwapuwankichej. Herramientawan ch'eqosqa rumeqa manaña noqata yupaychanawaykichejpaj jinachu kanqa.

²⁶ Altarniytaqa amallataj patillayojtachu ruwankichej, chayninta wicharishajtiykichej ama qhapaykichej rikukunanpaj, nispa.