Éxodo 19 - DIOSPA QHELQACHISQAN DEUTEROCANONICAL

Tata Dios, Sinaí orqopi israelitakunawan tratota ruwan

¹ Israelitakuna Egiptomanta llojsimusqankumanta kinsa kaj killa qallariypi Sinaí ch'innejman chayarqanku.

² Paykuna Refidinmanta puririspataj, Sinaí ch'innejman chayarqanku. Chantá Sinaí orqo k'uchupi jarakorqanku.

³ Chaymantataj Moisesqa Dioswan parlaj orqoman wicharerqa. Tata Diostaj orqomantapacha payta wajyaspa, nerqa: Jacobpa miraynin israelitakunaman kay jinata willanki:

⁴ Qankunaqa Egipto llajtayojkunata imatachus ruwasqayta rikorqankichej. Rikullarqankichejtaj ankaj lijranpi jina, maypichus noqa kashani, kayman qankunata apamusqayta.

⁵ Kunantaj sichus nisqayta uyarinkichej, trato ruwasqaytapis junt'ankichej chayqa, qankuna tukuy ayllumanta aswan sumaj aylluy kankichej. Kay pachaqa noqajtamin.

⁶ Qankuna sacerdoteykuna kankichej, munasqaytapuni ruwanapaj t'aqasqa runakuna. Ajinata nispa, israelitakunaman willamuy, nispa.

⁷ Chaymanta urayk'uspa, Moisés tukuy kurajkunata tantachispa, paykunaman Tata Dios imatachus nisqanta willarqa.

⁸ Chayta uyarispataj, tukuynin israelitakuna uj kunkalla nerqanku: Tata Diospa tukuy nisqanta kasusqayku, nispa. Moisestaj orqoman kutispa, israelitakuna imatachus nisqankuta Tata Diosman willamorqa.

⁹ Chantá Tata Dios payta nerqa: Noqa yanayarishaj phuyupi qanwan parlaj jamusaj. Ajinamanta israelitakuna qanwan parlasqayta uyarenqanku, wiñaypaj qanmanta ama iskayrayanankupaj, nispa. Chantá Moisés israelitakuna imatachus nisqankuta uj kutitawan Tata Diosman willallarqataj.

¹⁰ Chantá Tata Dios Moisesta nillarqataj: Rispa, israelitakunata niy kunan q'ayatawan ima llimphuchakunankuta. Jinallataj niy p'achankuta t'ajsakunankuta.

¹¹ Minchhapaj wakichisqa kachunku, imaraykuchus minchhata noqaqa tukuy israelitakunaj rikunankuta Sinaí orqoman urayk'amusaj.

¹² Orqoj muyuyninman señalkunata churanki, ninkitaj ama ni pi orqoman wicharimunanta, nitaj señal churasqaykiman qayllaykunanta. Pichari orqoman qayllaykojqa wañuchisqa kanqa.

¹³ Pichus orqoman qayllaykojtaqa ama pipis llankhanqachu. Uywapis kachun, chayrí runapis kachun, runakunaqa rumiwan ch'anqaykuspa chayrí arcowan flechaspa wañuchenqanku. Orqomanqa maypachachus pututu waqanqa, chaypachalla runakuna wichariyta atenqanku, nispa.

¹⁴ Chantá Moisés orqomanta urayk'amuspa, runakunata Diosta yupaychanankupaj wakicherqa. Paykunataj p'achankuta t'ajsakorqanku.

¹⁵ Chantá nillarqataj: Minchhapaj sumaj wakichisqa kanaykichej tiyan. Chayrayku ama warmiykichejwanpis puñunkichejchu, nispa.

¹⁶ Minchhantin sut'iyamuyta lliuj lliujkuna, illapa ima karqa. Uj phuyutaj yanayarishaj orqoman tiyaykorqa. Pututu sinch'ita waqashajtintaj, israelitakunaqa manchachikuspa, kharkatiterqanku.

¹⁷ Moisestaj tukuyninkuta toldonkumanta jawaman pusarqa Dioswan tinkukunankupaj. Chantá orqo k'uchupi sayarqanku.

¹⁸ Tukuynin Sinaí orqo q'oshñisharqa, imaraykuchus Tata Diosqa nina chawpipi orqoman urayk'amorqa. Q'oshñeqa hornomanta jina llojsisharqa, tukuynin orqotaj manchayta kharkatiterqa.

¹⁹ Pututoqa astawan, astawan sinch'ita waqasharqa. Moisés Dioswan parlashajtintaj, Diosqa manchay jatunmanta parlaspa kuticherqa. Parlasqanqa qhon qhon jina karqa.

²⁰ Chantá Tata Diosqa Sinaí orqo pataman urayk'amorqa. Jinaspataj Moisesta orqo pataman wicharinanpaj wajyarqa. Paytaj rerqa.

²¹ Chaymanta Tata Diosqa Moisesta nerqa: Urayk'uspa, runakunata nimuy noqata rikuwayta munaspa, señal churasqaykita amapuni pasanankuta. Pasankumanchus chayqa, ashkha wañunkuman.

²² Noqaman qayllaykamuwaj sacerdotekunapis llimphupaj qhawasqa kanankupaj llimphuchakuchunku, ama paykunata wañuchinaypaj, nispa.

²³ Chantá Moisesqa Tata Diosman kuticherqa: Israelitakunaqa mana Sinaí orqoman wicharimonqankuchu, imajtinchus qan kamachiwarqayku orqoj muyuyninman señalkunata churanaykuta, chaynejqa qanpaj t'aqasqa kasqanrayku, nispa.

²⁴ Tata Diostajrí Moisesta nerqa: Qan urayk'uy, chantá qan, Aaronwan ima kayman kutimunkichej. Sacerdotekunawan, runakunawanrí señalta pasaspa, noqa kashani, chayman ama wicharimuchunkuchu. Wicharimunkuman chayqa, noqa paykunata wañurachiyman, nispa.

²⁵ Moisestaj orqomanta urayk'uspa, israelitakunaman kikinta willarqa.