Éxodo 17 - DIOSPA QHELQACHISQAN DEUTEROCANONICAL

Chhankamanta yaku llojsin

¹ Chay qhepata tukuynin israelitakuna Sin nisqa ch'innejmanta purirerqanku. Tata Dios kamachisqanman jina sayaspa, sayaspa rerqanku. Chantá Refidinman chayaspa, jarakorqanku. Chaypitaj yaku ujyanankupaj mana karqachu.

² Chayrayku israelitakuna phiñarikuspa, Moisesta nerqanku: Ujyanaykupaj yakuta qowayku, nispa. Moisestajrí paykunata nerqa: Imaraykutaj noqamanta yakuta mañakushawankichejri? Imaraykutaj Tata Dios atiyniyoj kasqanmanta iskayrayashankichejri? nispa.

³ Chaywanpis israelitakunaqa manchay yaku ch'akiywan kaspa, Moisespaj thutorqanku: Ima nispataj Egiptomanta orqhomuwarqaykuri? Wawaykuta, uywaykutawan yaku ch'akiymanta wañuchinawaykupajchu kayman pusamuwayku? nispa.

⁴ Chantá Moisesqa Tata Diosmanta mañakorqa: Imanasajtaj kay runakunawanri? Tumpamantawan rumiwan ch'anqaspa, wañuchiwanqanku, nispa.

⁵ Chantá Tata Diosqa Moisesta nerqa: Israelitakunamanta ñawpaykuy, pusaytaj paykunamanta wakin kurajkunata. Nilo mayuta wajtarqanki, chay varaykitapis apallankitaj.

⁶ Noqatajrí Horeb orqopi, chhanka chaynejpi suyasqayki. Qantaj chaypi chhankata varaykiwan wajtanki, yakutaj ujyanankupaj chaymanta llojsimonqa, nispa. Moisestaj israelitakunaj kurajninkukuna qhawashajtinku, chayta ruwarqa.

⁷ Chantá chaynejta “Meriba” sutiwan suticharqa, chaypi israelitakuna Moisespaj rimasqankurayku. Jinallataj chay cheqata sutichallarqataj “Masah”, nispa. Ajinata suticharqa, imaraykuchus chaypi Tata Diosmanta iskayrayarqanku: Noqanchejwanchu Tata Dios kashan, manachu? nispa.

Amalecitakunawan maqanakunku

⁸ Israelitakuna Refidinpi kashajtinku, amalecitakuna paykunawan maqanakoj llojsiykamorqanku.

⁹ Chantá Moisés Josueta nerqa: Qharikunamanta wakinta ajllaspa, amalecitakunawan maqanakoj riy. Noqataj q'aya orqo patapi kashasaj, Diospa qowasqan varata pataman oqharispa, nispa.

¹⁰ Jinapi Josueqa Moisespa nisqanman jina, amalecitakunawan maqanakoj rerqa. Chaykama Moiseswan, Aaronwan, Jurwan ima orqo pataman wicharerqanku.

¹¹ Moisés makinta pataman oqharejtin, israelitakuna amalecitakunata atipasharqanku. Moisés makinta urayk'uchejtinrí, amalecitakunañataj israelitakunata atipasharqanku.

¹² Moisespa makin utiykusqanrayku, uj rumita churaspa chaypi Moisesta tiyacherqanku. Aaronwan, Jurwantaj sapa uj Moisespa makinta pataman jap'erqanku. Ajinamanta Moisesqa inti chinkaykunankama makinta oqharispallapuni karqa.

¹³ Josuetaj amalecitakunata espadawan wañurachispa atipaykorqa.

¹⁴ Chantá Tata Dios Moisesta nerqa: Kayta sapa kuti yuyarinapaj uj p'anqaman qhelqay. Josuemantaj kay jinata niy: Qhepanejman noqa kay pachamanta tukuy amalecitakunata chinkachinayta, nispa.

¹⁵ Chantá Moisés chaypi Tata Diospaj uj altarta ruwarqa, suticharqataj: “Tata Diosmin ñawpajta rej”, nispa.

¹⁶ Jinaspataj Moisés nerqa: Amalecitakuna Tata Diospa contranta oqharikusqankurayku Tata Diosqa wiñaypajmin paykunawan maqanakonqa, nispa.