Éxodo 16 - DIOSPA QHELQACHISQAN DEUTEROCANONICAL

Tata Dios israelitakunaman mikhunata qon

¹ Elimmanta tukuynin israelitakuna puririspa, Sin nisqa ch'innejman chayarqanku. Chayqa Elimwan Sinaí orqowan chawpipi kashan. Chay karqa Egiptomanta llojsimusqankumanta killa khuskanniyojña kashajtin.

² Chaypi israelitakunaqa Moisespaj, Aaronpaj ima thutorqanku.

³ Nerqanku: Allin kanman karqa Egiptopi Tata Diospa makinpi wañunayku. Jaqaypeqa ashkha aychayoj mankaj ñawpaqenpi tiyarikoj kayku, t'antatapis sajsakunaykukama mikhoj kayku. Qankunarí kay jina ch'inman pusamuwayku, yarqhaymanta wañuchinawaykupaj, nispa.

⁴ Chantá Tata Dios Moisesta nerqa: Noqa janajmanta mikhunata parachimusaj. Sapa p'unchay israelitakuna toldonkumanta llojsispa, uj p'unchay mikhunankupaj jinalla pallakonqanku. Ajinamanta yachasaj kamachisqayta kasonqankuchus, manachus, chayta.

⁵ Sojta kaj p'unchaytatajrí, q'ayantin mikhunankupaj uj jinatawan pallakonqanku, nispa.

⁶ Chantá Moiseswan, Aaronwan ima israelitakunata nerqanku: Kunan manaraj inti yaykushajtin, Egiptomanta qankunata Tata Diosmin orqhomususqanta yachankichej.

⁷ Tutamanta Tata Diospa jatun kayninpa lliphipiyninta rikunkichej. Payqa paypaj rimasqaykichejta uyarisunkichej. Noqaykurí, pitaj kayku, noqaykupaj thutunaykichejpajri? nispa.

⁸ Moisés nillarqataj: Tata Diosqa manaraj inti yaykuyta mikhunaykichejpaj aychata qosonqachej, tutamantataj ashkha t'antata qosonqachej. Chayta ruwanqa, imaraykuchus Diosqa paypa contranpi thutusqaykichejta uyarisunkichej. Noqaykurí, pitaj kayku? Qankunaqa mana noqaykoj contraykutachu thutorqankichej, manachayqa Tata Diospa contranta, nispa.

⁹ Chantá Moisés Aaronta nerqa: Niy tukuy israelitakuna Tata Diosman qayllaykamunankuta, imaraykuchus Diosqa paypaj rimasqankuta uyarin, nispa.

¹⁰ Aarón israelitakunawan parlashajtin, chaypacha tukuyninku ch'innejta qhawarerqanku. Chantá Tata Diospa jatun kayninpa lliphipiynin phuyupi rikhurisqanta rikorqanku.

¹¹ Chantá Tata Dios Moiseswan parlaspa, nerqa:

¹² Noqa uyarini israelitakuna noqapaj thutusqankuta. Chayrayku paykunata kay jinata ninki: Manaraj inti yaykuyta aychata mikhunkichej, tutamantataj t'antata sajsakunaykichejkama mikhunkichej. Ajinapi noqamin Tata Dios qankunaj Diosniykichej kasqayta yachankichej, nispa.

¹³ Chantá chay tardepacha yuthu israelitakunaj tukuy jarankuman tiyaykuspa, junt'aykorqa, sut'iyaytataj chhulla jina jarankoj muyuyninpi rikhurerqa.

¹⁴ Chhulla ch'akipojtintaj, tukuy pampapi rit'i jina yurajlla rikhurerqa.

¹⁵ Chayta rikuspa, israelitakuna ujkuna ujkuna ninakorqanku: Imataj kayri? nispa, imaraykuchus mana yacharqankuchu imachus kasqanta. Chantá Moisés paykunata nerqa: Kay t'antatamin Tata Dios mikhunaykichejpaj qosunkichej.

¹⁶ Tata Dios ajinata nisunkichej: Sapa ujniykichej mikhunaykichejpaj jinalla pallakuychej. Chantá wasipi mashkhachus kasqaykichejman jina, sapa ujpaj iskay kilota jina pallankichej, nispa.

¹⁷ Israelitakunaqa Moisespa nisqanta ruwarqanku. Wakenqa ashkhata pallakorqanku, wakintaj pisillata.

¹⁸ Chaywanpis pallasqankuta chimpojtinku, ashkhata pallakojpaj mana puchorqachu, nitaj pisillata pallakojpajpis piserqachu. Sapa ujninku mashkhatachus mikhunankupaj jinalla pallakorqanku.

¹⁹ Chantá Moisés nillarqataj: Ama pipis q'ayantinpaj jallch'akunkichejchu, nispa.

²⁰ Chaywanpis wakenqa Moisesta mana kasorqankuchu, q'ayantin mikhunankupaj jallch'akorqanku. Jallch'akusqankutajrí khuruykuspa, asnaykorqa. Chaymanta Moisesqa paykunapaj phiñakorqa.

²¹ Sapa paqarin sapa uj mashkhatachus mikhuyta yachasqankuman jinalla pallakoj kanku. Pampapi puchojtaj inti q'oñimojtinkama, unuyarparipoj.

²² Sojta kaj p'unchaypitaj uj jinatawan pallakuyta aterqanku, sapa uj tawa kilota jina. Chayta rikuspa, israelitakunaj kurajninkukunaqa mashkhatachus pallakusqankuta Moisesman willarqanku.

²³ Moisestaj paykunata nerqa: Tata Dios ajinata kamachin: Q'ayaqa samarina p'unchay kashan, chay p'unchaytaj Tata Diospaj t'aqasqa. Chayrayku kunan chayachiychej imatachus chayachinaykichejta, t'impuchiychejtaj imatachus t'impuchinaykichejta. Chantá puchoj mikhunata q'ayapaj waqaychaychej, nispa.

²⁴ Moisespa nisqanman jina, israelitakuna puchusqan mikhunata q'ayantin mikhunankupaj waqaychakorqanku. Chayqa manaña khuruykorqachu, nitaj asnaykorqachu.

²⁵ Chaymanta Moisés nerqa: Kunanqa samarina p'unchay, Tata Diospaj t'aqasqa p'unchaymin. Kay p'unchaypi mana pampapi mikhunata tarinkichejchu. Chayrayku qayna jallch'akusqaykichej mikhunata mikhuychej.

²⁶ Sojta p'unchayta sapa paqarin mikhunata pallakullankichej. Qanchis kaj p'unchayrí samarina p'unchay, chay p'unchaypeqa mana imapis kanqachu, nispa.

²⁷ Jinapis wakin israelitakuna samarina p'unchaypi pallakoj llojserqanku, nitaj imatapis tarerqankuchu.

²⁸ Chayrayku Tata Dios Moisesta nerqa: Mayk'ajkamataj qankuna kamachisqayta, yachachisqayta ima mana kasuyta munankichejchuri?

²⁹ Yuyarikuychej noqa Tata Dios samarinapaj uj p'unchayta qoykichej. Chayrayku sojta kaj p'unchaypi mikhunataqa iskay p'unchaypaj qosqaykichej. Ajinaqa sapa ujniykichej toldoykichejpi qhepakunaykichej tiyan, samarina p'unchayta ama toldoykichejmanta llojsinaykichejpaj, nispa.

³⁰ Chantá israelitakunaqa qanchis kaj p'unchaypi samarikorqanku.

³¹ Pallakusqankuta israelitakunaqa “maná”, nispa suticharqanku. Pallakoj kanku chayqa, culantro mujuman rijch'akoj karqa, yurajsitu, misk'itaj. Q'apaynintaj abeja misk'iyoj t'antapis kanman jina karqa.

³² Chaymanta Moisés israelitakunata nerqa: Tata Dios ajinata kamachin: Maná nisqata iskay kilota waqaychaychej, wawaykichejkuna yachanankupaj Egiptomanta qankunata orqhomushaspa, ima t'antatachus mikhuchisqayta, nispa.

³³ Chantá Moisés Aaronta nerqa: Iskay kilo yaykoj mankaman chay “maná” nisqata churay. Chaytataj Tata Diospa ñawpaqenman churanki. Ajinamanta wawanchejkuna maná nisqa t'antata rejsinankupaj waqaychasqa kanqa, nispa.

³⁴ Chantá Aaronqa Diospa arcanpa ñawpaqenman maná nisqayoj mankata churarqa, Tata Dios Moisesman kamachisqanman jina.

³⁵ Chaymantapacha israelitakunaqa tawa chunka watata maná nisqa t'antata mikhorqanku. Mikhorqanku runa karqaña chaynejman chayanankukama. Chayqa Canaán suyoj mojonninña karqa.

³⁶ Israelitakunaqa maná nisqata gomer nisqa chimpunawan chimporqanku. Uj gomertaj iskay kilo jina karqa.