Éxodo 14 - DIOSPA QHELQACHISQAN DEUTEROCANONICAL

Israelitakuna Puka Mama Qochata chimpanku

¹ Chantá Tata Dios Moisesta nerqa:

² Niy israelitakunata, kutirispa Pi Ajirotpi jarakunankuta. Chayqa Migdolwan, mama qochawan tinkuypi Baal Sefón chimpanpi kashan. Jinataj mama qocha qayllapi toldonkukunata sayarichichunku.

³ Faraontajrí chaypi kashasqaykichejta rikuspa, nenqa: Israelitakuna maymanchus rinankuta mana yachashankuchu. Ch'innejpi chinkasqa kashanku, nispa.

⁴ Noqataj ujtawan faraonpa sonqonta rumiyachisaj, qankunata qhatiykamunasuykichejpaj. Chaypacha faraonta, jinataj soldadonkunata chinkachispa, noqa may atiyniyoj kasqayta rikuchisaj. Ajinamanta Egipto llajtayojkuna yachanqanku noqa Tata Dios kasqayta, nispa. Chantá Moisés ajinata paykunaman willasqanrayku israelitakunaqa Diospa kamachisqanta kasorqanku.

⁵ Chaykamatajrí, Egiptota kuraj kamachej faraonman willarqanku israelitakuna ayqeshasqankuta. Chaypacha faraón, jinataj yanapajninkuna ima israelitakunata kacharipusqankumanta sonqonkuta nanachikorqanku. Chayrayku nerqanku: Imatataj kayta ruwakunchejri? Pitaj kunan imatapis ruwapuwasunchejri? nispa.

⁶ Chantá faraón usqhayllata carretanta wakichipunankuta kamacherqa. Jinaytawantaj, soldadonkunata pusariykukuspa, israelitakunaj qhepankuta kachaykukorqa.

⁷ Jinallataj sojta pachaj ajllasqa carretakunatapis apallarqataj, Egiptomanta tukuy waj carretakunatawan ima, sapa carretataj capitanniyoj karqa.

⁸ Chaypacha Tata Dios Egiptota kuraj kamachejpa sonqonta ujtawan rumiyacherqa soldadonkunawan israelitakunata qhatiykunanpaj, imaraykuchus israelitakuna Egiptomanta may jina atiywan llojsisqanku.

⁹ Egipto llajtayojkunaqa tukuy soldadonkukunawan, carretankuwan, jinataj caballopi soldadonkukunawan ima israelitakunaj qhepankuta kachaykukorqanku. Jinapi Egipto llajtayojkuna purispa, israelitakunata tariparqanku mama qocha kantupi, Pi Ajirotpi, Baal Sefón chimpapi jarasqa kashajtinku.

¹⁰ Israelitakunarí faraonta, soldadokunatawan ima qayllaykushasqankuta rikuspa, maytapuni mancharikorqanku. Chayrayku Tata Diosman qhaparikorqanku.

¹¹ Moisestapis nillarqankutaj: Manachu Egiptopi aya p'ampana karqa? Kay ch'inpi wañunaykupajchu pusamuwarqayku? Imatataj kayta ruwawaykuri? Imapajtaj Egiptomanta orqhomuwarqaykuri?

¹² Egiptollapiraj kashaspa, qanta nerqayku: Egipto llajtayojkunaj wata runanku kaspa, walejlla kashayku. Noqaykupaj paykunaj wata runanku kana aswan allin ch'inpi wañunaykumanta nisqaqa, nispa.

¹³ Moisestajrí israelitakunata nerqa: Ama manchariychejchu, pachanpi sayaychej, rikunkichejtaj Tata Dios qankunata kacharichisunaykichejpaj imatachus ruwananta. Kunallantawanña Egipto llajtayojkunaj uyankuta rikunkichej. Kaymanta qhepamanrí niña jayk'ajpis paykunata rikunkichejñachu.

¹⁴ Tata Diosmin qankunarayku maqanakonqa, qankunatajrí ama imamantapis llakikuychejchu, nispa.

¹⁵ Chantá Tata Dios Moisesta nerqa: Imaraykutaj yanapanayta mañakushawankiri? Israelitakuna ñawpajman puririnankuta niy.

¹⁶ Qantajrí varaykita oqharispa, makiykita mama qochanejman aysariy. Jinata ruwajtiykitaj, mama qocha iskayman t'aqakonqa, israelitakuna chayninta ch'aki pampata jina chimpanankupaj.

¹⁷ Noqataj Egipto llajtayojkunaj sonqonkuta rumiyachisaj, qhepaykichejta qhatiykamusunaykichejpaj. Chantá faraonta, soldadonkunata, carretapi, jinataj caballopi soldadonkunatawan atipaykusaj. Ajinamanta noqa may jina atiyniyoj kasqayta rikuchisaj.

¹⁸ Maypachachus noqa faraonta, soldadonkunata, carretapi, caballopi ima purej soldadokunata atipaspa, atiyniyoj kasqayta rikuchisaj chaypachaqa, puchoj Egipto llajtayojkunapis yachallanqankutaj noqamin Tata Dios kasqayta, nispa.

¹⁹ Chantá Diospa angelnin, pichus israelitakunaj ñawpaqenkuta risharqa, pay qhepankumanñataj rerqa. Jinallataj ñawpaqenkuta rishaj phuyupis kutirimuspa, qhepankuman rillarqataj.

²⁰ Chay jinapi phuyoqa Egipto llajtayojkunaj chantá israelitakunaj chawpinkupi rikhurerqa. Chaypachataj phuyoqa Egiptomanta soldadokunata laqhayaykorqa, israelitakunatatajrí k'ancharqa. Chayrayku Egiptomanta soldadokuna chay tuta mana israelitakunaman qayllaykuyta aterqankuchu.

²¹ Chantá Moisés mama qochanejman makinta oqharerqa. Tata Diostaj tukuy chay tuta inti llojsimuynejmanta sinch'ita wayrachimuspa, mama qochapi yakuta iskayman khallarparerqa. Ajinapi qochaqa iskayman t'aqasqa rikhurerqa, pampantaj ch'akiman tukorqa.

²² Israelitakunataj mama qochaj chawpinta yaykuspa, ch'aki jallp'ata chimparqanku, yakutaj jatun perqa jina lloq'enkupi, pañankupitaj sayasharqa.

²³ Chantá Egiptomanta soldadokunapis caballonkuwan, carretankuwan ima israelitakunata mama qochaj chawpinkama qhatiykorqanku.

²⁴ Tata Diostajrí, sut'iyamuy qayllata, phuyu ukhumanta, nina k'anchay ukhumantawan Egiptomanta soldadokunata qhawamorqa. Chantá paykunata pawicherqa.

²⁵ Chay jawa, Diosqa carretankoj tililinkanta sik'irpayarqa. Chayrayku Egiptomanta soldadokuna manaña ñawpajman riyta aterqankuchu. Jinapi paykuna ninakorqanku: Israelitakunamanta ayqekunachej, imajtinchus Tata Dios paykunaman sayakuspa, noqanchejwan maqanakushan, nispa.

²⁶ Chantá Tata Dios Moisesta nerqa: Makiykita mama qochanejman watejmanta oqhariy, yaku ujllata kutiykuspa, Egiptomanta soldadokunata, carretankukunata, tukuy caballonkukunata ima p'ampaykunanpaj, nispa.

²⁷ Sut'iyashajtinña, Moisés mama qochanejman makinta oqharerqa, mama qochapi yakutaj ujllata maychus kananman kutiykaporqa. Egiptomanta soldadokunarí ayqeshaspa, yakuwan tinkukorqanku. Ajinata Tata Dios Egiptomanta soldadokunata yakuwan mama qochapi chinkarparicherqa.

²⁸ Mama qochapi yaku pachanman kutiykapushaspa, tukuyninkuta p'ampaykorqa: Carretakunata, caballopi rejkunata, faraonpa tukuynin soldadonkunata ima. Pikunachus israelitakunaj qhepankuta yaykusqanku, chaykunamanta mana ujpis kawsashaj puchorqachu.

²⁹ Israelitakunarí mama qochata ch'aki jallp'api chimpasqanku, yakutaj pañankupi, lloq'enkupitaj perqa jina sayarqa.

³⁰ Ajinata Tata Dios chay p'unchay Egipto soldadokunaj makinmanta israelitakunata kacharicherqa. Israelitakunataj Egiptomanta soldadokunata mama qocha kantupi wañusqataña rikorqanku.

³¹ Chaypacha israelitakunaqa Tata Dios Egipto llajtayojkunaj contrankuta may jina t'ukunata ruwasqanta rikorqanku. Chayrayku payta may jatun respetowan qhawarqanku. Chantá Tata Diospi, jinataj kamachin Moisespipis atinikorqanku.