Éxodo 10 - DIOSPA QHELQACHISQAN DEUTEROCANONICAL

Phinki phinkikuna Egiptoman junt'aykun

¹ Chantá Tata Dios Moisesta nerqa: Riy faraonwan parlaj, imaraykuchus noqa paypa sonqonta, jinallataj yanapajninkunaj sonqonkutapis rumiyachini. Ajinata runaj mana jayk'aj rikusqan t'ukunata ruwasaj, atiyniyoj kasqayta rikuchinaypaj.

² Noqa Egiptopi imatachus ruwasqayta, paykuna ukhupi t'ukunakunata ruwasqaytapis, wawaykikunaman, allchhiykikunaman ima willanaykipaj ruwarqani. Ajinata ruwasqayrayku, qankuna yachankichej noqamin Tata Dios kasqayta, nispa.

³ Chaymanta Moiseswan, Aaronwan ima rispa, faraonta nerqanku: Tata Dios, Israelitakunaj Diosnin ajinata nisunki: Mayk'ajkamataj mana k'umuykuyta munankichuri? Kachariy israelitakunata, noqata yupaychamunawankupaj.

⁴ Manapunichus kacharipuyta munanki chayqa, q'ayapacha phinki phinkikunata tukuy Egiptoman kachaykamusaj.

⁵ Phinki phinkikunaqa phuyu jina pampaman tiyaykuspa, p'ampaykonqanku, mikhonqankutaj chijchi paramanta imachus puchojta. Jinallataj tukuy sach'atapis q'ara k'aspillata ruwanqanku.

⁶ Phinki phinkeqa wasiykiman, kamachiykikunaj wasinkuman, jinataj tukuy Egipto llajtayojkunaj wasinkukunaman junt'aykonqa. Chay jinataqa, tatayki, nitaj jatun tataykipis kasqankumantapacha kunankama ni jayk'aj rikorqankuchu, nispa. Jinata faraonta niytawantaj, Moisesqa kutirispa, faraonpa kamachinan wasimanta llojsiporqa.

⁷ Chantá faraonta yuyaychajkuna nerqanku: Mayk'ajkamataj kay runa umanchejta nanachiwasunri? Chay runakunata kacharipuy, ch'innejman rispa Tata Diosninkuta yupaychamunankupaj. Manachu yachanki Egiptoqa kay jina sonqo nanay phirisqaña kashasqanta? nispa.

⁸ Chantá faraonqa Moisesta, Aarontawan ima wajyachispa, nerqa: Riychej Tata Diosniykichejta yupaychaj. Chaywanpis ñawpajta willawaychej pikunachus rinankuta, nispa.

⁹ Moisestaj kuticherqa: Noqaykoqa juch'uy wawaykukunawan, machu runaykukunawan, churiykukunawan, ususiykukunawan, ovejaykukunawan, wakaykukunawan ima rinayku tiyan. Tukuyniykupuni rinayku tiyan, imaraykuchus Tata Diospa sutinpi jatun raymita ruwanayku tiyan, nispa.

¹⁰ Chantá faraón Moisesta, Aarontawan ima nerqa: Ajá, qankunaqa ima mana allin kajta ruwayta yuyashankichej. Tata Dios qankunawan kashanman chaypis, qankunata, wawaykichejkunantinta mana kachariykichejmanchu.

¹¹ Mana jinachu kanqa. Sichus Tata Diosta yupaychaj riytapuni munankichej chayqa, qhari kajkunalla rinkichej, nispa. Faraón ajinata niytawan, Moisesta, Aarontawan ima ñawpaqenmanta wijch'uchimorqa.

¹² Chantá Tata Dios Moisesta nerqa: Egipto suyunejman makiykita oqhariy. Jinataj phinki phinkikuna rikhurimuspa, chijchi paramanta puchojta, jinataj pampapi tukuy q'omer kajta tukunankukama mikhonqanku, nispa.

¹³ Chantá Moisesqa Egipto suyunejman varanta oqharerqa. Tata Diostaj inti llojsimuynejmanta uj p'unchayta, uj tutatawan wayrachimorqa. Sut'iyamuypajtaj wayraqa tukuy Egiptoman phinki phinkikunata apamorqa.

¹⁴ Phinki phinkeqa tukuy Egipto suyuman phuyu jina tiyaykorqa. Chay chhika phinki phinkeqa mana jayk'ajpis karqachu, nitaj jayk'ajpis kanqachu.

¹⁵ Phinki phinkikunaqa pampaman yanalla tiyaykusqanrayku, mana jallp'a rikukorqachu. Chantá jallp'api tukuy q'omer kajta, sach'akunaj poqoyninta, chijchi paramanta imachus puchojta ima mikhuykorqanku. Chayrayku tukuy Egiptopi ni ima q'omer, ni ima sach'a laqhe, nitaj qhorapis puchorqachu. Q'arallata saqerqanku.

¹⁶ Chantá faraonqa usqhay usqhayta Moisesta, Aarontawan ima wajyachispa, nerqa: Noqaqa Diosniykichej Tata Diospa contranta, qankunaj contraykichejtawan ima juchallini.

¹⁷ Chayrayku nirikuykichej: Kunallantawanña juchayta qhespichispa, Tata Diosniykichejmanta mañapuwaychej, kay millay khuruta noqamanta karunchananpaj, nispa.

¹⁸ Chayrayku Moisés faraonpata kamachinan wasimanta llojsiytawan, Tata Diosmanta mañarqa.

¹⁹ Chantá Tata Dios inti yaykuynejmantañataj wayrata wayrachimorqa. Chaytaj phinki phinkikunata aparpaspa, Puka Mama Qochaman wijch'uykamorqa. Jinamanta Egiptopi phinki phinkikunamanta mana ni ujpis puchorqachu.

²⁰ Chaywanpis Tata Diosqa faraonpa sonqonta ujtawan rumiyachillarqataj, israelitakunata mana kacharipunanpaj.

Egiptopi tuti laqhayay

²¹ Chantá Tata Dios Moisesta nillarqataj: Janajman makiykita oqhariy, tukuy Egiptopi manchay tuti laqha kananpaj, nispa.

²² Moisestaj makinta janajnejman oqharerqa, chantá kinsa p'unchay junt'ata tukuy Egiptopi manchay laqha karqa.

²³ Sinch'i laqha kasqanrayku, kinsa p'unchayta mana pipis rikunakorqankuchu, nitaj pipis, maypichus kasharqa, chaymanta kuyurerqachu. Chaywanpis maypichus israelitakuna tiyakusharqanku, chayllapi k'anchay karqa.

²⁴ Chantá faraonqa usqhayta Moisesta wajyachispa, nerqa: Riychej, wawaykichejtawan pusariykukuspa, Tata Diosta yupaychamuychej. Chaywanpis ovejaykichejta, wakaykichejtawan ama qhatiychejchu, nispa.

²⁵ Moisestajrí kuticherqa: Tata Diosniykuman jaywanaykupaj chantá uywata ñak'aspa q'olachinaykupaj, qanpuni qonawayku tiyan.

²⁶ Jinallataj tukuy uywaykukunaqa noqaykuwan rinanku tiyan. Mana ujpis qhepakonqachu, imaraykuchus Tata Diosniykuta yupaychanaykupaj chaykunamanta wakinta ajllanayku tiyan. Jaqayman chayanaykukama, manaraj yachaykuchu mayqen uywatachus Tata Diosman jaywanaykuta, nispa.

²⁷ Tata Diosrí ujtawan faraonpa sonqonta rumiyachillarqataj, israelitakunata ama kacharipuyta munananpaj.

²⁸ Chantapis faraonqa Moisesta nerqa: Llojsiy kaymanta, amaña ujtawan kutimuwaychu. Sichus ujtawan kutimuwanki chayqa, wañuchichisqayki, nispa.

²⁹ Moisestaj kuticherqa: Allinta ninki: Manaña ujtawan uyaykita rikusajchu, nispa.