Esdras 8 - DIOSPA QHELQACHISQAN DEUTEROCANONICAL

Jerusalenman kutimpojkunaj sutinku

¹ Kaykuna kanku wasi ayllu kamachejkuna, ayllunkumanta qhelqasqaman jina, Artajerjes kamachishajtin, Babiloniamanta noqawan khuska kutimporqanku, chaykunaj sutinku:

² Finespa ayllunmanta Gersón, Itamarpa ayllunmantataj Daniel, Davidpa ayllunmantataj Jatús.

³ Pay Secaniaspa ayllunmanta karqa. Parospa ayllunmanta Zacarías karqa. Paywan khuska 150 qharikunapis listallasqataj karqanku.

⁴ Pajat Moabpa ayllunmanta Zeraiaspa churin Elioguenay karqa. Paywan khuskataj 200 qharikuna karqanku.

⁵ Secaniaspa ayllunmanta Jahazielpa churin Zatu karqa, paywan khuskataj 300 qharikuna karqanku.

⁶ Adinpa ayllunmanta Jonatanpa churin Ebed karqa, paywan khuskataj phishqa chunka qharikuna karqanku.

⁷ Elampa ayllunmanta Ataliaspa churin Jesaías karqa, paywan khuskataj qanchis chunka qharikuna.

⁸ Sefatiaspa ayllunmanta Micaelpa churin Zebadías karqa, paywan khuskataj pusaj chunka qharikuna karqanku.

⁹ Joabpa ayllunmanta Yejielpa churin Abdías karqa, paywan khuskataj 218 qharikuna karqanku.

¹⁰ Banijpa ayllunmanta Josifiaspa churin Selomit karqa, paywan khuskataj 160 qharikuna karqanku.

¹¹ Bebaypa ayllunmanta Bebaypa churin Zacarías karqa, paywan khuskataj 28 qharikuna karqanku.

¹² Azgadpa ayllunmanta Hacatanpa churin Johanán karqa, paywantaj 110 qharikuna karqanku.

¹³ Kallarqankutaj Elifelet, Yeguiel, Semaías ima. Paykuna karqanku Adonicanpa qhepa kaj ayllunmanta. Paykunawan khuskataj 60 qharikuna karqanku. Chaywanpis paykuna aswan qhepata kutimporqanku.

¹⁴ Utaypa, Zabudpa, Bigvaypa ayllunkumanta kajkunapis kallarqankutaj, paykunawan khuskataj 70 qharikuna karqanku.

Templopi ruwanayoj kajkuna

¹⁵ Chantá, tukuyninkuta tantaykorqani Ahava nisqa llajtaman, mayu jamushan, chaynejpi. Chaypitaj kinsa p'unchay junt'ata jarakorqayku. Maypachatajchus runakunata, jinataj sacerdotekunata waturerqani chaypacha, paykuna ukhupi levitakunamanta ni ujtapis tarerqanichu.

¹⁶ Chayrayku kay kurajkunata wajyacherqani: Eliezerta, Arielta, Semaiasta, Elnatanta, Jaribta, chay waj Elnatanta, Natanta, Zacariasta, Mesulantawan ima. Wajyachillarqanitaj yachachejkuna Joyaribta, Elnatantawan ima.

¹⁷ Paykunatataj kamacherqani Iddota watukunankuta, pichus Casifia sutiyoj llajtapi kamachejta. Nillarqanitaj imatachus Iddoman willanankuta paypa ayllunman, runakunata kachamunawaykupaj Jerusalenpi kaj Templopi Diosninchejpa kamachinpi ruwanakunata junt'anankupaj.

¹⁸ Diosninchej sumajta yanapawasqaykurayku, paykunaqa Serebías sutiyoj sumaj yachayniyoj runata kachamuwarqayku. Payqa Majali sutiyoj levitaj ayllunmanta karqa. Wawankunawan, wawqenkunawantaj chunka pusajniyoj runakuna karqanku.

¹⁹ Chantapis paykuna pusamullawarqaykutaj Jasabiasta, Jesaiastawan. Paykuna Merarijpa ayllunmanta karqanku. Wawankunawan, wawqenkunawantaj iskay chunka karqanku.

²⁰ Ñawpajpi kuraj kamachej Davidwan, israelitakunata kamachejkunawan ima runakunata churasqanku Diospa Templonpi levitakunata yanapanankupaj. Chaykunamanta tukuyninpi 220 karqanku, sutinkutaj listaman churasqa karqa.

²¹ Chay qhepata Ahava mayu qayllapi tukuyninku ayunanaykuta kamacherqani, Diosniykoj ñawpaqenpi k'umuykukunaykupaj. Diosmanta yanapata mañakorqayku allillanta pusanawaykupaj, jinallataj aylluykuta, tukuy tiyapuyniykutapis waqaychananpaj.

²² P'enqakorqani Babiloniapi kaj kuraj kamachejmanta caballopi purej soldadokunata mañakuyta, ñanpi awqakunamanta waqaychanawaykupaj, imaraykuchus kuraj kamachejman nerqaykuña: Diosqa waqaychan payta mask'ajkunata. Payta saqerajkunarí k'araj phiñakuyninta rikonqanku, nispa.

²³ Ajinamanta ayunaspa mañakorqayku Diosniyku waqaychanawaykuta, paytaj uyariwarqayku.

²⁴ Chantá, kay chunka iskayniyoj kamachejkunata sacerdotekunamanta t'aqarqani: Serabiasta, Jasabiasta, chunka sacerdote masinkukunatawan.

²⁵ Paykunamantaj qolqe metalta, qorita, Diosta yupaychanapaj imakunatawan tupuspa jaywarqani, mayqentachus kuraj kamachej, chantá yuyaychajninkunawan, kurajkunawan, tukuy chaypi kaj israelitakunapiwan qosqanku Diosniykoj Templonpaj, chaykunata.

²⁶ Kay tukuy imata jaywarqani: 21.450 kilo qolqe metalta, qolqemanta ruwasqa imakunamanta 3.400 kilota, 3.300 kilo qoritawan.

²⁷ Jaywallarqanitaj iskay chunka qori vasokunata, pusaj kiloyojta, sumaj broncemanta ruwasqa lliphipej iskay vasokunatawan, qorimantapis kankuman jina may valorniyojta.

²⁸ Chantá sacerdotekunata nerqani: Qankunawan, jinallataj Diosta yupaychanapaj kay imakunapis Tata Diospaj t'aqasqa kankichej. Chay qoriwan, qolqe metalwan ima kanku, imatachus ñawpa tatanchejkuna Tata Diosninkuman sonqomanta qoyta munarqanku, chay.

²⁹ Chay imakunata allinta qhawaychej, waqaychaychejtaj, Tata Diospa Templonpi chaypi kaj sacerdotekuna, levitakuna, Israel ayllumanta kurajkuna ima rikushajtinku tupunaykichejkama, nispa.

³⁰ Chaypacha sacerdotekuna, levitakunawan jap'erqanku chay tupusqa qorita, qolqe metalta, Diosta yupaychanapaj imakunatawan, Jerusalenmantaj aparqanku Diosniykoj Templonman.

³¹ Ahava mayumanta purirerqayku wata killa qallariypi chunka iskayniyoj kaj p'unchaypi, Jerusalenman ripunaykupaj. Chantá Diosniyku yanapawarqayku, waqaychawarqaykutaj ñanpi sajra runakunamanta, awqaykunamantawan.

³² Jerusalenman chayaspataj, kinsa p'unchayta samarikorqayku.

³³ Tawa kaj p'unchaypitaj Diospa Templonpi tuporqayku chay qolqe metalta, qorita, chantá Diosta yupaychanapaj imakunatawan. Chantá Meremot sacerdoteman qorqayku, sacerdote Uriaspa churinman. Paywantaj kasharqanku Finespa churin Eleazar, levitakunamantataj Josuejpa churin Yozabad, Binuipa churin Noadías ima.

³⁴ Chay p'unchaytaj tukuynin chay apamusqa imakuna tupusqa, yupasqa, qhelqasqataj karqa.

³⁵ Chay qhepata pikunachus Babiloniamanta noqaykuwan khuska kutimporqanku, chaykunaqa kay imakunata qorqanku Israelpa Tata Diosninpaj ñak'aspa, q'olachisqa kanankupaj: Chunka iskayniyoj waka uñakunata, jisq'on chunka sojtayoj carnerokunata, qanchis chunka qanchisniyoj carnerokunatawan. Chunka iskayniyoj chivokunatapis juchaj cuentanmanta jaywallarqankutaj.

³⁶ Chaymanta Babiloniapi kuraj kamachejpa kamachisqan qhelqata jaywarqanku kamachejpa sutinpi kamachejkunaman, chantá Éufrates mayumanta inti yaykuynej ladopi kaj kamachejkunamanwan. Paykunataj israelitakunata tukuy imapi yanaparqanku, jinallataj Diospa Templonta ruwanapipis.