Esdras 4 - DIOSPA QHELQACHISQAN DEUTEROCANONICAL

Judiokunata chejnejkuna Templo ruwanata jark'anku

¹ Judá jatun aylluta, Benjamín jatun ayllutawan chejnejkunaqa yacharqanku, Babiloniaman apasqa kajkunamanta kutimojkuna Israelpa Tata Diosninpa Templonta watejmanta ruwashasqankuta.

² Chayrayku Zorobabelwan, Josuewan, ayllukunaj kurajninkuwan ima parlaj rispa, nerqanku: Noqayku kay Tata Diospa Templonta ruwaysisqayku. Noqaykupis qankuna jina Diosniykichejta yupaychallaykutaj. Esarjadón Asiriapi kuraj kamachej kashajtin, kayman apamuwarqayku, chaymantapachataj Diosman uywata ñak'aspa jaywashayku, nispa.

³ Chaywanpis Zorobabel, Josué, Israel ayllukunaj kurajninku ima kuticherqanku: Mana qankunawanqa Tata Diosniykoj Templonta ruwaykumanchu. Noqallayku ruwanayku tiyan Israelpa Tata Diosninpa Templontaqa, Persiamanta kuraj kamachej Ciro kamachiwasqaykuman jina, nispa.

⁴ Chaymanta chaypi tiyakoj runakunaqa judiokunata iskayrayacherqanku, manchacherqankutaj, Templota ama ruwanankupaj.

⁵ Aswanpis kuraj kamachejpa wakin kurajninkunaman qolqeta lluk'iykorqanku. Chaykunataj Templo ruwakunanta jark'arqanku, Persiapi kuraj kamachej Ciro kamachisharqa, chaypacha, kuraj kamachej Darío Persiapi kamachej yaykunankama.

⁶ Aswan qhepaman Asueroñataj kamachiyta qallarishajtin, chay chejnejkunaqa Judapi tiyakojkunaj contrankuta, chantá, Jerusalenpi tiyakojkunaj contrankuta uj cartata qhelqaspa, ch'ataykorqanku.

⁷ Aswan jaqayman Persiapi Artajerjes kuraj kamachej karqa, chaypachataj Bislán, Mitrídades, Tabel, chantá, ujkuna kamachej masinkunaman ima Artajerjesman uj cartata apacherqanku. Chay cartaqa arameo parlaypi qhelqasqa karqa, kuraj kamachejpa parlayninmantaj tijrarqanku.

⁸ Rejún kamachejwan, Simey qhelqeriwan ima kuraj kamachej Artajerjesman chay cartata qhelqarqanku, Jerusalenpi tiyakojkunaj contrankupi.

⁹ Chay qhelqajkunataj kaykuna karqanku: Kamachej Rejún, qhelqeri Simey, juezkuna, chantá kamachejkuna, Persiapi kaj kurajkuna ima, Erecmanta, Babiloniamanta, Susamantawan kaj runakuna ima. Paykunaqa Elammanta karqanku,

¹⁰ chantapis waj suyukunamanta kajkunawan ima. Paykunataqa kuraj kamachej Asnapar llajtankupi jap'irachispa, apachisqa Samariaman, Éufrates mayoj inti yaykuynej ladonman ima.

¹¹ Chay qhelqasqanku carta kay jinata nerqa: Artajerjes kuraj kamachejniyku, noqayku pikunachus Éufrates mayoj inti yaykuynej ladopi tiyakojkunaqa qanta napaykamusunku:

¹² Kuraj kamachejniyku, willamuyku, pikunachus Babiloniamanta kayman jamporqanku, chay judiokunaqa Jerusalenman chayamuspa, watejmanta sayarichishanku kay mana kasukoj sajra llajtata. Cimientota churaspa, perqata oqhariyta qallarinkuña.

¹³ Willamullasuykutaj, maypachachus kay llajta watejmanta ruwasqa kanqa, perqantaj watejmanta sayarichisqa kanqa chaypachaqa, chay runakuna manaña pagayta munanqankuchu ni ima impuestokunata, ni ñan pichaypajpis ni imata qoyta munanqankuchu. Ajinamanta qanpajqa qolqe pisiyanqa.

¹⁴ Noqaykoqa qan kuraj kamachejniykoj kamachiykipi kashayku, chayraykutaj mana kamachej kayniyki pisipaj qhawasqa kananta munaykuchu. Chayrayku qan kuraj kamachejniykuman kayta willamuyku:

¹⁵ Mask'achiwaj ñawpa tataykikunaj ruwasqankumanta willaj qhelqakunata. Kuraj kamachejniyku, chaypi tarinki, yachankitaj, kay llajtayojkuna mana kasukoj kasqankuta kamachejkunapajpis, jinallataj waj suyukunapajpis. Ñawpa p'unchaypi paykuna kuraj kamachejpa contranpi oqharikullarqankupuni. Chayrayku kay llajta thuñisqa karqa.

¹⁶ Kuraj kamachejniyku, qanman willamuyku, sichus kay llajta watejmanta ruwakonqa, perqantaj sayarichisqa kanqa chayqa, manaña kasuchikuyta atinkichu Éufrates mayoj inti yaykunan ladopi kaj llajtakunawan, nispa. Ajinata Persiapi kuraj kamachej Artajerjesman cartata qhelqarqanku judiokunaj contranpi.

¹⁷ Chantá kuraj kamachej Artajerjesqa kutichispa, kay jinata qhelqacherqa: Kamachej Rejún, qhelqeri Simeyta, chantá, Samariapi tiyakunku chay wakin kamachej masiykichej, jinallataj Éufrates mayoj inti yaykuynej ladopi tiyakojkunapis, napaykamuykichej.

¹⁸ Chay apachimuwasqaykichej cartata parlayniyman tijrachispa, ñawirerqani.

¹⁹ Kamacherqani ñawpa p'unchaypi imachus kasqanmanta willaj qhelqapi mask'anankuta. Cheqamanta ajina kasqa: Chay llajtaqa ñawpajpi kuraj kamachejkunaj contranpi oqharikusqanku. Paykunawan maqanakunankupaj, ch'ajwata ruwanankupajtaj wakichikusqanku.

²⁰ Jerusalenpi ñawpa kuraj kamachejkunaqa atiyniyoj kasqanku, jinataj Éufrates mayoj inti yaykuynej ladopi kaj llajtakunata wakin kuti kamachisqanku, pagachikuspa impuestokunata, ñan pichaypaj qolqeta ima.

²¹ Kunanqa chay runakunata kamachiychej amaña imatapis astawan ruwanankuta. Chay llajtata ama watejmanta ruwachunkuchu, noqa ninaykama.

²² Kaytaqa allintapuni junt'aychej, ama noqapaj mana allinkuna rikhurinanpaj, nispa.

²³ Maypachachus kuraj kamachej Artajerjespa cartanta Rejún, qhelqeri Simey, chantá kamachej masinkuna ñawirerqanku chaypacha, tukuyninku Jerusalenman rerqanku, kallpawan chay judiokunaj ruwanankuta sayachinankupaj.

²⁴ Ajinamantataj, judiokuna Jerusalenpi Diospa Templonta ruwanankuta saqerqanku, Persiapi kuraj kamachej Darío iskay watata kamachinankama.