Esdras 3 - DIOSPA QHELQACHISQAN DEUTEROCANONICAL

Watejmanta altarta sayarichinku

¹ Qanchis kaj killapi israelitakunaqa sapa ujpis llajtankupi tiyakushaspaña, Jerusalenpi tukuyninku uj runa jinalla tantakorqanku.

² Chaypacha Josadacpa churin Josué, chantá sacerdote masinkuna, jinallataj Salatielpa churin Zorobabel, chantá ayllu masinkuna ima Israelpa Diosninpa altarninta ruwarqanku. Ajinaqa paykuna chay patapi uywakunata ñak'aspa q'olachiyta munarqanku, Diospa kamachin Moisespa kamachisqanman jina.

³ Muyuyninkupi tiyakojkunata manchachikushaspapis, altarta ruwarqanku, maypichus ñawpajta ruwasqa karqa, chayllapitaj. Chay patapitaj Tata Diosman uywata ñak'aspa ch'isin, paqarin q'olacherqanku.

⁴ Chantá Ch'ujlla Ruwana raymitapis ruwallarqankutaj Moisespa kamachisqanpi qhelqasqaman jina. Sapa p'unchaytaj uywata ñak'aspa q'olacherqanku yachasqa kasqanman jina, sapa p'unchaypaj kamachisqa kasqanman jinataj.

⁵ Jinallataj jaywarqanku sapa p'unchay q'olachina kajta, mosoj killapi q'olachinatapis, ajinallataj Tata Diospa jatun rayminkunapi q'olachina kajtapis. Chantá munasqankuman jina ofrendakunatapis qollajtaj kanku.

⁶ Manaraj Tata Diospa Templonta watejmanta ruwayta qallarerqankuchu. Chaywanpis qanchis kaj killa qallariymantapacha Tata Diosman jaywana kajta q'olachiyta qallarerqankuña.

⁷ Chantá Templota ruwanapaj qolqeta jaywarqanku rumi ch'eqojkunaman, carpinterokunaman ima. Jinallataj Tiromanta, Sidonmanta kajkunamanpis mikhunata, ujyanata, aceitetawan apacherqanku, pino kurkuta Jatun Qochanejta Libanomanta Jopekama apamunankupaj. Chay karqa Persiamanta kuraj kamachej Ciroj kamachisqanman jina.

Templota watej ruwayta qallarinku

⁸ Wataj iskay kaj killanman Jerusalenpi Tata Templonta ruwanankupaj chayamusqankumanta Salatielpa churin Zorobabel, Josadacpa churin Josuetaj, sacerdote masinkunawan, levitakunawan ima, chantá pikunachus Babiloniaman apasqa kasqankumanta Jerusalenman kutimporqanku, chay tukuyninku Tata Diospa Templonta watejmanta ruwayta qallarerqanku. Templota ruwachinapajqa ajllarqanku iskay chunka watayojmanta pataman levitakunata.

⁹ Josué, churinkunawan, wawqenkunawantaj, chantá Judá ayllumanta Cadmiel, churinkunawan, Henadadpa churinkunawan, levita masinkunawan ima ajllasqa karqanku. Paykunaqa Tata Diospa Templonta ruwajkunata qhawaspa ruwachinankupaj churasqa karqanku.

¹⁰ Maypachachus wasi ruwajkuna Tata Diospa Templonta ruwayta qallarerqanku chaypacha, sacerdotekunaqa sayarikorqanku sacerdote p'achawan p'achallisqa, pututuyojtaj. Asafpa churinkuna levitakunataj platillokunayoj karqanku, Tata Diosta yupaychanankupaj, Israelpa ñawpa kuraj kamachejnin Davidpa yachachisqanman jina.

¹¹ Ujkuna yupaychaspa takerqanku, wajkunataj Tata Diosman pachis nispa, nerqanku: Payqa may k'achapuni, Israeltaqa wiñaypaj munakun, nispa. Chantá tukuy runakuna kusiywan qhaparispa, Tata Diosta yupaycharqanku, paypa Templonta watejmanta ruwayta qallarishajta rikusqankurayku.

¹² Sacerdotekunamanta, levitakunamanta ashkha, chantá kuraj tatakuna ima ñawpa Templota rikusqanku. Chayrayku jatunmanta qhaparispa, waqarqanku Tata Diospa Templon watejmanta ruwakushajta rikuspa. Wakintaj kusiywan qhaparisharqanku.

¹³ Mana pipis yachayta aterqachu, kusiywanchus, chayrí llakiywanchus qhaparishasqankuta, imaraykuchus karumantapacha chay ch'ajwaqa uyarikorqa.