Esdras 1 - DIOSPA QHELQACHISQAN DEUTEROCANONICAL

Ciro kamachin Israelitakuna kutipunankuta

¹ Persiamanta kuraj kamachej Ciro uj watataña kamachishajtin, Tata Dios junt'ayta qallarerqa, ima sut'inchaytachus pay willachisqa sut'inchaj Jeremiasnejta, chayta. Chayrayku Tata Diosqa kuraj kamachej Ciroj sonqonta kuyuricherqa. Cirotaj tukuynin kamachiyninpi kajkunaman parlaypi, qhelqasqapitaj kay jinata willacherqa:

² Persiamanta kuraj kamachej Ciroqa kay jinata nin: Janaj pachapi kaj Tata Diosqa tukuy kay pachapi suyukunata makiyman churan, kamachiwantaj Judapi kaj Jerusalén llajtapi paypaj uj Templota ruwapunayta.

³ Paymin Israelpa Diosnin, Jerusalenpitaj kashan. Chayrayku pikunachus Diospa ayllunmanta kankichej, tukuyniykichejwan Dios kachun, qankunatataj yanapachun Judapi kaj Jerusalenman rispa, Tata Diospa Templonta sayarichimunaykichejpaj.

⁴ May llajtakunapichá israelitakuna kawsashankuraj, chay llajtayojkunaqa israelitakunata yanapachunku ripunankupaj qolqe metalwan, qoriwan, imachus tiyapuyninkuwan, uywankuwan ima. Ofrendatapis qollachunkutaj atisqankuman jina, Jerusalenpi kaj Tata Diospa Templonpaj, nispa.

Israelitakuna Jerusalenman kutipunku

⁵ Chantá Judá jatun ayllumanta, Benjamín jatun ayllumantawan kuraj runakuna wakichikorqanku Jerusalenman rinankupaj, Tata Diospa Templonta watejmanta ruwamunankupaj. Jinallatataj wakichikorqanku sacerdotekuna, levitakuna, chantapis pikunaj sonqonkutachus Dios kuyuricherqa, chaykuna ima.

⁶ Jinataj tukuy qayllankupi tiyakojkunapis paykunata yanaparqanku qolqewan, qoriwan, kapuyninkuwan, uywankuwan, ashkha valorniyoj imakunawan, chantapis tukuy imaymana ofrendankuwan atisqankuman jina.

⁷ Maypachachus Nabucodonosor Jerusalenta atipasqa chaypacha, payqa Tata Diospa Templonmanta tukuy imata Babiloniaman apakapusqa diosninkunaj templonkuman churananpaj. Kuraj kamachej Cirotajrí chay tukuyta chay templokunamanta orqhochimorqa.

⁸ Chantá Persia suyoj qolqenta jallch'aj Mitriadesnejta Ciroqa chay imakunata kutichiporqa. Mitriadestaj chaykunata yupaytawan, Sesbasar sutiyoj runaman qorqa. Sesbasarqa Judá suyuman kutipojkunata kamachej karqa.

⁹ Kay imakunata kutichiporqa: Qorimanta kinsa chunka p'uku platokunata, qolqe metalmanta 1.000 p'uku platokunata, iskay chunka jisq'onniyoj cuchillokunatawan,

¹⁰ jinallataj qorimanta kinsa chunka vasokunata, qolqe metalmanta 410 vasokunata, 1.000 waj imakunatawan.

¹¹ Tukuy chay qolqe metalmanta, qorimantataj kaj imakunaqa 5.400 yupakorqa. Jinataj Sesbasarqa chay tukuy imata watejmanta aparqa Jerusalenman, Babiloniaman apasqa kasqanku, chay kutipoj runakunawan khuska.