Efesios 2 - DIOSPA QHELQACHISQAN DEUTEROCANONICAL

Diospa qhasilla yanapayninrayku qhespichisqa kanchej

¹ Ñawpajta qankuna millayta ruwasqaykichejrayku, jinataj juchallisqaykichejrayku Diospaj wañusqapis kawajchej jina karqankichej.

² Chaykunapi qankuna ñawpajta kawsaj kankichej, Diosman mana kutirikojkunaj purisqankuta qhatispa. Jinallataj mana rikukoj atiyniyojkunata kamachej Kuraj Supayta kasorqankichej, mayqenchus Diosta mana kasojkunaj sonqonkupi llank'ashan, chayta.

³ Ñawpajta tukuyninchej ajinallatataj kawsaj kanchej. Juchallinaman aysaj sonqonchejpa munayninman jina purej kanchej, munasqanta, yuyasqanta ima ruwaspa. Ajinamanta noqanchejpis chay wajkuna jina Diosnejta sinch'i jasut'isqa kanapaj jina karqanchej.

⁴ Chaywanpis Diosqa khuyakuypi may jina qhapaj kaspa, may jinatapuni munakuwarqanchej.

⁵ Juchallisqanchejrayku wañusqa kashajtinchej, Dios noqanchejmanpis kawsayta qowarqanchej, maypachachus Cristota wañusqakunamanta kawsaricherqa, chaypacha. Noqanchej Diospa qhasilla k'acha yanapayninrayku qhespichisqa kanchej.

⁶ Diosqa Cristo Jesuswan khuskata kawsarichiwarqanchej, chantá janaj pachapi paywan khuskata tiyaykuchiwarqanchej, imajtinchus Cristo Jesusman ujchasqa kanchej.

⁷ Chayta ruwarqa, jamoj p'unchaykunapi may qhapaj k'acha yanapayninta, munakuyninta ima rikuchinanpaj, Cristo Jesusman ujchasqa kasqanchejrayku.

⁸ Diosqa qhasilla k'acha yanapayninnejta qhespichisorqachej, maypachachus Jesucristopi atinikorqankichej, chaypacha. Qhespichisqa kanaqa mana qankuna imatapis ruwasqaykichejraykuchu, manachayqa Diospa qhasilla jaywasqan.

⁹ Mana pipis imata ruwasqanraykuchu qhespichisqa kanata tarin, ama jatunchakunanpaj.

¹⁰ Noqanchejqa Diospa ruwasqanmin kanchej, Jesucristoman ujchasqa kasqanchejraykutaj watej ruwawarqanchej allin kajta ruwananchejpaj. Chaykunata Dios ñawpajmantaña wakicherqa ruwananchejpaj.

Judiokuna mana judiokuna ima Cristonejta allinyachisqa kanchej

¹¹ Ama qonqaychejchu qankuna mana judiokuna ñawpajta imaynachus kasqaykichejta. Judiokunaqa alqochakuspa jina mana circuncidasqamanta rejsisorqachej. Paykuna circuncidasqa kasqankumanta mayta runaykachanku, ukhullanku, manataj sonqonkuchu circuncidasqa kashajtinpis.

¹² Chaypachaqa Cristomanta t'aqasqa karqankichej, Israel llajtayoj kaymanta karunchasqa, manallataj Diospa qosaj nisqan tratotapis rejserqankichejchu. Jinallataj qankuna kay pachapi mana ni ima suyanayoj karqankichej, Diostaj mana Diosniykichejchu karqa.

¹³ Kunanrí Cristoman ujchasqa kaspa, pikunachus ñawpajta karupi karqankichej, chaykuna qayllachisqaña kankichej, pay cruzpi wañusqanrayku.

¹⁴ Cristomin allinyachiwajninchej, paytaj t'aqaj perqata urmachispa, mana judío kajkunamanta, judiokunamantawan uj ayllullata ruwawarqanchej.

¹⁵ Cristo wañusqanwan Moisespa kamachisqankunata tukuychayninman churarqa. Jinataj paymin judiokunata, mana judiokunata ima allin kawsayman churarqa, iskayninkumanta uj mosoj aylluta ruwaspa.

¹⁶ Ajinamanta Cristo judiokunata, chantá mana judiokunata ima Dioswan allinyachispa uj ayllullaman tukucherqa, cruzpi wañusqanwan chejninakuyninkuta chinkachispa.

¹⁷ Cristo jamuspa, allinyachisqa kanamanta sumaj willayta willarqa, qankuna mana judiokuna Diosmanta karupi kashajkunaman, jinataj pikunachus qayllallapi kasharqayku, chay judiokunamanpis.

¹⁸ Kunantaj paynejta judiokuna, mana judiokunapis kikin Santo Espiritunejllata Tata Diospa ñawpaqenman qayllayta atinchej.

¹⁹ Ajinaqa mana judiokuna manaña waj llajtayojchu kankichej, nitaj Diospaj mana rejsisqachu. Manachayqa Diospa ajllakusqankunawan uj llajtayojllaña kaspa, Diospa ayllunmanta kankichej.

²⁰ Iglesiamanta tukuy kajkunaqa uj wasi jina kanchej, chay wasitaj Jesuspa kuraj kachankunaj, jinataj Diosmanta sut'inchajkunaj yachachisqankupi sayachisqa kashan. Chay wasej sumaj esquina rumintaj Jesucristomin.

²¹ Paymin tukuy wasita sumaj sayachisqata jap'in, jinataj payllataj wiñachishan, Tukuyta Kamachej Diospaj t'aqasqa templo kanankama.

²² Ajinallatataj qankunapis Cristoman ujchasqa kasqaykichejrayku, chay wasimanta kankichej, mayqenpichus Diosqa Santo Espiritunejta tiyakun, chaymanta.