Efesios 1 - DIOSPA QHELQACHISQAN DEUTEROCANONICAL

Pablo napaykun

¹ Noqa Pabloqa Diospa munayninrayku Jesucristoj kuraj kachan kani. Kay cartata Éfeso llajtapi Diospaj t'aqasqa kajkunaman apachimuni, pikunachus mana sayk'uspa Cristo Jesusta qhatinku, chaykunaman.

² Tata Diosninchejpa, Tukuyta Kamachej Jesucristojtawan qhasilla k'acha yanapayninku, sonqo tiyaykuyninkutaj qankunawan kachun.

Jesucristonejta Dios imatachus ruwapuwanchej

³ Tukuyta Kamachej Jesucristonchejpa Tata Diosninta yupaychana, imaraykuchus Cristoman ujchasqa kasqanchejrayku, Santo Espirituman jina janaj pachapi tukuy imaymanamanta saminchaykuwanchej.

⁴ Manaraj kay pachata ruwashaspa, Diosqa Cristonejta ajllakuwarqanchej llimphupuni kananchejpaj, jinataj paypa ñawpaqenpi mana k'amina kananchejpaj ima.

⁵ Dios munakuwasqanchejrayku Churin Jesucristonejta paypa wawanpaj rejsikapuwarqanchej, imajtinchus ajina kananta qallariymantapacha nerqa.

⁶ Tata Dios ajinata ruwarqa payta yupaychananchejpaj, imaraykuchus payqa t'ukuna qhasilla k'acha yanapayninwan yanapawarqanchej munasqa Churinman ujchasqa kasqanchejrayku.

⁷ Cristo cruzpi wañuspa, kawsayninwan preciota pagarqa kacharichisqa kananchejpaj. Jinataj Cristoman ujchasqa kasqanchejrayku Dios juchanchejta pampacharqa khuyakuynin may jina jatun kasqanrayku.

⁸ Diosqa chay may jatun khuyakuyninmanta ashkhata qowarqanchej, tukuy yachayta, entiendeytawan ima.

⁹ Munasqanman jina payqa imatachus wakichisqanmanta chay pakasqa yachayta rejsichiwarqanchej, mayqentachus Cristopi junt'ayta munarqa, chayta.

¹⁰ Ajinamanta señalasqa p'unchay chayamojtin, Diosqa janaj pachapi kajkunata, jinallataj kay pachapi kajkunatapis ujllaman tantanqa, chantá Cristoj kamachiyninman churanqa.

¹¹ Jinallataj Cristoman ujchasqa kasqanchejrayku Diospa chayaqenmanta jap'erqanchej. Dios ajina kananta nerqa, imajtinchus payqa wiñaymantapacha ajllakuwarqanchej, pichus munayninta junt'ananpaj tukuy imata ruwan, chay.

¹² Chantá Dios munarqa noqayku judiokunaraj ñawpajta Cristopi sonqoykuta churanaykuta, paypa jatun kayninta jatunchanaykupaj.

¹³ Qankuna mana judío kajkunapis Dios qhespichinanmanta sumaj willayta uyarerqankichej, chay willaytaj cheqa willaymin. Maypachachus Cristopi atinikorqankichej chaypacha, Diosqa paypata kasqaykichejmanta yachayta qospa, Santo Espirituwan sellasorqachej, pitachus ñawpajta qonanta nerqa, chaywan.

¹⁴ Diosqa Santo Espirituta qowanchej chayaqeta jap'inanchejmanta señata jina. Jinataj noqanchej chay chayaqeta jap'isunchej, maypachachus Dios rantikusqanta paypata kananpaj kacharichenqa, chaypacha, ajinamanta jatun kayninta yupaychananchejpaj.

Pablo paykunarayku Diosmanta mañapun

¹⁵ Chayrayku noqapis Tukuyta Kamachej Jesuspi sinch'ita atinikusqaykichejta yachaspa, jinataj ajllasqa kajkunata munakusqaykichejta ima uyarispa,

¹⁶ mana sayk'uspa qankunamanta Diosta pachis ninipuni. Paywan parlarikuspataj, qankunamanta yuyarikunipuni.

¹⁷ Mañapuykichej Tukuyta Kamachejninchej Jesucristoj Diosnin, atiyniyoj Tataqa Santo Espiritunejta yachayta, yuyayta ima qosunaykichejta, ajinamanta Dios imaynachus kasqanta maychus kajta yachanaykichejpaj.

¹⁸ Mañapullaykichejtaj Dios sut'ita reparachisunaykichejta ima suyanamanchus wajyasqa kasqaykichej may jina valorniyoj kasqanta. Mañapullaykichejtaj qankuna Diospata kajkunaman chayaqe qosqanpis imayna qhapajchus kasqanta yachanaykichejpaj.

¹⁹ Jinallataj Dioswan parlarikuspa, mañapuykichej noqanchejpaj Diospa atiynin may jina jatunchus kasqanta rejsinaykichejpaj. Chay atiyta Diosqa may jinata rikucherqa,

²⁰ maypachachus Cristota wañusqakunamanta kawsarichispa, janaj pachapi pañanman tiyaykucherqa, chaypacha.

²¹ Tata Diosqa Cristota churarqa tukuy kurajkunaj, atiyniyojkunaj, kallpayojkunaj, chantá kamachejkunaj patankuman ima. Jinallataj Cristoj sutin tukuy rejsisqa sutimantapis aswan jatunchasqa kananpaj churallarqataj mana kunallanchu, manachayqa jamoj p'unchaykunapipis.

²² Jinallataj Diosqa tukuy imata Cristoj chakin uraman churarqa. Chantá payta churallarqataj tukuy imapi Iglesiaj Uman kananpaj.

²³ Cristoqa iglesiapaj, imaynachus runaj ukhunpaj uman, ajina. Jinataj tukuy imaman junt'aj Cristowan iglesiaqa sumaj junt'asqa kashan.