Eclesiastés 5 - DIOSPA QHELQACHISQAN DEUTEROCANONICAL

Imatachus nisqanchejta junt'anapuni

¹ 1 (4.17) Diospa Templonman rispaqa, imatachus ruwasqaykita allinta qhawarikuy, imatachus yachachisqankutataj sumajta uyariy. Aswan walej Tata Diosta kasuna, mana allinta yachaspalla imatapis Diosman jaywanamanta nisqaqa.

² 2 (1) Ama simiykeqa imallatapis parlachunchu, nitaj sonqoykipis Diospa ñawpaqenpi imatapis ruwanaykita nichunchu. Diosqa janaj pachapi kashan, qantaj kay pachallapi kashanki. Chayrayku imatapis pisillata parlay.

³ 3 (2) Anchata imamantapis phutikusqamanta mosqokuspa musphay jamun. Jinallataj ashkha parlaymanta mana yuyaycharikuspa rimaypis jamun.

⁴ 4 (3) Imatachus Diosman nisqaykitaqa junt'aypuni, imaraykuchus payqa wampukunawan mana kusikunchu. Chayrayku imatachus nisqaykita junt'aypuni ari.

⁵ 5 (4) Chaynejta mana junt'anapajqa mana imatapis ruwasaj ninachu.

⁶ 6 (5) Ama simiykiwan juchallinaman tanqachikuychu, amataj Diospa kachamusqanpa ñawpaqenpi niychu: Ruwasaj nispaqa, pantaykusqani, nispa. Imajtintaj qanqa Diosta imatachus parlasqaykiwan phiñachiwajri, paytaj makiykiwan ruwasqaykita manakajman tukuchinman?

⁷ 7 (6) Ancha jatunta yuyanaqa qhasi manakajta parlanata apamun. Qantajrí Diosta manchachikuypuni.

Qhapaj kayqa qhasilla

⁸ 8 (7) Ichapis may llajtapi wajchakunata ñak'arichejta rikunki, cheqan kajtapis manakajman tukuchejta rikullankitaj. Chayta rikuspa, ama t'ukuychu. Uj kamachejtaqa uj kuraj kaj pakan, paytataj uj astawan kuraj kajñataj pakan. Paykunaj ruwasqankutapis astawan kuraj kaj pakashallantaj.

⁹ 9 (8) Tukuypis jallp'aj poqosqanmanta mikhunku. Kikin kuraj kamachejpis chayllamantataj mikhun.

¹⁰ 10 (9) Pichus qolqeta munakojqa astawanpuni munan. Qhapaj kayta munakojqa mana imawan sonqo junt'asqa kayta atinchu. Chaypis qhasi manakajlla kasqanta repararqani.

¹¹ 11 (10) Runaj tiyapuynin astawan ashkhayajtenqa, chaymanta mikhojkunapis astawan yapakullankutaj. Ima allintaj qhapajpaj kanqa, ashkha qolqen qhawarinallanpaj kajtinri?

¹² 12 (11) Llank'aj runaqa pisitapis ashkhatapis mikhuspa, sumaj misk'ita puñukun. Qhapaj runatarí tiyapuynin mana allinta puñukojllatapis saqenchu.

¹³ 13 (12) Kay pachapi uj jatun llakiyta rikuni: Qhapajkunaqa tiyapuyninkuta waqaychanku aswan qhepaman waqanankupaj.

¹⁴ 14 (13) Rikullanitaj imachus tiyapusqanta manakajllapi tukuchisqankuta, jinaqa wawankupaj manaña imapis saqenanpaj kanñachu.

¹⁵ 15 (14) Imaynatachus runa mamanpa wijsanmanta q'alalla llojserqa, ajinallatataj q'alalla mana imayoj riponqa. Llank'asqanmantaqa mana imatapis makinpi apanqachu. Imaynachus paqarimorqa, kikillantaj riponqa.

¹⁶ 16 (15) Kaypis manallataj allinchu: Imaynatachus kay pachaman jamorqa, kikillantataj kutiponqa. Jina kajtenqa, imapajtaj chay jinatapuni qhasi manakajta llank'arqari?

¹⁷ 17 (16) Runaqa kawsan llasa q'epiwan atiykusqa jina, llakisqalla, sonqo q'asalla, ñak'arispa, phiñasqallataj.

¹⁸ 18 (17) Chayta rikuspa, noqa nini: Allinpuni runapaj mikhunan, ujyanan, kusikunan ima sinch'ita ruwaspa tarisqanmanta, Diospa qosqan chay pisi kawsaypi. Chaymin runaj t'inkanqa.

¹⁹ 19 (18) Ajinallataj Diosqa pi runamanpis qhapajyayta, allin imakunatawan qon. Chaymanta kusikunanpaj, mikhunanpaj, sinch'ita ruwaspa tarisqanta jap'inanpaj qollantaj. Chayqa Diosmanta jamun.

²⁰ 20 (19) Dios chay jinatapuni kusichisqanrayku, runaqa kawsananmanta mana llakikunchu.